SA VEILECAYAKI O VURAVURA

1 | Taqomaka Nomu Bula

NA VUNA?

E laurai ni veika dredre se leqa tubukoso eda sotava e rawa ni vakavuna na tauvimate.

E rawa ni vakavu lomaocaoca na veika dredre. Na lomaocaoca tale ga vakasivia e rawa ni vakavuna na tauvimate.
Na matedewa e dau vakadredretaka na veiqaravi e valenibula, e lailai tale ga kina na wainimate.
Na veika dredre e rawa ni vakaleqa noda bula vakailavo, e dredre kina meda volia na veika bibi me vaka na kakana kei na wainimate.

Ka Mo Kila

Na tauvimate kei na lomaocaoca e rawa ni vakavuna mo vakatulewa cala, o na sega ni qarauna kina nomu bula, rawa tale ga ni o tauvimate bibi.
Ke o sega ni qarauna nomu bula, ena rawa ni ca sara se o mate kina.
Nomu saga mo bulabula tiko ga, ena vinaka nomu vakatulewa ena gauna veilecayaki qo.
Ke o dravudravua se vutuniyau, o se rawa ni cakava eso na ka mo taqomaka kina nomu bula.

Ka o Rawa ni Cakava

Na tamata vuku e raica na leqa, qai cakava kina e dua na ka me taqomaki koya. Qori tale ga na ka o rawa ni cakava mo taqomaka nomu bula. O na sega ni tauvimate vakalevu ke o savasava tiko ga vakayago. E vinaka meda tataqomaki tu ga, kua ni yaco na leqa da qai vaqaqara.

“Keirau saga me keirau savasava tiko ga, me savasava tale ga na neirau vale. E sega ni lusi kina neirau ilavo me keirau lai raici vuniwai, se voli wainimate.”—Andreas.a

a Sa veisau eso na yaca ena mekesini qo.

O NA VOSOTA VAKACAVA?—Vakatutu Yaga

Ena gauna veilecayaki qo, taqomaka nomu bula ni o muria e vica na vakatutu yaga qo

MO DAU SAVASAVA VAKAYAGO

Mo dau savasava vakayago

E kaya na iVolatabu: “O koya e yalomatua e raica na ca qai vunitaki koya.” (Vosa Vakaibalebale 22:3) Saga mo kila qai qarauna na veika e rawa ni vakaleqa na nomu bula.

Savata vinaka na ligamu ena sovu kei na wai ni bera ni o tara na kakana, se ni o vakayagataka oti na valelailai.
Samaka vinaka nomu vale qai vakayagataka na wainimate me vakamatea na manumanu somidi, vakabibi na iyaya se vanua e tarai vakalevu.
Ke rawa, mo yawaki ira na tauvi matedewa.

KANIA NA KAKANA BULABULA

Kania na kakana bulabula

E kaya na iVolatabu: “E sega ni dua . . . e cata na yagona, ia ena vakania qai karona.” (Efeso 5:29) Eda karona na yagoda nida qarauna na ka eda kania.

Gunu wai vakalevu.
Kania na veimataqali vuanikau kei na kakana draudrau.
Kania vakalailai na masima, suka kei na kakana uro.
Kua ni vakatavako, gunu vakasivia se vakayagataka na wainimate gaga.

“Me rawa ni keirau bulabula tiko ga, keirau dau kania na kakana bulabula. Ke sega, ena rawa ni levu na ilavo keirau vakayagataka me keirau laurai kina vakavuniwai. E vinaka cake me keirau volia na kakana bulabula.”—Carlos.

VAKAUKAUAYAGO QAI VAKACEGU VINAKA

Vakaukauayago

E kaya na iVolatabu: “E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.” (Dauvunau 4:6) E dodonu meda veiraurautaka na noda cakacaka, me rawa nida vakacegu vinaka tale ga.

Dau vakaukauayago. Rawa ni o cakava qori ni o taubale. Ke o itabaqase mada ga, tautauvimate se vakaleqai na yagomu, ena rawa ni o bulabula tiko ga ke o vakaukauayago.
Vakacegu vinaka

Mo dau vakacegu vinaka. Ke o sega ni dau moce vinaka, o na rawa ni lomaocaoca vakalevu qai sega ni dei na nomu vakasama. Toso na gauna, o na rawa ni tauvimate bibi.
Digia na gauna mo moce kina, qai saga mo moce ena gauna qori. Tovolea me dua tiko ga na gauna mo moce qai yadra kina e veisiga.
Kua ni sara tivi se vakayagataka na iyaya vakalivaliva ni o davo tiko.
Ni bera ni o moce, kua ni kana vakasivia se gunuva na ka e tiko kina na caffeine se alakaolo.

“Dau ca sara ga noqu bula niu sega ni moce vinaka. Ena mosi na uluqu qai momosi na yagoqu. Ia niu moce vinaka, au bulabula qai qarava e levu na itavi. Au sega ni oca, se tauvimate vakalevu.”—Justin.