Na Rai ni iVolatabu

E iTotogi Beka ni Kalou na Leqa e Dau Yacovi Iko?

“E vaka au totogitaki,” e kaya e dua na marama sa yabaki 50 vakacaca ena gauna e kila kina ni tauvi kenisa. Ni nanuma lesu e dua na ka ca a cakava ena vica na yabaki sa oti, e tinia kina, “Qo na inaki ni Kalou vei au, niu a valavala ca.”

NIRA donuya na leqa, e levu era kaya ni totogitaki ira na Kalou ena vuku ni veika ca era a vakayacora. Ni yaco vakasauri qori, era na rairai kaya: “Na cava e yaco kina vei au? Na cava beka noqu cala?” Eda sa na tinia beka e ke ni noda leqa e vakaraitaka ni sega ni vakadonui keda na Kalou? Era itotogi beka ni Kalou na leqa kece e yacovi keda?

Yaco Tale ga na iTuvaki Dredre Vei Ira na Dausokalou Yalodina

Vakasamataka mada na veika e tukuna na iVolatabu me baleti Jope. A vakasauri ga nona vakayalia nona iyau. Oti oya, a vakamatei tale ga e tini na luvena ena covulaca. Sega ni dede sa tauvi koya e dua na mate vakasisila qai vakavuna nona malumalumu. (Jope 1:13-19; 2:7, 8) Na leqa qo e vakavuna me tagicaka o Jope: “Sa tarai au na liga ni Kalou.” (Jope 19:21) Me vakataki ira ga e levu nikua, a nanuma o Jope ni totogitaki koya na Kalou.

Ia, e vakamacalataka na iVolatabu ni bera nona vakatovolei o Jope, a tukuni koya na Kalou me “tamata yalododonu ka daucaka dodonu, ka sa rerevaka na Kalou, ka sega ni torova na ca.” (Jope 1:8) Ni vakaraitaka na Kalou nona vakadonui Jope, e matata kina ni leqa a yacovi Jope e sega ni totogi ni Kalou.

E volai tu ena iVolatabu e levu na italanoa me baleti ira na tamata yalododonu era dau sotava na leqa. Dina ni dauveiqaravi yalodina ni Kalou, a biu vakatawadodonu o Josefa me vica vata na yabaki e valeniveivesu. (Vakatekivu 39:10-20; 40:15) Na lotu vaKarisito yalodina o Timoci a tauvi koya e ‘levu na mate.’ (1 Timoci 5:23) A sega mada ga ni dua nona cala o Jisu Karisito, ia a vakacacani qai vakararawataki me yacova sara nona mate. (1 Pita 2:21-24) Koya gona, ena cala ke da tinia ni veika ca e yacovi keda e vakaraitaka nona sega ni taleitaki keda na Kalou. Ia ke sega ni vakavuna na Kalou na veika ca qo, o cei se cava e vakavuna tiko?

Na Vu ni Noda Leqa

E vakamacalataka na iVolatabu ni o Setani na Tevoro e vakavuna na leqa i Jope. (Jope 1:7-12; 2:3-8) Kena ikuri, e vakatakila ni o Setani e vakavuna tiko na noda leqa nikua, ni kaya: “Dou na ca koi kemudou sa tiko e vuravura kei na wasawasa: ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.” (Vakatakila 12:12) Ni “turaga ni vuravura qo” o Setani, e vagolei ira na tamata mera vakayacora na veika ca, e vakavuna na rarawa levu kei na mosi ni yalo.​—Joni 12:31; Same 37:12, 14.a

Koya gona, meda kua ni dau totolo ni beitaka na Tevoro ena veika ca kece eda sotava. Ena vu ni noda ivalavala ca kei na noda sega ni uasivi, eda na sega ni dau vakatulewa kina vakavinaka qai rawa ni vakaleqai keda sara. (Same 51:5; Roma 5:12) Me kena ivakaraitaki, vakasamataka mada e dua e vakatulewataka me kua ni kana vakavinaka se vakacegu vinaka. Ke qai tauvi koya e dua na mate bibi, e dodonu beka me beitaka na Tevoro? Sega, e tamusuka ga na vua ni nona vakatulewa ca. (Kalatia 6:7) Ena ituvaki qo, e dina kina na vosa vakaibalebale ena iVolatabu: “A lialia ni tamata sa sese kina na nonai valavala.”​—Vosa Vakaibalebale 19:3.

Kena ilutua, e dau sotavi na veika rarawa ni yaco na “gauna kei na veika tawanamaki.” (Dauvunau 9:11, NW) Vakasamataka mada ke dua e donuya vakasauri na draki ca. Ena vakatau ena vanua a duri tu kina ni tau na uca na kena suasua vakalailai se lubetu nona isulu. E vaka kina ena “gauna cacamatua, lewalewai dredre qo,” e so na ituvaki ca e yacovi keda e rawa ni lai tini sara me leqa lelevu. (2 Timoci 3:1-5, NW) Na kena dede, na gauna kei na ituvaki e yaco kina na veika qori eda na sega sara ga ni lewa rawa. Kena ibalebale beka qori ni na yacovi keda tu ga na leqa?

Vakarau Oti na Leqa Kece

E ka ni marau ni sa vakarau muduka na leqa kece eda donuya tiko qo na Kalou o Jiova. (Aisea 25:8; Vakatakila 1:3; 21:3, 4) Ena gauna mada ga qo, e vakaraitaka nona kauaitaki keda ena nona “vakatavulici” keda kei na noda ‘vakacegui mai na iVolatabu’ me rawa nida valuta kina na veivakatovolei ena gauna qo nida rai vakanamata ena veigauna totoka sa tu mai e liu. (Roma 15:4; 1 Pita 5:7) Ena gauna oya, era na marautaka o ira na yalododonu vua na Kalou na bula tawamudu ena vuravura vou, ra qai galala mai na leqa kece.​—Same 37:29, 37.

[iVakamacala e ra]

BAU VAKASAMATAKA?

◼ O ira beka ga na caka cala era na vakila na leqa?​—Jope 1:8.

◼ Me beitaki beka na Tevoro ena noda leqa?​—Kalatia 6:7.

◼ Ena oti beka na leqa?​—Vakatakila 21:3, 4.

[Tikina bibi ena tabana e 31]

Ni yaco na “gauna kei na veika tawanamaki.”​—Dauvunau 9:11, NW