4 Veivosoti

CAVA E OKATI KINA?

Na veivosoti oya na nomu vosota na cala e vakayacori vei iko, nomu sega ni cudruvaka se yalocataka na ka e caka vei iko. E sega ni kena ibalebale ni o vakadonuya na cala, o raica vakamamada se o vakalecalecava na ka e yaco.

IVAKAVUVULI VAKAIVOLATABU: “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.”​—Kolosa 3:13.

“O na raibaleta nona malumalumu e dua qai kauaitaka ga nona sasaga me dua na tagane se yalewa vinaka ke o lomani koya.”—Aaron.

VUNA E BIBI KINA NA VEIVOSOTI

Ke o dau yaloca, ena rawa ni vakaleqa nomu bula vakayago, rawa ni o beci iko, qai rawa sara ga ni vakaleqa nomu vakawati.

“A vakararawataki au dina o watiqu ena dua na gauna, qai kere veivosoti vei au. E taura toka na gauna meu qai vosoti koya. Au veivutunitaka noqu sega ni veivosoti totolo. Qori e ikuri tale ni leqa ena neirau vakawati.”—Julia.

KA O RAWA NI CAKAVA

ESO NA TARO MO VAKASAMATAKA

Ke vakararawataki iko tale ena dua na gauna o watimu ena ka e tukuna se cakava, e vinaka mo taroga:

• ‘Au dau kauaitaka tale vakasivia na ka e tukuni se caka vei au?’

• ‘E gadrevi dina me kere veivosoti vei au o watiqu, seu rawa ni guilecava ga na nona cala?’

VEIVOSAKITAKA KEI WATIMU

• Vakacava keirau dau veivosoti totolo se taura toka na gauna me keirau qai veivosovosoti?

• Na cava me keirau cakava me totolo kina neirau veivosoti?

VAKATUTU

• Ni o vakacudrui, kua ni nanuma ni nakicataki iko o kemu isa.

• Saga mo vosota na cala i watimu, nanuma tiko “eda dau tarabe kece.”—Jemesa 3:2.

“E rawarawa na veivosoti ke drau cala ruarua, e dau dredre qori ke cala ga e dua. O koya ga e yalomalumalumu dina ena veivosoti.”—Kimberly.

IVAKAVUVULI VAKAIVOLATABU: “Veiyaloni vakatotolo.”—Maciu 5:25.