Vakaukauataki Meda Vosota na Veivakatovolei

“Au rawata na ka kece ena vuku i koya e vakaukauataki au.”​—FPAI. 4:​13.

1. Na cava eda sotava kina e levu na leqa na dauveiqaravi i Jiova?

EDA dau sotava na dauveiqaravi i Jiova e levu na leqa. Eso e vu mai na noda ivalavala ca se vu mai na ivakarau ca ni bula eda donuya tu qo. Eso tale na leqa e vu mai na nodra cati keda o ira era sega ni qaravi Jiova. (Vkte. 3:​15) Ni se qai tekivu ga na bula ni kawatamata, sa vakaukauataki ira tiko na nona dauveiqaravi na Kalou mera tudei ena veivakacacani vakalotu, mera vorata na idre ni veimurimuri, ra qai vosota na leqa tale eso. E rawa ni vakaukauataki keda tale ga va qori na yalo tabu ni Kalou.

Vakaukauataki Meda Tudei ena Veivakacacani Vakalotu

2. Na cava na inaki ni veivakacacani vakalotu, na sala cava soti e caka kina na veivakacacani?

² Na veivakacacani vakalotu e vakaibalebaletaki ena kena nakiti mera vakararawataki eso se ra vakamavoataki ena vuku ni ka era vakabauta se na nodra ivakavuvuli. E kena inaki me yali vakadua na ka era vakabauta me kua kina ni tete, se ra vakamalumalumutaki o ira sa vakabauta rawa tiko. E duidui na sala e caka kina na veivakacacani, e vakadodonu ena so na gauna qai laurai levu, so tale na gauna e caka vaqaseqase. Na sasaga i Setani e vakatauvatani ena iVolatabu ena laioni kaukaua kei na gata loa.​—Wilika Same 91:13.

3. E rawa ni vakamacalataki vakacava na veivakacacani e vaka na laione kei na kena e vaka na gata loa?

³ Me vaka ga e dua na laione, e dau vakadodonu qai laurai levu na veivakacacani i Setani, qori ena ivalavala kaukaua, e vakavuna meda bala i valeniveivesu, se vakatabui na noda cakacaka. (Same 94:20) E talanoataki ena Yearbook ni vakayacori vei ira e levu na tacida nikua na ivalavala va qori. E levu na vanua era vakalolomataki ira na dauveiqaravi ni Kalou na ilawalawa e voravora na nodra itovo, so na gauna era liutaki ira sara ga qori na italatala se o ira na tokona na veika vakapolitiki. Na veivakacacani va qori e sa vakavuna na nodra muduka eso na nodra qaravi Jiova. Me vaka ga na gata loa, e sega ni dau laurai levu na nona ilawaki na Tevoro me vagaga na noda vakasama qai veivakacalai meda cakava na ka e vinakata. Na veivakacacani va qori e kena inaki me vakamalumalumutaki keda se vakadukadukalitaki keda vakayalo. Ia ena vakaukauataki keda na yalo tabu ni Kalou meda tudei ni yaco ruarua na mataqali veivakacacani qori.

4, 5. Na cava e sega ni ka vakayalomatua meda cakava me baleta na veivakacacani, na cava na vuna? Tukuna e dua na ivakaraitaki.

⁴ E sega ni ka vakayalomatua meda vakasamataka rawa tu na duidui ituvaki eda na rairai vakacacani kina ena veigauna se bera mai. Eda sega ni kila na veivakacacani eda na sotava, e sega gona ni yaga meda leqataka na veika ena rairai sega sara ga ni yaco. Ia e dua na ka eda rawa ni cakava. E levu era tudei nira vakacacani baleta nira dau vakananuma na nodra ivakaraitaki ni yalodina na dauveiqaravi i Jiova e volai tu ena iVolatabu, vaka kina na ivakavuvuli kei na ivakaraitaki i Jisu. E rawa gona nira vakatitobutaka kina na nodra lomani Jiova. Na loloma qori e uqeti ira mera vorata na veivakatovolei cava ga era sotava.

