Ra Taroga na iTabagone . . .

Au na Vakayagataka Vakacava na Noqu Bula?

“Taumada, au dau sega soti sara ni leqataka na veika e baleta na gauna mai muri. Ia ni sa voleka ni cava noqu vuli, au kila niu sa na lai cakacakataka noqu bula ni veisiga, lako vata kei na veika meu na sauma.”​—Alex, yabaki 17.

NI O se gone, o dau raitayaloyalotaka beka na ka mo na cakava ni o sa tamata bula? Vakacava ena gauna oqo? Ni o sa uabula, o veilecayaki beka se mo qarava vakacava nomu bula? Ke vaka kina, e sega ni o iko duadua ga o leqataka oqori. “Na vakatulewataki ni cakacaka e dua vei ira na ka era nuiqawaqawataka vakalevu na itabagone,” e kaya na ivola na Career Coaching Your Kids.

Ena yasana adua, rairai ena gauna oqo o sega sara ni vakasamataka tiko na cakacaka. De dua o kauaitaka ga vakalevu mo marau. Sega ni cala oqori, me vaka e kaya na iVolatabu mo ‘marau ni o se cauravou tiko!’ (Dauvunau 11:9) Ia, oqo e gauna vinaka mo vakasamataka kina se mo na vakayagataka vakacakava nomu bula. E kaya na Vosa Vakaibalebale 14:15: “Na tamata yalomatua sa daulewa vakavinaka na nonai lakolako.” Vakacava o iko?

‘Me Dei Nomu Lewa na Nomu iLakolako’

Kaya mada, o lalawataka tiko e dua na ilakolako e vica vata na kilomita na kena yawa mai na nomu itikotiko. De dua o na dikeva mada e liu na mape mo rawa ni kila na sala vinaka duadua mo na muria. E vakatale ga kina na lalawataki ni ka mo na cakava ena gauna mai muri. “E levu na ka mo na digidigi kina,” e kaya o Michael, na cauravou e veiqaravi tiko ena gauna oqo ena dua na valenivolavola ni tabana ni iVakadinadina i Jiova. O na dikeva vakacava na levu ni veika sa tu mo digidigi kina? “E vauci kina na nomu isausau,” e kaya o Michael.

Vakasamataka me nomu isausau mo na yaco ina dua na vanua. O na rairai sega ni yacova na vanua oqori ke o veilakoyaki voli ga vakaveitalia. Ena vosa vakaivakatakarakara, ena vinaka sara ke o vakayagataka na mape mo qai tuvanaka na nomu ilakolako. Ni o cakava oqori o sa muria tiko na ivakaro ena Vosa Vakaibalebale 4:26: ‘Me dei nomu lewa na nomu ilakolako.’

Ena veiyabaki e tu e liu, e levu sara na vakatulewa bibi mo na cakava me baleta na sokalou, cakacaka, vakawati, matavuvale kei na veika bibi tale e so. E rawa mo vakatulewa vakayalomatua ke o sa kila rawa tu na ka mo na cakava. Ni o sa navuca na sala mo na muria ena nomu bula, e dua na ka bibi e sega ni rawa ni o vakalecalecava.

“Nanumi Koya ka Buli Iko”

Kevaka mo na marau dina, ena vinaka mo nanuma na nona vosa na tui vuku o Solomoni: “Mo nanumi koya ka Buli iko ni ko sa cauravou tiko.” (Dauvunau 12:1) Na ivakarau ni bula o digia e dodonu me vu mai na nomu via vakamarautaka na Kalou.

Na cava e bibi kina oya? E kaya na iVolatabu ena Vakatakila 4:11: “Kemuni . . . [Jiova] na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa: ni sai kemuni ka bulia na ka kecega, era sa buli ga ka tu dei talega e na nomuni lewa.” Io, na kabula kece e lomalagi vaka kina e vuravura e dodonu mera vakavinavinakataka na Dauveibuli. O vakavinavinaka beka vua ni solia “na bula, kei na cegu, kei na ka kecega”? (Cakacaka 17:25) E sega beka ni uqeti iko mo dolea lesu ena vakavinavinaka vua na Kalou o Jiova na veika e vakarautaka me baleti iko?

Nodra kauaitaka na Dauveibuli, e levu na itabagone iVakadinadina i Jiova era digia mera saga na cakacaka vakaitalatala vakatabakidua. Na kena dina, oqo e dua na isausau dokai qai salavata mai kei na levu na ka ni veivakalougatataki. (Malakai 3:10) Ia ena gadrevi mo na vakasamataka sara vakavinaka.

Kena ivakaraitaki, mo taroga mada, ‘Na kila kei na taledi cava au sa kila rawa tu au na rawa ni vakayagataka me vukei au ena noqu veiqaravi vakaitalatala vakatabakidua?’

O Kelly, sa yabaki 27 ena gauna oqo, a tekia e dua na nona isausau ni se gone. E makare vinaka vua na nona isausau me na vakaitavi ena cakacaka vakaitalatala vakatabakidua. Ni sa itabagone, sa tekivu vakatulewa o Kelly “ena nona ilakolako” oya me baleta na cakacaka saumi. “Au na digia e dua na cakacaka me na vukei au ena noqu cakacaka vakaitalatala,” e kaya o koya.

A vulica o Kelly me ivukevuke ni dauveicavubati ena dua na porokaramu ni vuli ena koronivuli ni sekeneri. A qaqa sara mada ga ena dua na veisisivi a vakayacori e kea. Ia na ka e rawata oqori e sega ni guilecava kina na nona isausau. “Au vinakata ga meu cakacaka vakaitalatala vakatabakidua,” e tukuna o Kelly. “Na veika tale e so e ikarua ni ka vua.” Se marautaka voli ga o Kelly na cakacaka vakaitalatala vakatabakidua. “Au kila ni oqo na vakatulewa vinaka duadua au bau cakava,” e kaya.

