Na Ka o Rawa ni Cakava mo Bula Vinaka Kina
E LEVU na ka e dau vakaogai koya kina o Rustam, e vakaitikotiko mai Rusia. A sega ni vinaka sara na nona ivakarau ni bula ena veigauna sa oti, qai liaca ni sa sotava tiko kina na leqa. A mani muduka na vakatavako kei na gunu sivia. Ia e vakaocai koya na nona dau dabe vakabalavu ena mata ni nona komipiuta.
E dau tekivu cakacaka ena walu na kaloko ena mataka, ia e dau sosovu tale tu me yacova na tini na kaloko, qai tautauvimate. A mani cakava eso na veiveisau. Na cava a qai yaco? E tukuna: “Ena loma ni vitu na yabaki sa oti, e rua ga na siga au tauvimate kina ena dua na yabaki. Au vakila niu sa bula vinaka sara—au sa sega ni dau sosovu qai yadra vinaka na noqu vakasama—au qai marautaka na bula!”
Eratou vakaitikotiko mai Nepal o Ram, na watina, kei na rua na luvedrau. E sega soti na tiko bulabula ena nodratou yasayasa qai sosovi namu kei na lago na vanua qori. Qori e vakavuna na nodratou ceguoca ena veigauna sa oti, qai tauvi ratou vakavuvale eso na mate ni mata. Eratou cakava tale ga eso na veisau eratou qai bulabula vinaka kina.
Mo Lewa Vinaka na Nomu Bula!
Se mani dua e vutuniyau se dravudravua, e levu era lecava ni salavata na ivakarau ni bula kei na nodra bula vinaka. Era na rairai nanuma ni na yaco vakacalaka na bula vinaka se ra sega ni cakava rawa kina e dua na ka. Na rai va qori e vakavuna na nodra sega ni saga mera bula vinaka, mera cakava na ka ena yaga ena nodra bula.
Ia se mani vakacava na nomu rawaka vakailavo, o rawa ni cakava eso na ka mo qarauna kina na nomudou bula vakavuvale, me vakavinakataki tale ga. Ena yaga na nomu sasaga? Io, ena yaga dina! Ena vinaka cake kina na nomudou bula, ena sega tale ga ni tagutuvi kina vakasakasaka.
Ena ka era tukuna kei na nodra ivakaraitaki na itubutubu era na vakavulici luvedra kina mera muria na ivakarau ni bula savasava ra qai bulabula vinaka tale ga. Ke sivia mada ga na gauna kei na ilavo o vakayagataka kina, e muri dou na sega ni rarawa kina vakalevu, dou na sega ni tautauvimate, lailai tale ga na ilavo ena vakayagataki ena veiqaravi vakavuniwai. Na nomu sasaga lailai mada ga o na sega ni tauvimate levu kina.
Eda na raica ena vica na ulutaga veitaravi qo e lima na sala a yaga vei Rustam, Ram, kei na levu tale. E rawa ni yaga tale ga vei iko!
[iYaloyalo ena tabana e 3]
Rustam
[iYaloyalo ena tabana e 3]
Eratou taki wai ni gunu savasava tiko na vuvale nei Ram