⁵ Raica mada na nodrau ivakaraitaki na tacida yalewa mai Malawi. Era mokulaki rau na ilala dauvakacaca, luva na nodrau isulu, rau qai vakarerei ni rau na kucuvi ke rau sega ni volia na ivakatakilakila ni isoqosoqo vakapolitiki. Era lasutaki rau na ilala dauvakacaca nira sa volia na ivakatakilakila vakapolitiki na lewe ni vuvale e Peceli. Na cava erau tukuna na tacida yalewa? “Keirau qarava duadua ga na Kalou o Jiova. Ke ra volia mada ga na lewe ni vuvale e Peceli na ivakatakilakila vakapolitiki, keirau sa dei toka ga ena neirau vakatulewa. Keirau na sega ni soro, ke keirau vakamatei mada ga!” Erau qai sere na tacida yalewa ni rau vakamacalataka oti ena yaloqaqa na ka erau vakabauta.

6, 7. E vakaukauataki ira vakacava na nona dauveiqaravi o Jiova nira vakacacani?

⁶ E raica na yapositolo o Paula nira “vakararawataki vakalevu” na lotu vaKarisito mai Cesalonaika, ia era ciqoma na ka dina “ena marau e vu mai na yalo tabu.” (1 Ces. 1:6) E levu na lotu vaKarisito ena veigauna sa oti vaka kina nikua era vakacacani ra qai tudei tu ga, era kaya ni gauna e kaukaua sara tu ga kina na nodra vakacacani era dau vakila na vakacegu, e dua na itovo e umani ena vua ni yalo tabu ni Kalou. (Kala. 5:​22) Na vakacegu oya e taqomaka na lomadra kei na nodra vakasama. Io, e vakayagataka o Jiova na nona igu me vakaukauataki ira kina na nona dauveiqaravi mera vosota na veivakatovolei ra qai vakatulewa vakavuku nira sotava na leqa.a

⁷ Era qoroqoro e levu nira raica na nodra dei na tacida mera yalodina tiko ga nira sotava mada ga na veivakacacani mosimosi. E vaka ga e soli vei ira na kaukaua mana levu, ia qori sara ga na ka a soli vei ira. E vakadeitaka vei keda na yapositolo o Pita: “Ke oni vakasewasewani ena yaca i Karisito, moni marau ni tiko vata kei kemuni na igu savasava ni Kalou kei na kena lagilagi.” (1 Pita 4:​14) Na noda vakacacani ena vuku ni ka e dodonu e vakaraitaka ni vakadonui keda na Kalou. (Maciu 5:​10-​12; Joni 15:20) Eda marau dina nida kila ni qori e ivakadinadina ni veivakalougatataki i Jiova!

Vakaukauataki Meda Vorata na iDre ni Veimurimuri

8. (a) Erau vorata vakacava na idre ni veimurimuri o Josua kei Kelepi? (b) Na cava eda vulica ena nodrau ivakaraitaki?

⁸ Na idre ni veimurimuri e dua na mataqali veivakacacani e sega ni laurai levu meda vorata na lotu vaKarisito. Ia na yalo i Jiova e kaukaua cake mai na yalo ni vuravura, eda rawa gona ni tudei tiko ga nira vakalialiai keda eso, ra vakaucacataki keda, se ra vakasaurarataki keda meda muria na nodra itovo. Dua na kena ivakaraitaki o Josua kei Kelepi, na cava erau sega ni duavata kina kei ratou na le tini na yamata vuni eratou a gole vata i Kenani? Erau muria na veidusimaki ni yalo tabu, mani duatani kina na ‘yalodrau’ se na nodrau ivakarau ni rai.​—Wilika Tiko Voli Mai na Lekutu 13:30; 14:​6-​10, 24.

