Sala me Lewai Vinaka Kina na Sara Retioyaloyalo
“NI WAQA rawa ga na retioyaloyalo, keitou sa na wanonova toka me keitou sarava na porokaramu kece ena vakaraitaki veitaravi mai kina. Ena qai boko ga ni keitou sa lai moce,” e kaya o Claudine. So era kaya: “Au sega ni lewa rawa na levu ni noqu matagagataka na retioyaloyalo.” E so tale era kaya, “Sega ni lomaqu me vaka sara tu oqo na levu ni noqu sara retioyaloyalo, ia au sa sega ni tarovi au rawa.” O dau sara retioyaloyalo vakalevu? O bau vakawa beka na kena cakayaco ena nomu vuvale? Raica mada e so na sala e koto oqo e rawa ni vukei iko mo lewa vinaka kina na nomu sara retioyaloyalo.
1. DIKEVA MADA NA LEVU NI KA O DAU SARAVA. “Na tamata yalomatua sa daulewa vakavinaka na nonai lakolako,” e kaya na Vosa Vakaibalebale 14:15. E ka vakayalomatua mo vakadeuca se vakaevei na levu ni ka o dau sarava kei na levu ni gauna o dau sarasara kina, mo rawa ni vakalewa se veiveisau cava mo cakava. Taumada, vakavola ena nomu ivolanisiga (diary) na levu ni gauna o sarasara kina ena loma ni dua na macawa vakacaca. Vola tale ga na porokaramu kece o dau sarava, na ka o vulica mai kina, kei na levu ni nomu taleitaka na veiporokaramu o sarava oqori. Ia, na tikina bibi ga, oya mo cakacakataka se vakacava na levu ni gauna e kania na nomu sara TV. Rairai o na kurabuitaka na kena levu. De dua, na nomu kila na levu ni gauna o vakayagataka wale tu ga ena sara retioyaloyalo ena uqeti iko mo cakava e so na veiveisau.
2. VAKALAILAITAKA NA GAUNA NI NOMU SARASARA. Tovolea mada mo kua ni sara retioyaloyalo ena dua taucoko na siga ena dua na macawa. Oti oqori, kua tu mada ni sarasara me dua na macawa, se dua taucoko na vula. Dua tale na vakatutu, oya mo yalana na levu ni gauna o sarasara kina ena loma ni dua na siga. Ke o vakalailaitaka mada ga ena veimama na aua na gauna o sara retioyaloyalo kina ena dua na siga, o na vakabula e 15 na aua e veivula. E rawa gona ni o vakayagataka na gauna oqori ena nomu cakava e so na cakacaka yaga me vaka na nomu vakaogai iko ena cakacaka vakayalo, wilika e dua na ivola vinaka, se nomu veimaliwai kei ratou na nomu vuvale se o ira na nomu itokani. Laurai tale ga ena vakadidike, nira marautaka cake na nodra sara retioyaloyalo o ira era sarava ga vakalekaleka, ni vakatauvatani kei ira era dau sarasara vakabalavu. E dua tale na sala e rawa ni vakalailaitaki kina na sara retioyaloyalo, oya me kua ni lai biu na TV ena rumunimoce. Tukuni ni o ira na gone e tiko ena nodra rumunimoce na retioyaloyalo, e levu cake ena dua veimama na aua na gauna ni nodra sarasara, ni veidutaitaki kei ira na gone e sega na retioyaloyalo ena nodra rumunimoce. Kuria oqo, era na sega ni kila na itubutubu se iyaloyalo cava e sarava tiko o gone ke tiko ena nona rumu na retioyaloyalo. Ia, e yaga tale ga vei ira na itubutubu se vei rau na veiwatini ke rau tokia tani mai na nodrau rumunimoce na retioyaloyalo, ni na levu kina na gauna me rau veimaliwai vakataki rau. E so gona era sa vakatulewataka me kua ni qai tiko e vale e dua na retioyaloyalo.
