E Vinaka Beka na Dra Dikevi Oti e Sega Kina na Mate Rerevaki na HIV?

DAUVOLAVOLA NI YADRA! MAI NIGERIA

◼ E VEIVOSAKITAKI vakalevu e Nigeria na taro qori ni kune oti ga ena nona dra e dua na gone na manumanu somidi na human immunodeficiency virus (HIV). A soli vua na dra ena gauna e curu tu kina ena dua na valenibula kilai levu mai Nigeria.

E tukuna na dairekita ni valenibula, ni gauna ga e sucu kina o Eniola sa dromodromo kece tu na yagona kei na yalokanimatana. A soli dra o tama i Eniola me qaravi kina vakavuniwai o luvena. Ia e qai dikevi ni sega ni tautauvata nodrau dra, mani vakayagataki ga na dra e maroroi tu e valenibula. Sega ni dede sa kune vei gone na manumanu somidi na HIV, ia e sega ni tiko vei rau na nona itubutubu. E tukuni mai valenibula “ni sa vakadikevi oti na dra a soli vua, qai sega ni kune kina na manumanu somidi na HIV.”

Ia e tauvi koya ga vakacava? A vaqaqa qori na matanitu o Nigeria qai vakamacalataka ni a rairai dewavi koya ga ena dra e soli vua. E vola na niusiveva Nigerian Tribune: “O koya a soli dra e rairai se qai dewavi koya sara ga na HIV, baleta ni dau taura na gauna me qai kilai ni sa tiko vua e dua.”

Qo e dua wale ga na ivakaraitaki, ia e vakabibitaka ni rawa ni veivakaleqai na soli dra. E kaya na U.S. Centers for Disease Control and Prevention ni vakamacalataka tiko na kena dau taura na gauna me qai kilai ni sa tiko vua e dua na HIV: “E dau taura na gauna me bulia na sotia ni yago na antibodies ena vakavotuya ni sa tiko na mate qo, qai duidui tale ga na gauna ena vakavotui kina. E dau vakatokai qori me ‘window period,’ oya na kena taura na gauna me qai vakavotui ena nona dra e dua ni sa tiko kina na HIV. Levu e dau kunei ena nodra antibodies na HIV ni oti ga e 2 ina 8 na macawa (levu tale ena loma ni 25 na siga). Ia e tiko e so e dau dede sara me qai kune ena nodra antibodies. . . . E tu tu yadua me qai kune ni oti e 6 na vula.”

Koya gona ke sa mani vakadikevi na dra me kua ni tiko kina na HIV, e sega ni kena ibalebale qori ni sa vinaka. E veivakasalataki kina na San Francisco AIDS Foundation: “E dina ni dau taura na gauna me qai kidavi ni sa tauvi HIV tiko e dua, ia era se rawa tiko ga ni vakadewa vua e dua tale. E dau levu sara ga e vakadewa totolo ena gauna qori (vakalevu ni se qai takavi ira ga na HIV).”

Ia era vuli na iVakadinadina i Jiova mai na dua na gauna makawa sara ena veidusimaki ni iVolatabu me ‘tabu vei ira na dra.’ (Caka. 15:29) Na nodra taqomaki gona e vakabibitaka sara ga na kena vukutaki na muri ni veidusimaki ni Kalou. Ke oni via kila e so tale na ka me baleta na veiqaravi e sega ni vakayagataki kina na dra, raica na brochure How Can Blood Save Your Life?a

[iVakamacala e ra]