TORO VOLEKA VUA NA KALOU

“Na Kalou e Taleitaki Koya e Solia na ka ena Marau”

Na iloloma vakacava ena kilai kina ni o kauaitaki dina? E levu era na marautaka na iloloma e soli ena veinanumi sega ena voraki. Ni dua e solika, eda na kauaitaka na inaki e cakava kina, e bibi tale ga qori vua na Kalou. Dikeva mada na vosa uqeti a vola na yapositolo o Paula ena 2 Korinica 9:7.

Na cava e vola kina o Paula na vosa qori? A uqeti ira tiko na lotu vaKarisito mai Korinica mera tokona na cakacaka ni vakacoko me baleti ira na nodra itokani ena vakabauta mai Jutia era gadreva tu na veivuke. A vakasaurarataki ira tiko beka mai Korinica ena ka mera solia? Sega, e vola: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e solia na ka ena marau.” Meda dikeva vinaka mada na ivakaro qori.

“Na ka e vakadeitaka e lomana.” E tukuna o Paula, na lotu vaKarisito dina ena solia na ka e vakadeitaka e “lomana.” Ena kauaitaka tale ga vakabibi na veika era gadreva dina na nona itokani ena vakabauta. E kaya e dua na daunivuku ni vosa taumada e vakadewataki me “vakadeitaka,” e tiko kina “na vakasama ni nakinaki rawa e liu.” Ena vakasamataka vinaka gona na lotu vaKarisito na veika era gadreva na nona itokani era vakabauta vata kei na ka me cakava me vukei ira kina.​—1 Joni 3:17.

“Kua ni cakava ena voraki se vuturi.” E tukuna tiko o Paula vei ira na lotu vaKarisito dina mera kua ni solika ena voraki se nira vakasaurarataki. Na ivakadewa vaKirisi ni “voraki” e kena ibalebale ni “caka ena rarawa (se, lolosi).” E kaya e dua na ivola ni dua e solia na ka ena voraki, se lomalomarua “ena rarawa ni vakasamataka na ilavo sa solia.” O koya e vakasaurarataki me solika ena cakava qori ena vuturi. Sa macala tu ga nida na sega ni taleitaka na iloloma e soli ena lomalomarua se ni vakasaurarataki o koya e solia.

“Na Kalou e taleitaki koya e solia na ka ena marau.” O ira na lotu vaKarisito era via solika e tukuna na yapositolo o Paula mera cakava qori ena marau. Io, ena marau o koya e solika ena inaki vinaka. (Cakacaka 20:35) Ena sega ni kinoca na nona marau. Ena vakavotui na ka e tu e lomana, e laurai tale ga ena ka e solia. Eda taleitaka ni dua e solika ena marau. E marautaka tale ga qori na Kalou o Jiova. E tukuna na ivakadewa ni Ai Vola Tabu: “Ko koya sa solia e na marau sa vinakata na Kalou.”

Na vosa uqeti a vola o Paula e vakavulici ira na lotu vaKarisito ena ivakarau dodonu ni solika. Ke da mani vakayagataka noda gauna, igu, se da solia na noda iyau me baleti ira eso tale se o ira era gadreva dina na veivuke, meda cakava qori ena marau. Na solika va qori eda na marau kina, eda na talei tale ga vua na Kalou, ni o Jiova e “taleitaki koya e solia na ka ena marau.”

Wili iVolatabu e Vakatututaki ena Seviteba

1 kei na 2 Korinica

[Tikina bibi ena tabana e 13]

“Ko koya sa solia e na marau sa vinakata na Kalou”