Ra Taroga na iTabagone

Meu Qara Beka Eso na iTokani Vinaka?

“Keu cudru, au na via vakaraitaka vua e dua. Keu lomabibi, au na vinakata me dua e tukuna vei au ni na vinaka cake na ituvaki. Keu marau, au vinakata meu na marautaka kei na dua. E bibi vei au o ira na noqu itokani.”​—Brittany.

E TUKUNI nira dau vinakata na gonelalai eso mera qito vata, ia o ira na itabaqase era vinakata na itokani. Na cava na kena duidui?

E dua drau dau qito vata e nomu ilala.

Na itokani ena duavata tale ga kei na nomu vakabauta.

Kena ikuri, e kaya na iVolatabu ni “sa loloma tiko e na veigauna kece na wekana [“itokani,” NW] na tamata, ka sa vaka na tacina e na gauna ni rarawa.” (Vosa Vakaibalebale 17:17) Qo e rairai vakamacalataka tiko e dua na veitokani dredre e sega ni kune ena rara ni qito!

Ka dina: Ni o tubu cake tiko mo tamatabula, e bibi na itokani era

(1) iTovo vinaka.

(2) Bulataka na ivakatagedegede ni iVolatabu.

(3) Uqeti iko mo caka vinaka.

Taro: O na kila vakacava ke dina qori me baleti ira nomu itokani? Meda dikeva yadudua mada.

iVakatakilakila #1 ni iTokani​—iTovo Vinaka

Na ka mo kila. E sega ni tamata kece e rawa nira itokani dina. E kaya na iVolatabu ni o koya e “vakaveiwekani tiko kei na lewe vuqa sa vakaveiwekani kei na rusa.” (Vosa Vakaibalebale 18:24) Ena rairai kaukaua tale na vosa qo. Ia vakasamataka mada: Sa bau dua beka nomu “itokani” e dau saga me rawaka vei iko? Vakacava na itokani a kaseti iko se tukuna na veika lasu me baleti iko? Ke o sotava na ituvaki qo, o na rairai sega tale ni nuitaki koya na itokani qori.a Nanuma ni bibi cake me vica ga nomu itokani vinaka, qai ca me levu nomu itokani ra sega ni vinaka!

Ka o rawa ni cakava. Digitaka na itokani era ivakaraitaki vinaka.

“Levu era dau tukuna na veika vinaka me baleta na noqu itokani, o Fiona. Au vinakata me tukuni tale ga na veika vinaka me baleti au. Au vinakata meu rogo vinaka me vakataki koya. Qo e dua na ka au qoroya.”​—Yvette, 17.

Tovolea mada qo.

1. Wilika na Kalatia 5:22, 23.

2. Tarogi iko, ‘Era dau vakaitovotaka beka noqu itokani na itovo e umani ena “vua ni Yalo Tabu”?’

3. Vola na yacadra na nomu itokani voleka. Qai vola e yasana na itovo era kilai kina.

Yaca iTovo

․․․․․ ․․․․․

․․․․․ ․․․․․

․․․․․ ․․․․․

iDusidusi: Ke kilai ga ena itovo ca, de sa kena gauna mo vaqara tale eso na itokani vinaka!

iVakatakilakila #2 ni iTokani​—Bulataka na iVakatagedegede ni iVolatabu

Na ka mo kila. Na nomu vinakata vakalevu na itokani, ena rawarawa nomu lai vakaitokani cala. E kaya na iVolatabu: “Ko koya era veitokani vata kei na lialia ena rusa.” (Vosa Vakaibalebale 13:20) Na “lialia” e sega ni kena ibalebale o ira na sega ni vuku. E vakamacalataki ira na vakanadakuya na idusidusi yaga, ra qai muria ga na sala ca​—mo kua ni vakailala kei ira na va qori!

Ka o rawa ni cakava. Mo kua ni vakailala kei na dua ga e taleitaki iko, vakalewa vinaka. (Same 26:4) Sega ni kena ibalebale qori ni o sa veivakaduiduitaki tiko. E kena ibalebale ga ni o rawa ni kila ni “sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.”​—Malakai 3:18.

E sega ni dau veivakaduiduitaki na Kalou, ia e dau vakalewai ira vinaka ga na mai ‘tiko ena nona vale.’ (Same 15:1-5) O rawa tale ga ni cakava qori. Ni o muria na ivakatagedegede ni Kalou, era na qai volekati iko o ira na muria tiko na ivakatagedegede qori. Qo sara ga o ira na itokani vinaka!

“Au vakavinavinaka ni rau vukei au na noqu itubutubu meu qara na itokani vinaka​—o ira keimami tabavata era toso vinaka vakayalo.”​—Christopher, yabaki 13.

Tovolea mada qo.

Sauma na taro qo:

◼ Niu tiko kei ira noqu itokani, au dau leqataka beka nira na uqeti au meu cakava na ka e cala?

□ Io □ Sega

◼ Dau dredre beka meu veikilaitaki ira noqu itokani vei rau noqu itubutubu, niu leqataka ni rau na sega ni vakadonui ira?

