TORO VOLEKA VUA NA KALOU
“E Kilai na Veika Tawarairai me Baleti Koya”
O na vakadeitaka vakacava ni bula dina tiko na Kalou? E tu wavokiti keda e levu na ivakadinadina ni tiko e dua na Dauveibuli vuku, kaukaua, qai dauloloma. Na cava na ivakadinadina qori? Ena uqeti keda vakacava? Dikeva mada na ka a vola na yapositolo o Paula vei ira na lotu vaKarisito e Roma.
E tukuna: “Tekivu mai na gauna a buli kina na vuravura e kilai na veika tawarairai me baleti koya [Kalou], ya na nona kaukaua e sega ni vakaiyalayala, vaka kina ni o koya dina ga na Kalou, e kilai qori ena veika e buli, e sega kina na nodra iulubale.” (Roma 1:20) A vakamacalataka tiko o Paula ni veika buli e dusia ni bula dina na Dauveibuli. Meda dikeva vinaka mada na ka a tukuna qori.
E vakamacalataka ni kilai na itovo ni Kalou “mai na gauna a buli kina na vuravura.” Ena ikotokoto qo, na vosa vaKirisi “vuravura” e sega ni dusia na vuravura qele. E vakaibalebaletaka ga na kawatamata.a Koya gona, e tukuna o Paula ni laurai na itovo ni Kalou ena veika e bulia me tekivu mai na gauna e buli kina na kawatamata.
Na ibulibuli qori e “kilai” nira tu wavokiti keda, e sega ni vunitaki. Na veika buli kece e dusia ni tiko e dua na Dauveibuli, e laurai tale ga kina na nona itovo qoroi. Vakacava e vakaraitaka na vuku ni Kalou na vakasakiti ni veika e bulia? Vakacava na sausauriva ni kalokalo kei na vadugu ni ua e wasawasa, e dusia nona kaukaua? Vakacava na veimataqali kakana vakatitiweli, totoka ni kena cadra kei na dromu ni matanisiga, e vakaraitaka ni lomani keda na kawatamata?—Same 104:24; Aisea 40:26.
E matata sara tu ga na ivakadinadina qori. E “sega kina na nodra iulubale” o ira era via vakalecalecava kei ira na sega ni vakabauta na Kalou. E vakatauvatana va qo e dua na dauvakadidike: Kaya mada ke tiko e loma ni gaunisala na ivakatakilakila qo: “Sa sogo, gole ina imawi.” A vakalecalecava na ivakatakilakila qori e dua na draiva, mani tarovi koya na ovisa qai totogitaki vakailavo. A tukuna o draiva ni sega ni raica na ivakatakilakila. Qori e ulubale lokiloki ni laurai sara tu ga vakamatata na ivakatakilakila, sega tale ga ni leqa na matana. E dodonu me raica na ivakatakilakila kece ni gaunisala qai muria. E va tale ga qori na ivakadinadina ni bula dina na Kalou. Sa matata sara tu ga na kena “ivakatakilakila.” Nida nona ibulibuli uasivi, e sega kina noda iulubale meda vakalecalecava.
E vakadinadinataki ena ka era tu wavoliti keda ni tiko dina e dua na Dauveibuli. Ia na iVolatabu e vakamacalataka e levu sara na ka me baleti koya. Ni o wilika o na kila na isau ni taro bibi qo: Na cava na inaki ni Kalou me baleta na vuravura kei na kawatamata? Ena vukei iko na isau ni taro qori mo toro voleka vua na Kalou e “kilai na veika tawarairai me baleti koya” ena veika era tu wavoliti keda.
Wili iVolatabu e Vakatututaki ena Okosita
[iVakamacala e ra]
a E tukuna tale ga na iVolatabu ni valavala ca na “vuravura” qai vinakati e dua na ivakabula. Qori e dusia tiko na kawatamata sega ni vuravura qele.—Joni 1:29; 4:42; 12:47.
[Tikina bibi ena tabana e 11]
Na ka era tu wavoliti keda e dusia ni bula dina na Dauveibuli