Na Rai ni iVolatabu

Me Saumi na Veiqaravi Vakalotu?

E LEVU na vanua e saumi nodra veiqaravi na iliuliu ni lotu era kaya nira lotu vaKarisito kei ira era sega ni lotu vaKarisito. E okati ena veiqaravi qo na veipapitaisotaki, vakamau se veibulu. Na kena isau e rawa ni vica na drau se udolu vakacaca na dola.

Eso vei ira na iliuliu ni lotu qo e saumi ira na matanitu ena nodra vakaitavi ena so na soqo se nira cakava na nodra itavi vakaitalatala. De dua era taleitaka eso na nodra veiqaravi, e tiko tale ga na sausaumi ni lotu. Ia e vakadonuya na iVolatabu na saumi ni veiqaravi vakalotu se na nodra vakasaurarataki na lewenivanua mera sauma?

“Me Vale ni Veivoli”?

Ni se bula e vuravura o Jisu, era rawatubu na iliuliu ni lotu kei na so tale ena veisoqo vakalotu, vakabibi na Soqo ni Lakosivia. A vakadonuya o Jisu na veika era cakava qori? Sega! E tukuna na iVolatabu ni a “sova nodra ilavo na dauveisauilavo qai vakatoboicutaka na nodra teveli.” A kaya: “Ni kua ni vukica na vale i Tamaqu me vale ni veivoli!”​—Joni 2:14-16.

Na ituvaki vata ga qori a yaco ena nona gauna na parofita o Maika ena ikawalu ni senitiuri B.S.K. E tukuna na iVolatabu nira a “cata na lewadodonu” na iliuliu ni lotu e Isireli, ra qai “ia nai vakavuvuli me ra vakaivoli [“saumi,” NW] kina” na bete. Era tusanaka tale ga ni tokoni ira na Kalou, nira kaya: “Sa sega li ni tiko vata kei keda ko Jiova?” (Maika 3:9, 11) A sega ni tiko vata kei ira o Jiova se vakadonuya na ka era cakava. E vakasisilataka na veika era cakava qai vakamatatataka qori ena vukudra na nona parofita.

Era muria tale ga na iwalewale kocokoco qori e levu na iliuliu ni lotu nikua, era sa vukica gona na nodra vale ni sokalou “me vale ni veivoli.” E levu na isoqosoqo lotu era vakaitavi ena veika vakabisinisi, era rawatubu ena volitaki ni matakau kei na vuqa tale na iyaya e vakayagataki ena sokalou.a​—1 Joni 5:21.

“E Soli Wale Vei Kemudou, Dou Solia Wale Tale Ga”

Ni lesi ira nona yapositolo mera vunautaka na itukutuku vinaka, vakabulai ira na tauvimate, se vakaturi ira na mate, a tukuna o Jisu: “E soli wale vei kemudou, dou solia wale tale ga.” (Maciu 10:7, 8) Io, e sega ni dodonu me saumi na nodra veiqaravi na imuri dina i Jisu. A ivakaraitaki sara ga o Jisu ena nona veiqaravi wale qai sega ni saumi.

A muria tale ga na yapositolo o Paula na ivakaraitaki i Jisu ni a sega ni “saumi” ena nona cakacaka vakaitalatala. (1 Korinica 9:18) Ni gadreva na veivuke vakailavo, a dau nona cakacaka me cula valelaca. (Cakacaka 18:1-3) E rawa gona ni tukuna me baleti koya kei ira na nona itokani: “Keitou sega ni okata me ka ni rawa ilavo na vosa ni Kalou me vakataki ira e levu.” (2 Korinica 2:17) Ia ena rawati vakacava na ilavo ni veika e vauca na ivavakoso, me vaka na kena voli se redetaki e dua na vanua ni sokalou?

“Na Kalou e Taleitaki Koya e Solia na Ka ena Marau”

Era rawata na ilavo e gadrevi na iVakadinadina i Jiova ena cau. Era muria na ivakavuvuli qo: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e solia na ka ena marau.” (2 Korinica 9:7) Ya na vuna era sega ni lavaka kina na isau ni ivola se na veiqaravi vakalotu tale eso me vaka na papitaiso, vakamau se veibulu. E sega tale ga ni veisoliyaki na veleti ni soli ena nodra soqoni se solia na duanaikatini. O ira na via cau ena nodra cakacaka vakavunau e vuravura raraba, sa vakarautaki tu ena nodra vanua ni sokalou na kato ni cau, e sega ni kilai na levu ni nodra cau.

Era sauma rawa ena cau na iVakadinadina i Jiova e veiyasai vuravura nodra Kingdom Hall, Assembly Hall, valenivolavola ni tabana, valenitabaivola vaka kina na vakarautaki ni veivuke vei ira na vakaleqai ena leqa tubukoso. Eso vei ira era vaka na yada ena vosa vakatautauvata i Jisu ni lailai ga na ka era rawa ni solia. (Luke 21:2) Eso e levu na ka e rawa nira solia. Se mani vakacava na kena levu, o ira na muria na ivakavuvuli vakaivolatabu ena nodra cautaka na ka era rawata, era lomavakacegu, e vakalougatataka o Jiova na nodra sasaga ra qai vakila na marau dina.​—Cakacaka 20:35; 2 Korinica 8:12.

[iVakamacala e ra]

O BAU VAKASAMATAKA?

● Na cava a tukuna o Jisu vei ira na veivoli tiko ena valenisoro?​—Joni 2:14-16.

● A namaka na yapositolo lotu vaKarisito o Paula me saumi na nona veiqaravi vakalotu?​—2 Korinica 2:17.

● Na solika vakacava e taleitaka o Jiova?​—2 Korinica 9:7.

[Tikina bibi ena tabana e 23]

“Ni kua ni vukica na vale i Tamaqu me vale ni veivoli!”​—Joni 2:14-16