□ Io □ Sega

iDusidusi: Ke o sauma na io ena rua na taro qori, ena vinaka mo qara na itokani era muria na ivakatagedegede ni Kalou. Vakacava mo tekivu vei ira na qase toka vakalailai vei iko, ra qai ivakaraitaki vinaka ena bula vaKarisito?

iVakatakilakila #3 ni iTokani​—Uqeti Iko Mo Caka Vinaka

Na ka mo kila. E kaya na iVolatabu: “Na ilala ca e vakacacana na itovo vinaka.” (1 Korinica 15:33, NW) E kaya o Lauren, e dua na itabagone: “Era vakadonui au noqu icaba e koronivuli keu cakava na ka era tukuna. Au a galili voli, au mani nanuma meu vakamurimuri ira me rawa kina niu vakadonui.” A vakadinata o Lauren ni gauna o vakamurimuria kina nodra itovo eso tale, o vaka sara ga na ka e qitotaki tiko, nira lewa na vanua era via tosoi iko kina. E sega ni dodonu me caka qori vei iko!

Ka o rawa ni cakava. Tinia nomu veitokani kei ira era vinakata mo veisautaka nomu itovo, mo muria kina na nodra ivakarau ni bula. O na marautaka ke o cakava qo, ni o na rawa ni veitokani vinaka kina kei na so tale​—na itokani era na uqeti iko mo caka vinaka.​—Roma 12:2.

“E yalomatua na noqu itokani voleka o Clint qai dau vakatulewa vinaka, e dau uqeti au nona ivakaraitaki.”​—Jason, yabaki 21.

Tovolea mada qo.

Tarogi iko mada:

Au dau veisautaka beka noqu isulusulu, ivosavosa, se ivalavala meu vakamarautaki ira kina noqu itokani?

□ Io □ Sega

Au dau lako vata beka kei ira na noqu itokani ena so na vanua e sega ni dodonu meu tiko kina?

□ Io □ Sega

iDusidusi: Ke o sauma na io ena rua na taro qori, lai kere ivakasala vei rau nomu itubutubu se vua e dua na qase matua. Ke o dua na iVakadinadina i Jiova, o rawa tale ga ni kerea nona veidusimaki e dua na qase ni ivavakoso mo digitaka kina na itokani era na uqeti iko.

Levu na ulutaga e dau veivosakitaki ena “Young People Ask” e rawa ni kune ena Web site www.watchtower.org/​ype

[iVakamacala e ra]

ME VAKASAMATAKI

◼ Na itovo cava o na vinakata me vakaitovotaka na nomu itokani, na vuna?

◼ Na itovo cava mo vakavinakataka mo dua kina na itokani vinaka?

[Kato /​iYaloyalo ena tabana e 27]

NA KA ERA TUKUNA NOMU ICABA

“Ni rau yalana na noqu itubutubu noqu vakaitokani kei na so, au nanuma ni o ira ga qo na itokani au vinakata. Ia, a vinaka sara na nodrau ivakasala na noqu itubutubu, au vakasamataka vinaka qai raica ni levu tale tu na itokani era a vinaka cake.”​—Cole.

“Na cakacaka vakaitalatala e sala vinaka meu veikilai kina kei ira na lewe ni ivavakoso. Au veimaliwai kei ira na itabagone kei na itabaqase. Au vakayagataka noqu gauna kei ira era lomani Jiova.”​—Yvette.

“Au masuta me so noqu itokani, ia au liaca niu a sega ni cakava kina e dua na ka. Au mani vakaliuliu qai vosa vei ira eso ena soqoni vaKarisito. Sega ni  bera ni sa levu noqu itokani vou. Sa  sega tale niu dau galili.”​—Sam.

[Kato ena tabana e 18]

TOVOLEA MADA NA VAKATUTU QO

Veivosaki kei rau nomu itubutubu me baleta na vakaitokani. Tarogi rau me baleta na nodrau itokani ena gauna erau se tabavata kina kei iko. Erau veivutunitaka beka nodrau vakaitokani kei ira qori? Ke vaka kina, na vuna? Tarogi rau ena ka mo cakava mo levea kina na leqa erau a sotava.

Veikilaitaki ira nomu itokani vei rau nomu itubutubu. Ke o leqataka na cakava qo, taroga mada, ‘Na cava na vuna?’ Eso beka na ka me baleti ira nomu itokani rau na sega ni taleitaka nomu itubutubu? Ke vaka kina, de gadrevi mo digi ira vinaka nomu itokani.

[Kato ena tabana e 18]

TOLU NA SALA MO ITOKANI VINAKA KINA

◼ Dau vakarorogo. Dau kauaitaka na nona bula nomu itokani kei na ka e kauai kina.​—Filipai 2:4.

◼ Dau veivosoti. Kua ni namaka mera tamata uasivi. “E da sa cala kecega e na ka e vuqa.”​—Jemesa 3:2.

◼ Solia vei ira na galala. Sega ni gadrevi mo tiko vata kei ira ena veigauna kece. Era na dau vukei iko na itokani dina ena gauna o gadreva kina.​—Dauvunau 4:9, 10.

[iYaloyalo ena tabana e 16]

Ni o vakamurimuria nodra itovo tale eso, o vaka sara ga na ka e qitotaki tiko qo, nira lewa na vanua era via tosoi iko kina