Mo Vosota na Nona Takali e Dua na Wekamu Lomani

“Au kidacala au qai rarawa niu rogoca ni sa mate o tamaqu. E ora sara ga na lomaqu niu a sega ni tiko e yasana ena gauna a mate kina. E sega ni vakatauvatani rawa na mosi e vakilai ni mate e dua na wekada lomani. Au nanumi tamaqu sara ga vakalevu!”​—Sara.

KE DUIDUI mada ga na noda itovo vakavanua se lotu, e dredre vei ira e levu mera veitalanoataka na mate. Eso na vanua, era dau vakayagataka eso tale na vosa e malumu na kena itautau mera kua ni rarawa kina vakalevu na lolosi. Ena vosa vakaViti, eda na sega ni tukuna ena so na gauna ni sa “mate” e dua, ia eda rawa ni tukuna ni “sa takali” se “sa vakacegu.”

Ia ke cavuti mada ga na vosa e malumu na kena itautau, ena sega sara ni vakaceguya e dua e rarawataka tiko vakalevu na nona takali na wekana lomani. Na levu ni nodra rarawa eso, era sega sara ga ni ciqoma kina ni sa takali dina na wekadra lomani. E tukuna o Isabelle e cavuti ena tabana e 3: “Ni mate o Nicolle, au biuta e yasana na nona matakau taleitaki niu vakabauta ni na yadra tale.”

Ke sa takali tale ga e dua na wekamu lomani, o rairai saga tale tiko ga vakaukaua mo ciqoma na nona sa takali. De dua o vakaraitaka ni o sa vinaka tiko, ia o kila deivaki e lomamu ni sega ni dina qori. E duidui na sala eda lolosi kina, ke o sega gona ni vakaraitaka na nomu rarawa, e sega ni kena ibalebale qori ni o kinoca tiko.a Ia ena rawa ni vakavu leqa ke o nanuma ni dodonu mo vakaraitaka na nomu rarawa​—de dua era vinakata na lewe ni nomu vuvale era lolosi tiko mo cakava qori.

“Sega na Gauna Meu Lolosi Kina”

Raica mada na ivakaraitaki i Nathaniel, e dua na cauravou e takali o tinana ni se qai yabaki 24. E tukuna: “Na gauna au rogoca kina, au veilecayaki sara ga. Au nanuma ni dodonu meu tokoni tamaqu kei ira na itokani i tinaqu era rarawa tu. E sega na gauna meu lolosi kina.”

Ni oti e dua na yabaki, e raica o Nathaniel ni se sega ga ni ciqoma na nona takali o tinana. E tukuna: “E se qiriti au tiko ga mai ena so na gauna o tamaqu me talaucaka na nona rarawa, e vinaka ni cakava oya. E gadrevi me veitalanoataka, au qai marautaka meu vukei koya kina. Ia na leqa ga oya, ni gauna au vinakata kina na veitokoni au qai raica ni vaka ga e sega ni dua e tiko me tokoni au.”

O ira na veiqaravi​—wili kina o ira ena tabana vakavuniwai era dau raica sara ga na nona mate e dua​—era na rairai nanuma tale ga mera kinoca na nodra rarawa. Kena ivakaraitaki, o Heloisa e sa sivia na 20 na yabaki na nona veiqaravi voli vakavuniwai. E cakacaka ena dua na vanua era veikilai vinaka sara kina e levu, qai volekati ira tale ga e qarava. E kaya: “Ena gauna era mate kina e levu vei ira qori, au tu sara ga e yasadra, eso era noqu itokani voleka sara.”

E qai liaca o Heloisa ni kena ivakarau ga me dau veivakacegui na tagi. E tukuna: “Ia e dredre meu tagi. Au kauaitaka vakalevu na noqu tokoni ira eso tale, au nanuma kina meu kinoca na noqu rarawa. Au vakabauta ni qo na ka era vinakata eso meu cakava.”

“E Vakilai Sara ga ni Lala na Vale ni Yali”

Ena rairai vakila vakalevu sara na galili e dua e takali na wekana lomani. Me kena ivakaraitaki, ni se qai yabaki 19 o Ashley a mate o tinana ni tauvi kenisa. E tukuna: “Au vakila niu sega ni kila na ka meu cakava, au qai galili. E noqu itokani vinaka duadua o tinaqu. E levu na ka keirau dau cakava vata!”

E macala ga ni na dredre vei Ashley me lako e vale e veisiga qai sega ni raici tinana. E tukuna: “E vakilai sara ga ni lala na vale ni yali. E levu na gauna niu gole ena noqu rumu, au dau tagi niu vakaraica tiko na kena itaba au qai vakasamataka na ka keirau dau cakava vata.”

Mo nuidei ni o sega ni rarawa duadua ke sa takali e dua na lewe ni nomu vuvale se itokani voleka. Me vaka eda na qai raica ena ulutaga tarava, e levu era sa vosota rawa na nodra lolosi.

[iVakamacala e ra]

[Tikina bibi ena tabana e 23]

“Au vakila niu sega ni kila na ka meu cakava, au qai galili. E noqu itokani vinaka duadua o tinaqu”​—Ashley