9. Na cava eda sega kina ni rere ni vakaraitaka na lotu vaKarisito nida duatani?

⁹ A vakaukauataki ratou tale ga na yapositolo i Jisu na yalo tabu me ratou talairawarawa ga vua na Kalou, me kua vei ira na dau raici tu mera qasenivuli ni lotu dina. (Caka. 4:​21, 31; 5:​29, 32) E levu era nanuma mera vakamuria tu ga na veika era cakava eso tale me kua kina na veiba se veivala. Ia e vinakati ena levu na gauna meda dei tiko ga na lotu vaKarisito dina ena ka eda kila ni dodonu. Ia ni yaco qori, eda kalougata ni vakaukauataki keda na igu ni Kalou, eda sega kina ni rere ni vakaraitaka nida duatani. (2 Tim. 1:7) Meda raica mada e dua na ituvaki meda kua ni vakamalumalumu kina ena idre ni veimurimuri.

10. Na cava e rawa ni vakavuna mera veilecayaki eso na lotu vaKarisito?

¹⁰ Era dau veilecayaki eso na itabagone ni cakava na nodra itokani na ivalavala e sega ni vakaivolatabu. Era rairai nanuma ke ra kerea me vukei vakayalo o nodra itokani, ena sega ni nuitaki ira tale na nodra itokani oya. Era rairai vakasamataka ni qori e nodra ka lo ga vakaveitokani, ke ra tukuna e dua na ka ena nanumi nira sega ni yalodina vua na nodra itokani. Ena rawa ni vakaukauataki ira na nona itokani o koya e cala mera kua ni tukuna na ka e cakava. Ia era sega ni sotava ga na leqa va qori na itabagone. Ena rairai dredre tale ga vei ira eso na uabula mera lai tukuna vei ira na qase ni ivavakoso na nona cala e dua na nodra itokani se lewe ni vuvale. Ia na cava meda cakava na lotu vaKarisito dina ena ituvaki va qori?

11, 12. Na cava o rawa ni cakava ke tukuna vei iko e dua ena ivavakoso mo kua ni vakaraitaka na nona cala, na cava na vuna?

¹¹ Vakasamataka mada na ituvaki qo. Kaya mada e kila tiko o Eliki e dua na itabagone ena ivavakoso, ni dau sara iyaloyalo ca tiko o Sitiveni e dua na nona itokani ena ivavakoso. E tukuna vei Sitiveni o Eliki ni kauai vakalevu ena ka e cakava tiko. Ia e sega ni via rogoca oya o Sitiveni. Ni tukuna o Eliki me lai raici ratou na qase me baleta na nona leqa, e tukuna o Sitiveni vei Eliki ke nona itokani dina ena sega ni tukuni koya vei ratou na qase ni ivavakoso. Me leqataka beka o Eliki ni rau sa na sega ni veitokani tale kei Sitiveni? De vakasamataka o Eliki o cei eratou na vakabauta na qase ni ivavakoso ke cakitaka o Sitiveni na ka e tukuni ni cakava. Ia ena sega ni wali tale ga na leqa ke galuvaka toka ga o Eliki na ka e yaco. E rawa sara ga ni tagutuvi kina na nona veiwekani o Sitiveni kei Jiova. E vinaka me nanuma tiko o Eliki “na rerevaka na tamata sa da tacori kina: Ia ko koya sa vakararavi vei Jiova ena tiko vinaka.” (Vkai. 29:25) Na cava tale e rawa ni cakava o Eliki? E rawa ni lai raici Sitiveni me rau veitalanoataka vakavinaka na nona cala. Qori ena vinakati kina na yaloqaqa. Ia de dua sa na makutu o Sitiveni me rau veivosaki kei Eliki. Me kerei Sitiveni tale o Eliki me lai raici ratou na qase ni ivavakoso, me tukuna tale ga ni na solia vua na gauna me cakava qori, ke sega sa na lai raici ratou ga na qase ni ivavakoso o koya.​—Vunau 5:1.

