Gonevuli Era Lomaocaoca Vakasivia

E DUA vei ira na dau liu tu ga ena nona kalasi o Jennifer, e yabaki 17. E vakaitavi ena levu tale na ka e dau caka ni suka na vuli, ra qai taleitaki koya na qasenivuli kei ira na daunivakasala ena nona koronivuli. Ia ni bera nona tuvaitutu ena yabaki tiko ga ya, sa dau tekivu mosi kaukaua na uluna qai dau lomaloma ca. E vakila ni vu ni nona tautauvimate oya ni lailai nona moce qai levu na gauna e vakayagataka ena nona ka ni vuli.

E levu era vakila na leqa vata ga qori. Sa qai toso cake tiko ga na iwiliwili ni gonevuli era dau lomaocaocataka vakasivia na nodra ka ni vuli, lai vakavuna mera qara ivakasala vei ira na vuniwai ni vakasama. Ni yaco na ituvaki qori mai Mereke, e tauyavutaka kina e dua na ilawalawa qasenivuli na porokaramu mera dusimaki kina na gonevuli era dau lomaocaoca vakasivia.”

Ke o gonevuli vakataki Jennifer, de dua o vakila tale tiko ga na leqa vata a sotava o koya. Se, ke o dua na itubutubu, o na rairai raica ni dau uqeti vakasivia na luvemu me rawaka e koronivuli. E tiko beka e dua na ivurevure nuitaki me dusimaki ira na itubutubu kei na gonevuli?