Na Rai ni iVolatabu

E Rawa Beka Nida Lomani Ira na Keda Meca?

“Au kaya vei kemuni,” e tukuna o Jisu Karisito, “lomani ira tiko ga na kemuni meca, masulaki ira tale ga era vakacacani kemuni; me kilai kina ni oni luvei Tamamuni e tiko mai lomalagi, ni dau vakacabea na matanisiga vei ira na tamata ca kei na tamata vinaka, e vakatauca tale ga na uca vei ira na yalododonu kei ira na sega ni yalododonu.”​—Maciu 5:44, 45.

O NANUMA ni uqeta o lotu na veilomani kei na veisaututaki, se na veicati kei na itovo voravora? Levu nikua era nanuma na kena ikarua, vakabibi ni coko o lotu ena veika vakapolitiki, veivakaduiduitaki vakamatatamata, se boletaki vanua. Ia e laurai ena vosa i Jisu ni o ira era ‘luve ni Kalou’ era na vakatotomuria na nona loloma​—vei ira sara ga na kedra meca.

E dua tale na dauveiqaravi ni Kalou e tukuna: “Ke viakana na kemu meca, vakania, ke viagunu, vagunuva. . . . Me kua ni rawai iko na ca, mo rawa tiko ga na ca ena vinaka.” (Roma 12:20, 21) Ena rawati dina na loloma va ya ena vuravura talawasewase qo? E macala nira na sauma na taro qori na iVakadinadina i Jiova, ena io! Vakasamataka mada na ivakaraitaki i Jisu kei ira nona imuri taumada.

Era Lomana na Kedra Meca

E levu era taleitaka na vakarogoci Jisu ni vakavulica na veika me baleta na Kalou. Eso era tusaqati koya, so tale era cakava qori ena lecaika nira a sega ni rogoci koya. (Joni 7:12, 13; Cakacaka 2:36-38; 3:15, 17) Ia a tukuna tiko ga o Jisu vei ira na itukutuku ni veivakabulai, oka kina o ira nona meca. (Marika 12:13-34) Na vuna? De dua eso era na veisautaka na nodra ivalavala ena nodra kila ni o koya na Mesaia, ra qai muria na ka dina ena Vosa ni Kalou.​—Joni 7:1, 37-46; 17:17.

A lomani ira tiko ga na kena meca o Jisu ena bogi mada ga era vesuki koya kina e dua na ilala vakaiyaragi. E dua vei ira qori a taya na daligana o Pita, mani vakabulai koya tale o Jisu. A tukuna o Jisu e dua na ivakavuvuli bibi ena ka e yaco ya, me dusimaki ira nona imuri dina me yacova mai nikua. E kaya: “Nira na mate ena iseleiwau o ira era vakayagataka na iseleiwau.” (Maciu 26:48-52; Joni 18:10, 11) Rauta e 30 na yabaki tarava, a vola o Pita: “A vakararawataki o Karisito ena vukumuni, e qai laiva vei kemuni na ivakarau moni muria na weniyavana. . . . Ni vakararawataki e sega ni veivakarerei, ia e vakamalumalumu tiko ga vei koya [na Kalou].” (1 Pita 2:21, 23) A vulica kina o Pita ni loloma e nodra ivakarau na imuri dina i Karisito, sega ni veisausaumi.​—Maciu 5:9.

O ira kece era ‘muria na weniyava i Jisu’ era na vakatotomuria nona dau yalololoma kei na veikauaitaki. “E sega ni dodonu me veivala na bobula ni Turaga, me yalomalua ga vei ira kece, . . . me vosota tu ga ni sotava na ka ca,” e tukuna na 2 Timoci 2:24. Na itovo qori ena laurai ena nona bula na lotu vaKarisito, ni saga na veiyaloni kei na veivakaduavatataki.

Ra Veiyaloni na ‘Mata Nei Karisito’

A vola na yapositolo o Paula vei ira nona itokani ena vakabauta: “O keitou na mata, keitou matataki Karisito, . . . Ni keitou matataki Karisito keitou vakamasuti kemuni kina: ‘Moni mai duavata tale kei na Kalou.’” (2 Korinica 5:20) Era na sega gona ni siova o ira na mata ni dua tale na matanitu na veika vakapolitiki se na veika ni mataivalu ena vanua era veiqaravi kina. Era na tawaveitovaki tiko ga. E nodra itavi mera tokona se matataka ga na matanitu era kacivaka.

O ira tale ga na mata kei na italai i Karisito era kila ni Tui o Jisu, ra tokona na nona Matanitu vakalomalagi ena nodra vunautaka ena veidokai na itukutuku vinaka. (Maciu 24:14; Joni 18:36) A tukuna kina o Paula vei ira na lotu vaKarisito ena nona gauna: “E sega ni vakayago na neitou iyaragi ena ivalu qo, ia era iyaragi kaukaua ga e solia na Kalou, . . . me talaraka na nanuma cala kei na ka kece e vakacerecerei me sabaya na vuku ni Kalou.”​—2 Korinica 10:3-5; Efeso 6:13-20.

Ena gauna a vola kina o Paula na vosa ya, era vakacacani tiko na lotu vaKarisito ena levu na vanua. A rawa sara ga nira sauma na ka e caka vei ira, ia era lomani ira tiko ga na kedra meca ra qai wasea na itukutuku ni duavata vei ira era vakarorogo. E tukuna na ivola na Encyclopedia of Religion and War: “Era cata na ivalu ra qai sega ni curu ena mataivalu na imuri taumada i Jisu,” era kila ni ivalavala ya e “veicalati kei na ivakarau ni loloma i Jisu kei na ivakaro mo lomani ira na kemu meca.”a

Era kila tale ga na iVakadinadina i Jiova ni nodra Tui o Jisu, me vakataki ira ga na lotu vaKarisito taumada. Era kila ni o koya na Tui ni Matanitu ni Kalou, ena kauta mai na duavata kei na vakacegu tawamudu e vuravura. (Taniela 2:44; Maciu 6:9, 10) Era kacivaka na Matanitu cecere ya na mata kei ira na italai, era saga tale ga mera lewenivanua vinaka, era saumi ivakacavacava ra qai talairawarawa ina lawa e sega ni veicoqacoqa kei na lawa ni Kalou.​—Cakacaka 5:29; Roma 13:1, 7.

Me vakataki ira ga na lotu vaKarisito taumada, so na gauna era raici vakatani na iVakadinadina i Jiova, lasutaki na kedra itukutuku, ra qai vakacacani. Ia era sega ni sauma lesu. Era saga ga mera “veiyaloni kei ira na tamata kece,” de dua eso na dauveitusaqati era na mai “duavata kei na Kalou” ra qai marautaka na inuinui ni bula tawamudu.b​—Roma 12:18; Joni 17:3.

[iVakamacala e ra]

O DAU VAQAQA BEKA?

◼ Na cava mera cakava na lotu vaKarisito vei ira na kedra meca?​—Maciu 5:43-45; Roma 12:20, 21.

◼ Na cava a cakava o Jisu ni vakararawataki?​—1 Pita 2:21, 23.

◼ Na cava era sega ni vakaiyaragi kina vakayago na lotu vaKarisito taumada?​—2 Korinica 5:20; 10:3-5.