Bula Vakayago

TAQOMAKA NA YAGOMU

IVAKAVUVULI VAKAIVOLATABU: “E sega ni dua na tagane e cata na yagona, ia ena vakania.” —Efeso 5:29.

KENA IBALEBALE: Na ivakavuvuli vakaivolatabu qori e uqeti keda meda qarauna noda bula vakayago. E laurai ena dua na vakadidike, ni levu na mate e vu mai na noda ivakarau ni bula. Noda bulabula gona vakayago ena vakatau tiko ga ena ivakarau ni bula eda digia.

KA O RAWA NI CAKAVA:

• Kakana. Kania na kakana bulabula qai gunu wai vakalevu.

• Vakaukauayago. Keda qase se gone, malumalumu vakayago se tautauvimate, na vakaukauayago eda na bulabula kina. Era na rairai soli vakasama na wekada se o ira na dauveivakasalataki ena ituvatuva ni vakaukauayago, ia ena vakatau na kena yaga ena noda muria!

• Moce Vinaka. Na lailai ni moce e vakavuna na tauvimate bibi. E levu e lailai nodra gauna ni moce nira cakava tiko eso tale na ka. Ia o na marautaka nomu bula ni o moce vinaka.

TAQOMAKI IKO ENA IVAKARAU NI BULA E VEIVAKALEQAI

IVAKAVUVULI VAKAIVOLATABU: “Meda vakasavasavataki keda mai na dukadukali kece vakayago kei na dukadukali vakayalo.”—2 Korinica 7:1.

KENA IBALEBALE: Eda na bulabula vinaka ke da kua ni vakayagataka na veika e vakavuna na tauvimate kei na mate, me vaka na tavako.

KA O RAWA NI CAKAVA: Digia e dua na tikinisiga mo tinia kina nomu vakatavako. Ni vo e dua na siga, saga mo kauta laivi na tavako kece, ibiubiu ni kavuru, kena masese kei na iyaya tale eso e vakayagataki ena vakatavako. Kua ni goleva na vanua o na temaki tale kina. Tukuna vei ira nomu itokani na ka o vakatulewataka.

ESO TALE NA IVAKAVUVULI VAKAIVOLATABU

MO QAQARAUNI.

“Ke o tara e dua na vale vou, mo cakava tale ga na bai ni nomu delanivale, me kua ni beitaki na nomu vale ena vakadavedra ni lutu mai kina e dua.”​—VAKARUA 22:8.

LEWA VINAKA NOMU CUDRU.

“O koya e berabera ni cudru e yalomatua vakalevu, ia o koya e yalototolo e vakaraitaka na nona lialia.”​—VOSA VAKAIBALEBALE 14:29.

KUA NI KANA SIVIA.

‘Mo kua ni maliwai ira na kana vakasivia.’​—VOSA VAKAIBALEBALE 23:20.