Na Marau Dina

E uqeta na iVolatabu na rai donu me baleta na marau dina. E sega ni tukuni kina ni vica ga era rawa ni vakila na marau dina. E sega tale ga ni tokona na vakasama e dau kune ena ivola ni talanoa, ni na yaco na ka kece o dau vinakata ke o ‘muria ga na lomamu.’ Qori na ka era dau lasutaki kina na gone nira se lalai, ia e sega ni vu ni marau dina.

Eda rawa ni vakila kece na marau dina, ia ena vinakati kina na sasaga. Wilika mada e vica na ivakavuvuli qo.

• 

  KA E KAYA NA IVOLATABU:

  “O koya sa lomana na siliva ena sega ni mamau e na siliva; se ko koya sa lomana nai yau e na kenai kuri.”—Dauvunau 5:10.

  KENA IBALEBALE. Na domodomoiyau ena sega kina na bula vakacegu. Ena kauta ga mai na rarawa. E vola o Vuniwai Jean M. Twenge ena nona ivola na Generation Me: “O ira na dau vakaliuca na ilavo ena levu na nodra lomaocaoca kei na lomabibi ni vakatauvatani kei ira na vakamareqeta nodra veiwekani voleka kei na so tale.” E tomana: “Laurai ena levu na vakadidike ni sega ni rawa ni voli na marau, e sega ni bibi na ilavo meda bula vakacegu kina.”

  KA O RAWA NI CAKAVA. Tekia na isausau e yaga vakalevu mai na qarai ni iyau kei na taukeni ni ka. E kaya o Jisu: “Qarauni kemuni mai na ivakarau ni yalokocokoco kece, baleta na nona bula e dua ena sega ni vakatau ena levu ni ka e tu vua.”—Luke 12:15.

• 

  KA E KAYA NA IVOLATABU:

  “Sa liu na viavialevu, ia sa muri na rusa, a sa liu na yaloviavialevu ia sa muri na bale.”—Vosa Vakaibalebale 16:18.

  KENA IBALEBALE. Na via rogo kei na viavialevu ena sega ni vakilai kina na marau dina. E kaya na ivola na Good to Great ni o ira na iliuliu ni kabani era rawaka, “era dau yalomalumalumu, sega ni vakalevulevui ira, sega tale ga nira rogo. Ia ni vakatauvatani kei na so tale na kabani, o ira na kena iliuliu era dau vakalevulevui ira, vakavuna me sega ni toso vinaka na kabani se sogo sara ga.” Cava eda vulica kina? Dravusakulukulu me vakilai na marau dina ke dua e nanumi koya vakasivia, ena sega tale ga ni rawata na veika e sasagataka.

  KA O RAWA NI CAKAVA. Kua ni qara na rogo, saga mo dau yalomalumalumu. E kaya na iVolatabu: “Ke nanuma e dua ni sa bau dua na ka ni sega ga ni dua na ka, e vakaisini koya tiko.” Qori e sega ni rawati kina na marau dina!—Kalatia 6:3.

• 

  KA E KAYA NA IVOLATABU:

  “Sa sega tale na ka e vinaka vua na tamata . . . [me marautaka, NW] nona cakacaka.”—Dauvunau 2:24.

  KENA IBALEBALE. Ke o dei ena nomu ivakatagedegede ni cakacaka, o na marautaka na nomu cakacaka. E vola o Vuniwai Madeline Levine ena nona ivola Teach Your Children Well: “O na vakila na marau dina ni o maqosa ena ka o cakava baleta o sasaga vakaukaua kina qai salavata kei na nomu vosovoso.” Ke mani yaco vakavica na leqa, ena vinakati na vosovoso mo rawa ni toso tiko ga kina.

  KA O RAWA NI CAKAVA. Cakacaka vakaukaua mo kila vinaka nomu cakacaka, kua ni soro koso ke yaco eso na ituvaki dredre. Ke o vakaluveni, laiva mera walia nodra leqa na luvemu (me vakatau ena nodra yabaki kei na ka era rawa ni cakava). Kua ni yalototolo mo via walia nodra leqa. Ke ra tuberi na gone mera dau vosota, era na lomavakacegu ra qai yalomatua nira sa uabula.

• 

  KA E KAYA NA IVOLATABU:

  “Ni sa vinaka na koli sa bula ka ca na laioni sa mate.”—Dauvunau 9:4.

  KENA IBALEBALE. Kua ni vakaliuca ena nomu bula taucoko na cakacaka. O na vakila vakacava na marau dina ke o vakaitutu, qai sega ni vinaka nomu bula vakayago, ratou sega tale ga ni dokai iko nomu lewenivuvale? O ira na vakila na marau dina era saga mera dau cakacaka vinaka, era bulabula vakayago ra qai kauaitaki ira nodra lewenivuvale.

  KA O RAWA NI CAKAVA. Qarauna nomu bula. Dau vakacegu vinaka. Sega ni yaga mo bobula ina nomu cakacaka qai vakawalena nomu bula vakayago, nomu vuvale kei ira na nomu itokani—qori ena sega ni vakilai kina na marau dina.

• 

  KA E KAYA NA IVOLATABU

  “Era marau o ira na kila nira gadreva na Kalou.”—Maciu 5:3.

  KENA IBALEBALE. E vakilai na marau dina ena vulici ni iVolatabu kei na muri ni kena ivakavuvuli. E milioni na iVakadinadina i Jiova era sa vakadinadinataka ni gauna era vakaliuca kina na veika vakayalo, era sega ni lomaocaocataka vakalevu na veika vakayago.—Maciu 6:31-33.

  KA O RAWA NI CAKAVA. Vulica ena iVolatabu na sala mo vakila kina na marau dina. Me ikuri ni vakamacala, tarogi ira na iVakadinadina i Jiova se rai ena www.pr2711.com.