E levu era sasaga vakaukaua e veisiga mera rawata na veika mera bula kina. Ia sa qai vakadredretaka ga qori na leqa e tarai vuravura tu nikua. Kena ivakaraitaki:
Ni yaco e levu na leqa e dau dredre na bula vakailavo, e rawa ni saulevu na kakana kei na vale.
Na dredre ni bula ena so na vanua, e levu e vakacegui mai na cakacaka se vakalailaitaki na kedra isau.
Na leqa tubukoso tale ga e vakaleqa na nodra bisinisi eso, na vale kei na veika era taukena. E vakavuna mera dravudravua kina e levu.
Ka Mo Kila
Ke o vakayagataka vakavuku na nomu ilavo, o na vakarautaki iko vinaka ni yaco na leqa.
Toso na gauna e rawa ni lailai na kemu isau, ilavo o maroroya kei na isau ni veika o taukena.
E tiko eso na ka e sega ni volia rawa na ilavo, me vaka na marau kei na duavata vakavuvale.
Ka o Rawa ni Cakava
E kaya na iVolatabu: “Ke sa tiko na kakana, na isulu, meda lomavakacegu ena veika qo.”—1 Timoci 6:8.
Na lomavakacegu, e kena ibalebale noda yalana na ka eda vinakata, da qai lomavakacegu ke sa tiko na ka eda gadreva meda bula kina e veisiga. E bibi sara ga qori ke lailai na ilavo o rawata.
Mo rawa ni lomavakacegu, ena vinakati mo bula rawarawa ga. O na vakila e levu na leqa ke o volia na ka o sega ni sauma rawa.