Kerea na Veidusimaki

Kevaka o gade voli ena dua na vanua o vulagi kina, lakolako o na rairai kerea e dua me dusimaka vei iko na sala mo muria—veitalia sara mada ga ke tiko na nomu mape. E rawa tale ga mo cakava oqo ena nomu lalawa me baleta na gauna mai muri. Taroga na nodra nanuma na tani. E kaya na Vosa Vakaibalebale 20:18: “A ka e nakiti sa vakataudeitaki e na bose.” Io, o rau na nomu itubutubu e dua na ivurevure vinaka ni veidusimaki. Rawa tale ga mo kerea na nodra ivakasala na lotu Vakarisito matua vakayalo e laurai ena nodra bula na vuku vakalou. “Raica na nodra ivakaraitaki vinaka o ira na uabula ena ivavakoso o lewena se ena ivavakoso voleka,” e kaya o Roberto. “E rawa nira tukuna vei iko e so na ka o rairai sega sara ga ni bau vakasamataka.”

Sega tale ni dua e tautauvata kei na Kalou o Jiova ena nona vinakata me vukei iko me vinaka na nomu digidigi. Mo kerea nona veivuke, ena nomu ‘vaqara na ka e vinakata mo cakava’ me baleta nomu gauna mai muri. (Efeso 5:17, VV) Ke o nuitaki Jiova mai vu ni lomamu, “ena vakadodonutaka na nomui lakolako ko koya.”—Vosa Vakaibalebale 3:5, 6.

VAKASAMATAKA MADA

◼ Na kila kei na taledi cava au sa kila rawa tu?

◼ Na sala cava o nanuma e rawa ni vakayagataki kina na kila oqori me vakacaucautaki kina o Jiova?

◼ Na taba ni cakacaka vakaitalatala vakatabakidua cava e cavuti ena ulutaga oqo o taleitaka?

[Kato ena tabana e 23]

ITINITINI CA

Na iVolatabu e kaya: “Ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.” Na sala e rawati kina na vutuniyau e vaka na gaunisala e qaraqara! E rawa gona ni na tini ca ena dinau, nuiqawaqawa, kei na leqa vakayalo.​—1 Timoci 6:9, 10.

[Kato/​iYaloyalo ena tabana e 24, 25]

CAKACAKA VAKAPAINIA

E dua e painia e lotu Vakarisito papitaiso ivakaraitaki vinaka e tuvanaka me vakayagataka e 70 na aua ena veivula me vunautaka na itukutuku vinaka ni Matanitu ni Kalou. Ena vuli kei na veika e sotavi, e toroya cake na nodra kila na painia mera qasenivuli maqosa ni iVolatabu.

VEIQARAVI E PECELI

O ira na lewenivuvale e Peceli era veiqaravi ena valenivolavola ni tabana ni iVakadinadina i Jiova. Era veivuke ena kena vakarautaki, tabaki, kei na kena vakau yani ina veivanua na ivola era yavutaki ena iVolatabu. Na ilesilesi kece e Peceli e itavi dokai.

VEIQARAVI ENA VANUA E GADREVI VAKALEVU KINA NA CAKACAKA

E so na painia e rawa nira toki ina vanua e gadrevi vakalevu kina na dautukutuku ni Matanitu ni Kalou. So tale era vulica e dua tani tale na vosa ra qai lai veiqaravi e vanuatani se ena ivavakoso e vosataki kina na vosa era vulica.

VEIQARAVI E VANUATANI

O ira na dauveiqaravi raraba (international servants) era lako ina so tale na vanua mera veivuke ena tara Kingdom Hall kei na valenivolavola ni tabana. Oqo e cakacaka tabu, e vakatauvatani kei na nodra cakacaka na tara na valenisoro i Solomoni.​—1 Tui 8:13-18.

KORONIVULI NI VULI VEIQARAVI VAKAITALATALA

Na walu na macawa ni vuli, era vulica kina na qase kei ira na dauveiqaravi ni ivavakoso sega ni vakawati na veika e baleta na isoqosoqo kei na vosa e matanalevu. E so vei ira oqori era lesu tale i nodra vanua mera lai veiqaravi kina, so tale era ciqoma na ilesilesi mera lai veiqaravi e vanuatani.

DAUKAULOTU

O ira na painia era bulabula ra qai kaukaua, era vuli mera lai veiqaravi e vanuatani. E marautaki qai vakainaki na nodra bula na daukaulotu.

[Kato/​iYaloyalo ena tabana e 24]

AU NA VAKAYAGATAKA VAKACAVA NOQU BULA?

Na vidio, What Will I Do With My Life? (Au na Vakayagataka Vakacava Noqu Bula?) e vakarautaka na iVakadinadina i Jiova, era vakatarogi kina na itabagone mai Brazil, Jamani, Mereke kei Peritania. Sa na tu tale ga na porokaramu oqo ena vica tale na vosa.

[iYaloyalo ena tabana e 23]

“E vauci kina na nomu isausau.”​—Michael, e lewenivuvale e Peceli

[iYaloyalo ena tabana e 24]

“Na vakatulewa vinaka duadua au bau cakava.”​—Kelly, sa ono na yabaki nona painia voli

[iYaloyalo ena tabana e 25]

“Raici ira era ivakaraitaki vinaka.”​—Roberto, e lewenivuvale e Peceli