Ka ni Bolebole me Dua e Tamata Yaco

A rogo na goneyalewa qo ni se qai yabaki ruasagavulu vakacaca ena nona dau lagasere, lai vutuniyau sara kina. Sega ni levu e rogo se vutuniyau ena yabaki ni bula qori. Ia sa qai tekivu naulu sobu na nona bula. E veibiu vakarua, qai lai vakabulabula ena vanua era qaravi kina o ira na dau gunu alakaolo vakasivia kei na wainimate gaga. Sa qai ca ga vakalevu nona bula.

E KA ni rarawa ni sa takalevu tu nikua na italanoa e kune vua na goneyalewa qori; na kena dau kaburaki ena tabana ni itukutuku na veika me baleta na nodra bula na tamata rogo. Ena buturara mada ga ni bisinisi lelevu, o ira na dau nanumi tu nira sa tamata yaco era rawati ira, era dau vakila tale ga na ka ca. E kaya e dua na niusipepa me baleti ira na rawaka ena bisinisi ena korolevu e Niu Yoka: “[Na] nodra vaqara tubu lelevu ena veika vakailavo e vakaleqa nodra cakacaka, e kavoro kina nodra bula vakavuvale, ra qai vakasaqara na vakacegu ena wainimate gaga . . . So na dauvakacuru ilavo ena Wall Street era nanuma ni sa vakataudeitaki ira na levu ni tubu era sa rawata tiko, ia e so tale era vakacauoca nira vakatotogani mera rawaka, so e veilecayaki kina nodra bula.”

Era yaco beka na leqa qori ni sega ni donu tiko na nodra rai me baleta na rawati ni marau kei na nodra saga mera tamata yaco dina? Macala ga nida na gadreva na ilavo meda bula kina. Ia ena vakatau tiko beka ena noda binia vakalevu na ilavo meda qai tamata yaco kina? E kune ena vakadidike a vakayacori ni sega. Kena ivakaraitaki, e tukuni ena dua na vakadidike mai Jaina ni gauna e tubu kina na isau ena 250 na pasede, era sega ga ni lomavakacegu na tamata.

Koya gona, na nona tamata yaco e dua e sega ni vakatau ena nona cakacaka saumi, isau ni vale, motoka se kaloko e taukena tu. Ia ena laurai ga ena ivakarau ni nona bula, na ivakavuvuli e muria, kei na veika e vakabibitaka ena nona bula. Me kena ivakaraitaki, de na vuku se kaukaua e dua, ia e itovo dukadukali, sega ni dau loloma qai sega na nona itokani dina. E dua tale e tamata rogo qai vakaiyau, ia ni railesuva na nona bula ena taroga, ‘Na cava beka na inaki ni ka kece qo? Na cava na ibalebale ni noqu bula?’

E macala gona ni o ira na tamata yaco e tiko na ka era vakaliuca, okati kina na ivakavuvuli yaga era vakamuria. Era lomavakacegu kina, era sega ni beci ira, ra qai dokai tale ga. E vakainaki nodra bula, ra qai sega ni qara na ka me nodra ga, era lomavakacegu ra qai kila na kedra yaga. Era na rairai taroga e so, ‘Na ivakavuvuli cava mada qori?’ ‘Na cava era vakabibitaka?’ Eda na rawa ni sauma beka ga, se meda vakasaqara? Ena veivosakitaki qori ena ulutaga e tarava.

[Kato ena tabana e 3]

Na Rai Cala Me Baleta Na Tamata Yaco

E laurai ena vakadidike vakavuniwai, nira sa vakayagataka tiko na wainimate gaga e veivakaukauataki e levu na itabagone mera rogo kina ena buturara ni qito. E vakamacalataki ena Education Update ena internet: “Era tarogi na gonevuli ena koliji ena dua na vakadidike wale tiko ga qo: ‘Ke o kila ni o na qaqa se mo lewena e dua na timi ni o vakayagataka na wainimate gaga na steroid, ia o na tauvimate kina ni oti e lima na yabaki, o na vakayagataka tiko ga?,’ voleka nira vakadonuya kece. Ni veisautaki na taro me tukuni vei ira ‘ke ra kila tiko nira na mate ena loma ni lima na yabaki,’ e 65 na pasede era vakadonuya.”