WASE 8
Au na Kunea Vakacava na iTokani Vinaka?
“Niu cudru, au na via tukuna na lomaqu vua e dua. Keu rarawa, au dau vinakata e dua me vakacegui au. Keu marau, au na vinakata e dua me keirau marau vata. E bibi vei au o ira na noqu itokani.”—Brittany.
ERA dau vinakata na gone lalai eso mera qito vata, ia o ira na itabagone era vinakata na veitokani. Na cava na kedrau duidui?
Ni tukuni nodra qito vata na gone lalai, e kena ibalebale ga na nodra veimaliwai.
Na itokani e kena ibalebale e dua e tautauvata na ka drau vakaliuca.
E kaya na iVolatabu ni “itokani dina e loloma ena veigauna, e tacida ena gauna ni rarawa.” (Vosa Vakaibalebale 17:17) Kena ibalebale, qori na veitokani e veivolekati sara, e sega ni vaka na nodra veimaliwai tiko ga na gone ena nodra vanua ni qito!
Ka dina: Ni o tubu tiko, o na vinakata na itokani era
1. iTovo vinaka
2. Bulataka na ivakatagedegede ni iVolatabu
3. iVakaraitaki vinaka vei iko
Taro: O na kunea vakacava na itokani va qori? Meda dikeva yadua mada na itovo qori.
iVakatakilakila #1—iTovo Vinaka
Ka mo kila. E sega ni o ira kece na kaya nira nomu itokani, era itokani vinaka. Ni kaya mada ga na iVolatabu, e “tiko na itokani era via veivakaleqai.” (Vosa Vakaibalebale 18:24) De dua ena dredre me vakabauti qori. Ia vakasamataka mada: Sa bau dua nomu “itokani” e saga me vakayagataki iko me rawaka ga kina? Sa bau dua e kakasetaki iko se vakaucacataki iko? De dua o na sega sara ga ni via nuitaki koya tale.a Nanuma tiko ni vinaka cake me vica ga nomu itokani, mai na kena levu tu ra qai sega ni vinaka!
Ka o rawa ni cakava. Digia na itokani era ivakaraitaki vinaka.
“Levu era dau tukuna na veika vinaka me baleta na noqu itokani o Fiona. Au vinakata me tukuni tale ga na veika vinaka me baleti au. Meu taleitaki me vakataki koya. Qo e dua na ka au qoroya.”—Yvette, yabaki 17.
Tovolea mada qo.
1. Wilika na Kalatia 5:22, 23.
2. Mo taroga, ‘Era dau vakaitovotaka na noqu itokani na itovo e umani ena “vua ni yalo tabu”?’
3. Vola na yacadra na nomu itokani voleka. Qai vola e yasana na itovo era kilai kina.
Yaca
․․․․․
iTovo
․․․․․
iDusidusi: Ke kilai ga ena itovo ca, ena vinaka mo vaqara tale eso na itokani vinaka!
iVakatakilakila #2—Bulataka na iVakatagedegede ni iVolatabu
Ka mo kila. Ni o vinakata vakalevu mo vakaitokani, ena rawarawa sara mo veitokani kei ira na ilala cala. E kaya na iVolatabu: “O koya e vakailala kei ira na vuku ena vuku, ia o koya e veitokani kei ira na lialia ena tini ca.” (Vosa Vakaibalebale 13:20) Ni tukuni na “lialia,” qo sega ni o ira na malumalumu nodra ka ni vuli se nodra vakasama. E vakaibalebaletaki ira ga na sega ni via muria na ivakasala yaga, e sega ni vinaka na nodra itovo. Kua ni veitokani kei ira va qori!
Ka o rawa ni cakava. Mo kua ni veitokani tu ga yani vakaveitalia, ia mo digi ira vinaka nomu itokani. (Same 26:4) Sega ni tukuni mo veivakaduiduitaki. E kena ibalebale ga mo yalomatua, mo “raica . . . na kedrau duidui na tamata yalododonu kei na tamata ca, o koya e qarava na Kalou kei koya e sega ni qaravi koya.”—Malakai 3:18.
“Au vakavinavinakataki rau noqu itubutubu nodrau vukei au meu digia na itokani vinaka—keimami tabavata ga, ra qai toso vakayalo.”—Christopher, yabaki 13.
Sauma na taro qo:
Niu tiko vata kei ira noqu itokani, au dau leqataka de ra na vinakata meu cakava e dua na ka au kila ni cala?
□ Io
□ Sega
Vakacava au sega ni vinakata me rau kilai ira noqu itokani, o rau na noqu itubutubu de rau na sega ni taleitaki ira?
□ Io
□ Sega
Vakatutu: Ke o vakaio ena dua na taro qori, saga mo qarai ira na itokani era itovo vinaka. Era ivakaraitaki vinaka nira muria na ivakavuvuli vakaivolatabu.
iVakatakilakila #3—iVakaraitaki Vinaka
Ka mo kila. E kaya na iVolatabu: “Na ilala ca e vakacacana na itovo vinaka.” (1 Korinica 15:33, Today’s English Version) E kaya e dua na itabagone o Lauren: “Au na rawa ga ni veitokani kei ira au vuli vata keu cakava na ka era vinakata. Ni sega na noqu itokani, au sa cakava ga na ka era vinakata meu rawa ni taleitaki.” E qai kila o Lauren ni gauna eda rawai kina ena nodra itovo eso tale, eda sa vaka tiko e dua na iyaya ni qito era lewa eso tale na kena qitotaki. Ia e sega ni dodonu mera lewai iko va qori eso tale!
