Na Rai ni iVolatabu

Dau Vosota Beka na Kalou na Cala Bibi?

DUA na itovo uasivi ni Kalou na loloma. (Same 86:15) Ia, e vakacava sara mada na rabailevu ni nona loloma? Vola na daunisame: “Kevaka ko ni sa nanuma, Jiova, nai valavala ca o cei kemuni na Turaga, me na bula rawa? Ia sa tiko vei kemuni na loloma, mo ni vakarokorokotaki kina.” (Same 130:3, 4) Kaya e dua tale na tikina: “Me vaka na kena yawa na vanua e cadra kina na siga ki na vanua sa dromu kina na siga, sa vakayawataka vakakina vei keda ko koya na nodai valavala ca. Me vaka sa lomana na luvena e dua na tamata, sa lomani ira vakakina ko Jiova era sa rerevaki koya. Ni sa kila ko koya na nodai bulibuli; sa nanuma ga ni da sa kuvu-ni-soso.”​—Same 103:12-​14.

Macala ni sa bau uasivi dina na loloma i Jiova, e sega ni vakatikina nona vosoti keda, e kila vinaka tu na ka eda lekata kei na noda malumalumu nida “kuvu-ni-soso” ga. Da raica mada qo e so na ivakaraitaki ena iVolatabu e vakavotui kina na yalololoma ni Kalou.

A cakitaki Jisu vakatolu na yapositolo o Pita. (Marika 14:66-72) Ni se bera ni lotu vaKarisito na yapositolo o Paula a dau vakacacani ira na imuri i Jisu. E bau tokona tale ga nodra totogi mate e so nona imuri. Vakadonuya sara mada ga na nona vakamatei e dua vei ira. (Cakacaka 8:1, 3; 9:1, 2, 11; 26:10, 11; Kalatia 1:13) Nira bera ni mai lotu vaKarisito e so na lewe ni ivavakoso e Korinica, era dau mateni tu eliu, ra veivakacacani, ra qai dau butako. (1 Korinica 6:9-​11) Ia a qai vakadonui ira kece na Kalou. Cava beka e vosoti ira kina?

Tolu na iVakatagedegede me Lomani Keda Kina na Kalou

“Ka’u sa lomani, ni’u a kitaka e na lialia kei na tawa vakabauta,” e vola o Paula. (1 Timoci 1:13) Nona vakatusai koya qori o Paula, eda vulica kina na imatai ni ivakatagedegede me vosoti keda kina na Kalou, oya meda kua tale ni qai vakalecalecava na kilaka dodonu baleti Jiova kei na nona ivakatagedegede me vaka ra volai tu ena iVolatabu. (2 Timoci 3:16, 17) Kevaka eda sega ni kilai koya vinaka na Dauveibuli, eda na sega ni vakamarautaki koya. “Sai koya oqo na bula tawa mudu,” e kaya o Jisu ena nona masu vei Tamana, “me ra kilai kemuni na Kalou dina duadua ga, kei Jisu Karisito ko koya ko ni a tala mai.”​—Joni 17:3.

Na nodra mai kila gona na veika qori na yalomalumalumu, era veivutunitaka dina kina nodra caka cala, ra qai kere veivosoti mai vu ni lomadra. Qori na ikarua ni vakatagedegede me na vosoti keda kina na Kalou. Kaya na Cakacaka 3:19: “Mo dou qai veivutuni ka saumaki mai, me bokoci kina na nomudoui valavala ca.”

Tukuni tale ga ena tikina ya na ikatolu ni ivakatagedegede, oya meda saumaki. Kena ibalebale ga na noda biuta tani na noda itovo kei na ivakarau makawa, da qai bulataka na ivakatagedegede ni Kalou kei na nona rai. (Cakacaka 26:20) Ni dua e bulataka na ivalavala vou, e vakavotuya sara ga ni a vu dina mai lomana na nona cavuta, “Au kerea mo ni vosoti au.”