¹² Ke o donuya na ituvaki va qori ena dua na gauna, ena rairai sega ni marautaka sara o nomu itokani na nomu via vukei koya. Ia ni toso na gauna, ena rairai liaca ni na yaga vua na nomu via vukei koya. Ke vukei o koya e cala qai ciqoma na veivuke e caka vua, ena rairai vakavinavinakataka tu ga na nomu yaloqaqa kei na nomu yalodina. Ena yasana adua ke cudruvi iko tiko ga, qori na itokani dina o vinakata? E ka vukutaki ga meda vakamarautaki Jiova na noda itokani vinaka duadua. Nida vakaliuci Jiova, eda na kunea eso tale na noda itokani dina era lomani koya, era dokai keda tale ga ena noda yalodina. Meda kua sara ni cakava e dua na ka ena ivavakoso meda soli keda vakarawarawa kina vua na Tevoro. Ke da cakava qori, eda na vakararawataka na yalo tabu i Jiova. Ia eda tokona na veidusimaki ni yalo tabu nida saga me savasava tiko ga na ivavakoso vaKarisito.​—Efeso 4:​27, 30.

Vakaukauataki Meda Vosota na Leqa Kece

13. Na leqa cava soti eda sotava tiko na dauveiqaravi i Jiova, na cava e sa rui levu kina na leqa va qori nikua?

¹³ E duidui na leqa eda dau sotava​—dredre ni bula vakailavo, vakacegui mai na cakacaka, leqa tubukoso, takali e dua na wekada lomani, tauvimate, kei na so tale. Nida donuya tu qo na gauna “dredre,” eda kila gona nida na sotava eso na leqa ena dua na gauna lekaleka ga qo se gauna se bera mai. (2 Tim. 3:1) Ni yaco qori, e bibi meda kua ni tavaiyaya. Ena vakaukauataki keda na yalo tabu meda vosota na leqa cava ga eda sotava.

14. A vakaukauataki vakacava o Jope me vosota na leqa a sotava?

¹⁴ A veitaravi na leqa a sotava o Jope. A kau tani na nona ivurevure ni ilavo, ratou mate na luvena, era biuti koya na nona itokani, a tauvimate bibi, a sega tale ga ni nuitaki Jiova o watina. (Jope 1:​13-​19; 2:​7-9) Ia a dauveivakacegui dina vei Jope o Ilaiu. Ena ka erau tukuna vei Jope o Ilaiu kei Jiova, e vakabibitaki kina: “Mo tu vakadua, ka vakanananu ki na cakacaka e veivakurabuitaki ni Kalou.” (Jope 37:14) A vosota vakacava o Jope na leqa a sotava? Eda na vosota vakacava na leqa eda sotava? Qori ena noda vakasamataka lesu da qai vakananuma na sala e dau vakayagataka kina o Jiova na yalona tabu kei na nona kaukaua. (Jope 38:​1-​41; 42:​1, 2) De dua eda sa vakadinadinataka oti ni kauaitaki keda yadua na Kalou. E se kauaitaki keda tiko ga o koya.

15. A vakaukauataki vakacava na yapositolo o Paula me vosota na veivakatovolei?

¹⁵ Ni vakatovolei na nona vakabauta na yapositolo o Paula, a vosota e levu na ituvaki a leqataki kina na nona bula. (2 Kor. 11:​23-​28) A rawa vakacava ni donu tiko ga na nona rai qai yalodei ena veivakatovolei a sotava? Ena nona vakararavi vei Jiova ena masu. A vola o Paula me baleta na gauna kece a vakatovolei kina me yacova sara na nona vakamatei: “E tokoni au na Turaga, e vakaukauataki au meu vakacavara sara noqu vunau mera rogoca na veimatanitu kece; au vakabulai tale ga mai na gusu ni laione.” (2 Tim. 4:​17) Ni sa vakadinadinataka oti ena veivakatovolei a sotava, a rawa ni vakadeitaka kina o Paula vei ira na nona itokani ena vakabauta mera kua ni “lomaocaocataka e dua na ka.”​—Wilika Filipai 4:​6, 7, 13.

16, 17. Tukuna e dua na ivakaraitaki ni nona vakaukauataki ira na nona dauveiqaravi nikua o Jiova mera vosota na veivakatovolei.

