iBalebale ni Veivosoti

VEIKA DREDRE

Ni drau veiba vakaveiwatini drau na dui kauta cake tale mai eso na leqa sa dodonu me wali makawa. Na cava na vuna? Rairai e dua vei kemudrau se o kemudrau ruarua drau sega tiko ni kila na ibalebale dina ni veivosoti.

O rawa ni vulica. Meda raica mada na vuna e dredre kina vei rau na veiwatini me rau veivosoti.

VUNA E YACO KINA

Lewai watina. Era sega ni veivosoti eso na tagane kei na yalewa vakawati mera lewai watidra tiko ga kina. Ni basika na veileti erau na kauta cake tale mai na veika sa yaco oti me rau veivagalui kina.

Katona na ca. Ena taura toka na gauna me guilecavi na leqa sa yaco oti. Ena rairai tukuna o watimu ‘au sa vosoti iko,’ ia se yalocataka tiko ga na ka e yaco​—⁠de dua ena vinakata me sauma lesu.

Rarawa. Era vakabauta eso ni gauna era vakawati kina ena vinaka tu ga na ka kece, me vaka ga e dua na italanoa ni veidomoni e tini vinaka. Koya gona, ni dua na ka erau sega ni duavata kina erau na dui dre ga nodrau mua qai namaka me na veisau na rai nei watina. Ni sega ni yaco na ka e namaki ena vakavuna me rau vaqara cala qai dredre me rau veivosoti.

Nanuma cala. Levu na veiwatini era sega ni veivosoti ni cala nodra nanuma me baleta na veivosoti. Kena ivakaraitaki:

Keu veivosoti, au sa vakalailaina tiko na cala.

Keu veivosoti, meu guilecava na ka e yaco.

Keu veivosoti, sa na qai levu ga na leqa e muri.

Na ivakaraitaki qori e sega ni ibalebale ni veivosoti. Ena yasana adua, e sega dina ni rawarawa meda veivosoti​—⁠vakauasivi vua na tagane kei na yalewa vakawati.

KA O RAWA NI CAKAVA

Kila na ibalebale ni veivosoti. Ena so na gauna na vosa “veivosoti” ena iVolatabu e kena ibalebale “guilecava.” E sega ni kena ibalebale ni o sega ni kauaitaka se vakalailaina na cala. So na gauna e rawa ni kena ibalebale ga mo guilecava na ka e yaco, qo ena yaga vei iko kei na nomu bula vakawati.

Kila na ca ni sega ni veivosoti. Era tukuna eso na kenadau, na katoni ni ca e rawa ni yaco kina na lomabibi, tubunidra, e vakaleqa tale ga na bula vakawati. E tiko na vuna vinaka e kaya kina na iVolatabu: “Moni veilomani, ni veinanumi, ni yalorawarawa moni veivosoti.”​—⁠Efeso 4:⁠32.

Kila na yaga ni veivosoti. Ni o yalorawarawa mo veivosoti, drau na veinuitaki kina vakaveiwatini, drau na sega tale ga ni yaloca tiko ga. Ni drau cakava qori ena guilecavi kina na leqa sa wali oti, drau qai veilomani tiko ga.​—⁠iVakavuvuli vakaivolatabu: Kolosa 3:⁠13.

Donu nomu rai. Ni o sega ni kauaitaka tiko ga na malumalumu nei watimu ena rawarawa sara mo vosoti koya. E kaya na ivola Fighting for Your Marriage: “Ni o kauaitaka ga me yaco na ka o vinakata, o sa guilecava kina na ka vinaka o sa rawata. Na cava o na kauaitaka vakabibi ena nomu bula vakawati?” Mo nanuma tiko ni sega ni dua e uasivi​—⁠wili tale ga kina o iko.​—⁠iVakavuvuli vakaivolatabu: Jemesa 3:⁠2.

Yalorawarawa. Ke vakacudrui iko na ka e cakava o watimu se na ka e tukuna, ena vinaka mo taroga: ‘E bibi dina na ka e yaco ya? Au na vinakata me kere veivosoti, se sa rawa ga meu guilecava?’​—⁠iVakavuvuli vakaivolatabu: 1 Pita 4:⁠8.

Ke rawa, veivosakitaka na leqa. Mo vosa vakamalua ni o vakamacalataka na ka e vakacudrui iko kei na vuna e duatani kina na nomu rai. Kua ni veibeitaki se mo vakadonui iko ga, qori ena vakaiulubale ga kina o watimu. Ia mo vakamacalataka ga na vuna o rarawataka kina na ka e cakava.