Ka o rawa ni cakava. Kua ni veitokani kei ira era saga mera veisautaka nomu itovo mo muria nodra ivakarau ni bula. De dua ena lailai nomu itokani, ia o na marau, ena rawa ni so tale nomu itokani era uqeti iko ena ka vinaka.—Roma 12:2.
E yalomatua qai dau veikauaitaki na noqu itokani voleka o Clint, e dau vakatulewa vinaka tale ga. E uqeti au nona ivakaraitaki.—Jason, yabaki 21.
Sauma na taro qo:
Au dau veisautaka noqu isulusulu, ivosavosa, se ivalavala meu vakamarautaki ira kina noqu itokani?
□ Io
□ Sega
Au dau lako vata kei ira na noqu itokani ena so na vanua e sega ni dodonu meu tiko kina?
□ Io
□ Sega
Vakatutu: Ke o vakaio ena rua na taro qori, kere ivakasala vei rau nomu itubutubu se dua na qase matua. Ke o dua na iVakadinadina i Jiova, o rawa tale ga ni kerea nona veivuke e dua na qase ni ivavakoso mo digitaka kina na itokani vinaka.
WILIKA ESO TALE NA KA ME BALETA NA ULUTAGA QO ENA ITABATABA 2, WASE 9
ENA WASE TARAVA
E uqeti iko nomu itokani se lomamu mo cakava na ka e sega ni dodonu? Raica na sala o rawa ni vorata kina qori!
[iVakamacala e ra]
a Eda dau cala kece. (Roma 3:23) Ke mositi iko gona e dua na ka e cakava nomu itokani ia e veivutunitaka, na cava mo nanuma tiko? E “ubia e levu na ivalavala ca na loloma.”—1 Pita 4:8.
TIKINIVOLATABU BIBI
“E tiko na itokani eda veivolekati sara, e yawa na tacida dina.”—Vosa Vakaibalebale 18:24.
VAKATUTU
Muria na ivakatagedegede e dodonu. Era na taleitaki iko kina e levu, era na muria tale ga na nomu ivakaraitaki. Era na nomu itokani vinaka!
O BAU KILA . . .?
E sega ni dau veivakaduiduitaki na Kalou. Ia e digia vinaka o ira me ‘vulagi ina nona valelaca.’—Same 15:1-5.
KA ME CAKA!
Meu kunea na itokani vinaka, au na ․․․․․
Au vinakata meu kilai ira eso era qase cake sara vei au me vakataki ․․․․․
Qo na ka au na via taroga vei rau noqu itubutubu me baleta na ulutaga qo ․․․․․
CAVA O NANUMA?
● Na itovo cava o taleitaka vei nomu itokani? Na vuna?
● Cava eso na veiveisau o na cakava mo itokani vinaka kina?
[Tikina bibi]
‘‘Ni rau uqeti au na noqu itubutubu meu kua ni vakailala kei ira eso na noqu itokani, au kaya ga, ‘O ira ga qo au dau taleitaka me keimami vakailala vata.’ Ia niu vakasamataka vinaka, au raica ni yaga vakalevu nodrau ivakasala na noqu itubutubu. E levu tale tu na itokani era vinaka sara.’’—Cole
[Kato]
Tovolea na Vakatutu Qo
Veivosakitaka kei rau nomu itubutubu na vakaitokani. Tarogi rau o cei na nodrau itokani ena gauna rau se itabagone kina. Vakacava rau veivutunitaka nodrau vakaitokani kei ira qori? Ke dina, tarogi rau cava na vuna e va kina ya. Tarogi rau na cava mo cakava mo kua ni sotava na leqa rau vakila.
Veikilaitaki ira nomu itokani vei rau nomu itubutubu. Ia ke o lomalomarua, tarogi iko, ‘Cava na vuna e va kina qo?’ O kila tiko e dua na ka me baleti ira nomu itokani rau na sega ni taleitaka nomu itubutubu? Ke dina qori, de dua ena ka vakavuku mo digia vinaka na nomu itokani.
Dau vakarorogo. Kauaitaka nona bula nomu itokani, kei na ka e kauai kina.—Filipai 2:4.
Dauveivosoti. Kua ni namaka nira uasivi. “Eda dau tarabe kece.”—Jemesa 3:2.
Solia vei ira na galala. Sega ni gadrevi mo tiko vata kei ira ena veigauna kece. Na itokani dina ena vukei iko ena gauna o gadreva kina.—Dauvunau 4:9, 10.
[iYaloyalo]
Nida rawai ena nodra itovo eso tale, eda sa vaka tiko e dua na iyaya ni qito era lewa eso tale na kena qitotaki.