Cakava na ka e Gadrevi mo Bula Vinaka Kina

O SE nanumi Ram tiko, e vakamacalataki ena imatai ni ulutaga? Me vakataki ira e levu tale e veiyasa i vuravura, a sega ni liaca o Ram ni bibi ena noda bula vinaka na noda kana vinaka kei na so tale na ka e gadrevi me caka e veisiga. E tukuna o Ram: “Au kila rawa ena ulutaga ‘Nutritious Foods Within Your Reach’ ena Awake! (8 Me, 2002, tabaki ena vosa vakavalagi) na vuna meda kauaitaka kina na ka eda kania.”

E tomana: “Keitou saga vakavuvale me keitou muria na ka e vakamacalataki ena ulutaga oya. Ni toso na gauna, keitou liaca ni sa kaukaua na sotia ni yago e dau valuta na mate. Keitou dau tauvi matetaka e liu ni keitou se sega ni kauaitaka na ka keitou kania, ia qo keitou sa sega soti ni tauvimate. Keitou vulica tale ga na sala rawarawa me savasava kina na meitou wainigunu, me keitou kua tale ga ni vakasabusabutaka. Keitou kila rawa qori ena ulutaga ‘Six Ways to Safeguard Your Health’ ena Awake!”​—22 Seviteba, 2003.

“E yaga tale ga ena neitou bula vinaka vakavuvale na ulutaga ena Awake!, ‘Soap​—A “Do-It-Yourself Vaccine,”’ ena itabataba ni 22 Noveba, 2003. Keitou wilika oti ga na vakatutu ena ulutaga oya, keitou tovolea sara. Sa sega ni tauvi keitou ena gauna qo na mate ni mata.

“O ira era tiko tikivi keitou era sega ni dau kauaitaka na kena sosovi lago kei na namu na itikotiko. Ia keitou vulica vakavuvale ena vidio The Bible​—Its Power in Your Life,a ni dodonu meda yawaki ira na manumanu lalai va qori. Na neitou kila qori e yaga sara ga ena neitou bula vinaka tiko ga.”

Kua ni soro! Ke gadrevi me caka eso na veisau, ena rawa vinaka na nomu sasaga ke o cakava vakamalua o qai sega ni tekia na isausau o na sega ni sauva rawa. Kena ivakaraitaki, vakalailaitaka na kakana e sega soti ni bulabula, sega ni tukuni mo sa kua sara ga ni kania. Tovolea mo kua ni dau yadra sivia, vakalevutaka tale ga vakalailai na nomu gauna ni vakaukauayago. E vinaka cake na nomu cakava e dua na ka mai na nomu sega sara ga ni cakava e dua na ka. Na nomu vakamatauni iko ena dua na ka vou ena taura na gauna​—vakamacawa se vakavula. Kua ni soro ke o sega ni vakila totolo na yaga ni nomu sasaga. Ke o sasaga tiko ga ni o sotava mada ga eso na ka dredre, o na rawa ga ni bula vinaka.

Nida ivalavala ca tiko ga ena gauna qo, ena sega gona ni rawa me bula uasivi e dua. Nida tauvimate, sega ni kena ibalebale oya nida vakawalena na noda bula, ia na ivalavala ca ga eda sucukaya mai e vakavuna na tauvimate. Meda kua gona ni nuiqawaqawataka se lomaocaocataka vakasivia na noda sega ni bula vinaka ena so na gauna. A taroga o Jisu: “O cei vei kemudou ena vuku ni nona lomaocaoca e rawa ni vakadedetaka tale vakalailai na nona bula?” (Luke 12:25) Meda kua ga ni cakava na veika ena vakaleqa na bula se tagutuva vakasakasaka. Nida cakava qori, eda na rawa ni bula vinaka tiko ga me yacova na vuravura vou ni Kalou ena ‘sega ni kaya kina e dua ni tauvimate.’​—Aisea 33:24.

[iVakamacala e ra]