¹⁶ O Roxana e dua na painia sa vakadinadinataka tale ga na nona dau veikaroni o Jiova. A kerei nona boso ni cakacaka me taura e vica na nona siga ni gade me tiko kina ena soqo siga tolu, a cudru o nona boso qai tukuna ni na vakasakei koya ke lako. A mani lako ga o Roxana, qai masulaka vagumatua me kua ni vakasakei. A lomavakacegu ni masu oti. Me vaka ga sa tukuna oti na nona boso, a qai vakasakei koya dina ni lesu yani i cakacaka ena Moniti. A lomaleqa o Roxana, dina ni isau lailai ga na cakacaka oya, ia eratou sa bula rawa tiko kina na nona vuvale. A masu tale qai vakasamataka ni sa vakarautaka ena vukuna o Jiova na veika vakayalo ena soqo siga tolu, sega ni vakabekataki ni na vakarautaka tale ga na veika vakayago me bula kina. Ni taubale tiko i vale, a raica sara o Roxana ni volai tu ena dua na vanua ni vinakati eso era kenadau ena vakayagataki ni misini ni culacula ena kabani lelevu, mani kere cakacaka sara ekea. A raica o manidia ni sega ni kila o Roxana na vakayagataki ni misini, ia a vakadonuya ga na nona kerekere qai voleka ni vakaruataki na kena isau e liu. A vakila o Roxana ni sa saumi na nona masu. Ia na ka ni veivakalougatataki levu duadua, na nona tukuna na itukutuku vinaka vei ira eso na nona itokani vakacakacaka. Eratou ciqoma na ka dina ratou papitaiso sara e le lima, wili kina o manidia.

¹⁷ Eda na rairai nanuma ena so na gauna ni sega ni saumi na noda masu​—de dua e sega ni saumi totolo se saumi ena sala eda nanuma tiko. Ke dina qori, ena tiko na vuna vinaka. E sa kila rawa tu na vuna o Jiova, ia eda na qai rairai kila ni toso na gauna. Ia eda vakadeitaka ga ni Kalou ena sega ni biuti ira era yalodina vua.​—Iper. 6:​10.

Vakaukauataki Meda Tudei ena Veivakatovolei se Veitemaki

18, 19. (a) Na cava eda sega ni kurabui kina ni yaco na veivakatovolei kei na veitemaki? (b) O na rawa vakacava ni tudei ni o vakatovolei?

¹⁸ Eda sega ni kurabui na dauveiqaravi i Jiova ni yaco na veitemaki, veivakayalolailaitaki, veivakacacani, se na idre ni veimurimuri. E cati keda o vuravura. (Joni 15:​17-​19) Ia ena vakaukauataki keda na yalo tabu meda tudei nida sotava na ituvaki e vakalatilati ena noda qaravi Jiova. Ena sega ni vakalaiva o Jiova meda sotava na ka ni veivakatovolei eda na sega ni taqea rawa. (1 Kor. 10:13) Ena sega sara ni biuti keda se vakanadakui keda. (Iper. 13:5) Eda na taqomaki da qai vakaukauataki nida talairawarawa ena nona Vosa uqeti. Na yalo tabu ena uqeti ira tale ga na tacida vakayalo mera vukei keda ena gauna e gadrevi kina vakalevu.

¹⁹ Meda qara tiko mada ga na veidusimaki ni yalo tabu ena noda masu kei na noda vulica na iVolatabu. Meda ‘vakaukauataki tiko ga ena nona kaukaua levu na Kalou meda vosota kina na ka kece, meda vosota tale ga vakadede ena marau.’​—Kolo. 1:​11.

[iVakamacala e ra]

O na Sauma Vakacava?

• O na rawa vakacava ni tudei ni o vakacacani?

• Na cava mo cakava ke tukuna vei iko e dua mo kua ni tukuna na nona cala?

• Na cava mo vakadeitaka se mani leqa cava o sotava?

[iYaloyalo ena tabana e 28]

Na cava eda vulica ena nodrau ivakaraitaki o Josua kei Kelepi?

[iYaloyalo ena tabana e 29]

O na vukea vakacava na nomu itokani e cakava e dua na cala?