Na Ka Eda Vulica ena Veika Bula
“I Jiova, sa ka levu vakaidina na nomuni cakacaka! Ka sa caka vakavuku kecega.”—Same 104:24.
E LEVU era dau vakayagataka na vosa “veika bula” me dusia na itekitekivu ni veika buli kece. Me kena ivakaraitaki, e volai ena Scientific American ni Maji 2003: “Ena iubi kece ni yago e bulia na veika bula, na vuti ni manumanu e levu duadua na kena mataqali qai sega ni kilai kece na kena itukutuku ni vakatauvatani kei na kena vo.” E nanuma o koya e vola na ivakamacala ya ni dua ga na igu na veika bula, ia a tukuna ni igu ya e “bulia” na vuti ni manumanu. E rawa beka ni bulibuli na igu?
Na vosa “buli” e kena ibalebale na “lalawa e vakainaki.” (The New Oxford Dictionary of English) Ena tiko e dua e bulibuli. Me vaka ga nodra vakayacani na dau buli iyaya, e tiko tale ga na yacana na Dauveibuli e bulia na veika bula. O Jiova sara ga e bulia na veika bula era tu qo. E “Cecere sara duaduaga e vuravura taucoko” qai “bulia na ka kece.”—Same 83:18; Vakatakila 4:11.
Na cava eda vulica ena veika e buli? Na lesoni bibi duadua eda vulica, oya ni tukuni Jiova sara ga kei na nona itovo vakasakiti, wili kina nona vuku. “Tekivu mai na gauna a buli kina na vuravura e kilai na veika tawarairai me baleti koya, ya na nona kaukaua e sega ni vakaiyalayala, vaka kina ni o koya dina ga na Kalou, e kilai qori ena veika e buli.” (Roma 1:20) Ni laurai na veika bula, eda vulica kina ni cecere sara nona vuku na Kalou ni vakatauvatani kei keda. Ke vinaka vakaoti na veika e bulia o Jiova ni vakatauvatani kei ira na daubuli iyaya nikua, sega beka ni dusia ya ni vinaka cake nona ivakasala ni vakatauvatani kei ira na daunivakasala nikua?
E sega ni vakayagataka na veika bula na Kalou me veivakasalataki kina, ia e vakayagataka ga nona Vosa na iVolatabu. O na kunea kina na vuku vakalou. E tukuna na iVolatabu: “E vakavuna na Kalou na volai ni iVolatabu kece, e yaga.”—2 Timoci 3:16.
Ke o raica ni yaga nomu vulica na veika me baleti ira na daubuli iyaya, ia ena yaga sara vakalevu nomu vulica na veika me baleti koya na Dauveibuli. Me kena ivakaraitaki, o na rairai via kila na isau ni taro qo: Na cava eda rarawa kina da qai mate? Oya beka na inaki ni Kalou me baleti keda? Ke sega, na cava ga e vakatara tiko kina na rarawa?
Se ra vakadinadinataka se sega, e rawa ga nira buli iyaya na saenisi mai na veika era vulica ena ibulibuli i Jiova. E levu tale na ka o rawa ni vulica vua na Dauveibuli. Me kena ivakaraitaki, o na vulica na sala me dei kina na bula vakawati, nodra susugi vinaka na gone, na inaki ni Kalou me baleta na vuravura, kei na levu tale na ka ena vakainaki kina nomu bula. E idusidusi yaga sara ni nomu kila na Vosa ni Kalou, na ivola Na Cava Mada e Kaya na iVolatabu? tabaka na iVakadinadina i Jiova.