Vuna e Sega ni Veivakaduavatataki Kina o Lotu
NI TUKUNI ni o lotu ga e vakavuna tiko na veileti kece, kena ibalebale ena lailai na ivalu ke sega na lotu. E dina qori? Ena oti dina na ivalu ke kau laivi o lotu? Se mani o sauma vakacava na taro qori, dua na ka e macala vakasigalevu: E se sega ni vakaduavatataki keda o lotu. Meda veivosakitaka mada eso na vuna e dina kina qori.
Tawasei Keda na Lotu
E tawasei keda tu na kawatamata na lotu, qai sega ni oti rawa na nodra veiqati na lotu era kilai levu e vuravura. Era na rawa beka ni duavata ena dua na gauna na lotu Buda, Idu, Jiu, Musolomani kei na lotu vaKarisito?
Dua tale na ka e rarawataki me baleti ira na lotu kilai levu qori, oya ni laurai tiko mada ga kina na duiyaloyalo. Me kena ivakaraitaki, e tukuni vakacaca ni kakavidavida ni lotu ena veivanua vaKarisito e vakavuna me lai sivia kina na 30,000 na kena lotu. Era veileti tale tiko ga vakataki ira na Musolomani ena ka era vakabauta. Ena dua na tabana ni itukutuku mai na Tokalau e Loma, a tukuna kina ena dua na gauna lekaleka sa oti o Mohsen Hojjat e dua na dauvakadidike e Musolomani, ni “duiyaloyalo ena kedra maliwa na Musolomani e vu ni nodra sotava tiko na leqa.” Era sa basika tale ga na lotu ribatani nira sa talawasewase na lotu kilai levu tale eso me vaka na lotu Buda, Idu, kei na lotu vakaJiu.
Siova o Lotu na Veika Vakapolitiki
Kena irairai ni voleka ni ka kece e vakatulewataki me baleta na bula e veisiga e vakilai kina na veivakamuai nei lotu. E tukuni ena mekesini The Economist, “nira sa doudou tiko na daulotu mera tukuna na nodra nanuma ena vakatulewa era dau cakava, oka kina ena veika vakabisinisi. Sa vakilai tale ga ena nodra vakatulewa me baleta na veika vakailavo.” Qori e sega ni veivakaduavatataki, ia e vakavuna ga na veisei. Ia e dua na vanua e ca sara kina na nona veivakamuai o lotu, oya na nona siova voli mai ena dua na gauna balavu na veika vakapolitiki.
Ena vakadidike a vakamacalataki ena ulutaga sa oti, era raica kina na daunitukutuku makawa ena dua na gauna lekaleka sa oti “ni rawa ni vakavuna o lotu na ivalu ke rau cakacaka vata vakavoleka kei na matanitu.” E dua tale na ka e macala vakasigalevu e keri: Me yacova mai nikua, sa bukia toka o lotu e dua na isema kaukaua ena politiki kei na mataivalu.
Vakadomobula na ka e Rawa ni Yaco
Ena levu na vanua, e laurai ena lotu lelevu nira dui boletaka na nodra vanua kei na matatamata era cavutu mai kina. Sa rauta me sa tautauvata kece ga na veicati vakamatanitu, vakamatatamata, vakayavusa, kei na veimecaki vakalotu. Qori na ka kece ena sega ni vakaduavatataki keda.
E veicalati dina na nodra tukuna e levu na lotu nira qarava na Dauveibuli, na Kalou e vakamacalataki ena iVolatabu. Ia e ka vakayalomatua beka me vakabauti ni na tokoni ira na lotu era vakavuna tiko na veisei kei na vakadavedra na Dauveibuli e vuku qai yalololoma?
[iYaloyalo ena tabana e 6]
E udolu vakacaca na iVakadinadina i Jiova era bala i valeniveivesu nira tawaveitovaki