3. TUVANAKA NA POROKARAMU MO SARAVA. Io, e levu na porokaramu vivinaka e tu e rawa ni saravi. Ia, de vinaka mo kua ni qai lai vaqara toka ga ena mata ni retioyaloyalo na ka mo sarava ena nomu veitabayaka koto na ibulukau mo raica kina se porokaramu cava e vakaraitaki tiko. Kua tale ga ni sarava na porokaramu kece. Ena vinaka mo raica e liu na ka o na via sarava ena pepa e dau tabaki kina na yaca ni porokaramu kei na gauna e vakaraitaki kina. Ni o cakava oqo o na waqaca ga na retioyaloyalo ena gauna e tekivu kina na porokaramu o digia mo sarava, ni oti ga oya, sa rawa ni o bokoca tale. Dua tale na ka o rawa ni cakava, oya mo kua ni sarava na porokaramu o sa digitaka ena gauna e dau vakaraitaki kina, ia mo katona mo qai sarava vakamalua. Nomu cakava oqori o rawa kina ni qai sarava ena dua na gauna e veiganiti, o na vakabula gauna tale ga ke o kua ni sarava na itukutuku ni veivoli, mo sarava wale ga na iyaloyalo.
4. VAKALEWA VINAKA NA KA MO SARAVA. Sa parofisaitaka tu mai na iVolatabu ni na kilaitani na ivakarau ni bula ena gauna oqo ena nodra “na daulomani ira walega na tamata, era na dauvinakata nai lavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava, era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka, era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai.” Sega ni vakataratutu ni o na vakadinata ni oqo sara ga na roka ni nodra bula e levu era vakatasuasuataki tu ena retioyaloyalo. “Lako tani maivei ira era sa vakaoqo,” e vakadreti keda kina na iVolatabu. (2 Timoci 3:1-5) E vakarota tale ga meda ‘kakua ni vakaisini keda vakataki keda: sa vakacala na ivalavala vinaka na dautiko vata kei ira era sa ca.’—1 Korinica 15:33.
E macala ni noda vakalewa vinaka na ka meda sarava ena vinakati kina na noda lewai keda vakamatau. Vakacava, o sa bau sarava mada e dua na drama se iyaloyalo, e totolo ga na nomu siqema ni sega ni veiganiti, ia, o sa mani sarava ga vakaoti ena nomu via vakilakila na lewe ni italanoa? Levu sara era dau cakava oqori. Ia, ke tiko vei iko na kaukaua mo bokoca na retioyaloyalo mo rawa ni lai cakava e dua tale na ka, rairai o na sega wale ni kauaitaka na lewe ni italanoa oya.
Ni se bera sara ni buli na retioyaloyalo, a vola na daunisame: “Au na sega ni viritura e mataqu e dua na ka ca.” (Same 101:3) Oqo e dua na vakasama vinaka meda sauva, vakauasivi ena noda digia vakayalomatua na ka meda sarava! Eso me vakataki Claudine, era sa lewa mera sa kauta tani na nodra retioyaloyalo. Kaya o Claudine: “Au sega ni bau vakila na vakanunutaki tu ni noqu vakasama ena levu ni noqu sara retioyaloyalo. Nikua, niu donuya na sara TV, sa sagasaga vei au na veika au a sega ni sokonu kina e liu. Dina ga niu dau nanuma niu lewa vinaka na ka au sarava, au rawa ni kaya ni sega ni vaka kina. Ia, ena gauna oqo, niu sarava na veika vinaka, sa dua na ka na noqu taleitaka.”
[iYaloyalo ena tabana e 8]
Vakavola na levu ni gauna o sara retioyaloyalo kina
[iYaloyalo ena tabana e 8]
Sosomitaka na sara retioyaloyalo ena so na cakacaka yaga
[iYaloyalo ena tabana e 9]
Kua ni tu vakasuka na bokoca na retioyaloyalo!