Na Kena iKalima​—Dou Veitokonitaka Vakavuvale

“Ko ira kece na yaloqaseqase era dauivalavala vakavuku.” (Vosa Vakaibalebale 13:16) Na nomu kila na itukutuku e vauca na nomudou bula ena yaga sara qai uqeti iko mo cakava na veisau e gadrevi me vinaka kina na nomudou bula vakavuvale.

◯ Vuli tiko ga. E levu na isoqosoqo e vakailavotaka na matanitu kei na kena e sega era dau tuvanaka na vuli, era tabaka tale ga na ivola e kovuta e levu na ulutaga me baleta na bula. Vakayagataka vinaka qori, vakasamataka tale ga na sala e rawa ni vakavinakataki kina na nomu bula o qai sega ni sotava kina na leqa. Me kua ni qiqo na nomu rai, qai yalorawarawa mo cakava na veisau e gadrevi.

Na ivakarau ni bula savasava o vulica qai vakaitovotaka ena yaga vei ira na luvemu kei ira na makubumu. Ena yaga vei ira na gone na nodra ivakaraitaki vinaka na itubutubu ena ka e vauca na kakana bulabula, tiko savasava, na moce, vakaukauayago, kei na tarovi ni mate.​—Vosa Vakaibalebale 22:6.

◯ Na cava tale e gadrevi? E bibi na veinanumi me rawa ni tekivu muri qai muri dei sara tiko na ivakarau eda na bulabula vinaka kina. Ena rairai gadrevi na sasaga me muduki kina eso na ka sa caka dede tu mai, ena rairai vinakati tale ga me vu sara ga mai lomada na noda cakava na veisau lalai mada ga. Eso era kila nira rawa ni tauvimate bibi se mate sara, ia era sega ga ni cakava na ka ena vinaka vei ira. Na cava ga ena veisautaka na nodra rai? Me vakataki keda kece, e bibi mera nanuma ni tiko e dua na inaki dina ni bula.

Ena vinakati mera bulabula tiko na veiwatini ra qai kaukaua mera veivukei tiko ga kina. Era vinakata na itubutubu mera tokoni ira tiko ga na luvedra, mera vakavulici ira tale ga. O ira na uabula ena vinakati mera qaravi ira na wekadra era sa qase. Eda vinakata tale ga meda yaga ena noda itikotiko, meda kua ni vakaogaoga vei ira tale eso. Qori e okati kece kina na noda dauloloma kei na noda veikauaitaki.

Ia me uqeti keda sara vakalevu na noda vakavinavinaka vua e buli keda kei na noda lomani koya. O ira era vakabauta na Kalou era vinakata mera vakamareqeta na nona isolisoli talei vei keda, oya na bula. (Same 36:9) Ke da bulabula vinaka, eda na rawa ni gugumatua ni qarava na Kalou. Qori na vuna levu duadua meda qarauna kina na noda bula.

[Tikina bibi ena tabana e 8]

Marautaka na yaga ni bulabula vinaka vakayago