Vakaiyalayala ga Nona Dauveivosoti na Kalou

E so era valavala ca, ena sega ni vosoti ira na Kalou. Vola o Paula: “Sa sega tale ni qai dua na i soro me na kauta tani na i valavala ca kevaka eda sa nakita me da ia tiko ga na i valavala ca ni sa tukuni oti vei keda na ka dina. Ia na ka wale ga sa na qai vo sa i koya me da rerevaka na ka e na qai yaco; a ya na veilewai.” (Iperiu 10:26, 27, VV) Na malanivosa ‘ivalavala ca eda nakita’ e vakavotuya nona sega ni via veivutuni o koya e cakacala, e ca tale ga na ivakarau ni lomana.

A va sara ga qori na loma i Jutasa Isikarioti. E kaya o Jisu: “E vinaka cake vua na tamata ko ya me kua ga ni sucu mai.” (Maciu 26:24, 25, VV) E tukuna o Jisu baleti ira e so na iliuliu ni lotu ena nona gauna: “A tamamudou na Tevoro . . . Ni sa vosa lasu ko koya, sa vosataka na ka sa tu vua; ni sa daulasulasu ko koya, ka sa vu ni ka oqo.” (Joni 8:44) Na ka kece ga baleti ira e ca, me vakataki Setani ga. Era sega ni bau veivutunitaka na ka ra cakava, sa qai torocake ga nodra caka ca.a So mada ga na lotu vaKarisito dina era sikalutu ina ivalavala ca ena vuku ga ni malumalumu kei na nodra sega ni tamata uasivi, so na gauna ena ca sara na ka era cakava. Ia, sega ni kena ibalebale ni sa ca dina ga na ivakarau ni lomadra.​—Kalatia 6:1.

Loloma Tiko ga me Yacova na iVakataotioti

E sega ni raica wale ga o Jiova na ivalavala ca, ia e raica tale tiko ga na itovo nei koya e valavala ca tiko. (Aisea 1:16-19) Vakasamataki rau mada na turaga ivalavala ca rau a rube vata tu kei Jisu. Macala vinaka ni rau ivalavala ca bibi ruarua, ni vakatusa e dua vei rau: “Sa dodonu vei kedaru, ni sa saumi vei kedaru me vaka na nodarui valavala; ia na tamata oqo [Jisu], sa sega na ca sa kitaka.” Na ka e tukuna na turaga dau caka ca qori e vakaraitaka ni kila tiko e so na ka baleti Jisu. Na ka e kila qori e rairai veisautaka vakadua na nona itovo. Laurai qo ena ka e tukuna tarava ni kerei Jisu: “Nanumi au ni kemuni sa lako mai e na nomuni matanitu.” Cava e tukuna o Jisu ena kerekere ya? “Au sa kaya vakaidina vei iko edaru na tiko vata mai Parataisi.”​—Luke 23:41-​43.

Vakasamataka mada qori: Na iotioti ni ka e cavuta o Jisu e vakaraitaka nona lomani koya na turaga a sa dodonu ga me totogi mate. Sa bau veiuqeti dina! Da nuidei ga ni rau na lomani ira kece na veivutuni dina o Jisu Karisito kei na Tamana o Jiova, se mani vakacava sara na ca ni nodra ivalavala e liu.​—Roma 4:7.

[iVakamacala e ra]

BAU VAKASAMATAKA?

◼ O na vakamacalataka vakacava na loloma ni Kalou?​—Same 103:12-14; 130:3, 4.

◼ Na ivakatagedegede cava soti me muria e dua me vakadonui koya kina na Kalou?​—Joni 17:3; Cakacaka 3:19.

◼ Cava e yalataka o Jisu vua na turaga ivalavala ca rau a rube vata tu?​—Luke 23:43.

[iYaloyalo ena tabana e 27]

Vakaraitaka o Jisu ni rawa ni vosoti na ivalavala ca bibi