iVukevuke Vei Ira na Lolosi

“Sa voleka ko Jiova vei ira sa ramusu na yalodra.”​—Same 34:18

NI TAKALI e dua na wekamu lomani, ena rairai veilecayaki na lomamu, de dua o na kidacala, o sega ni vakila e dua na ka, o rarawa, e rairai ora na lomamu se o cudru sara. Me vaka ga e sa cavuti oti mai ena ulutaga sa oti, e duidui na sala eda dau lolosi kina. O na rairai sega gona ni vakila kece na ivakarau ni yalo e sa tukuni mai cake, o na rairai sega tale ga ni vakaraitaka na nomu lolosi me vakataki ira tale eso. Ia e sega ni cala ke o via vakaraitaka na nomu lolosi.

“Kua ni Kinoca na Nomu Rarawa!”

O Heloisa na vuniwai e sa cavuti oti mai, a via kinoca na nona lolosi ni takali o tinana. E tukuna: “Au tagi niu se qai rogoca, oti ga oya au kinoca tale na noqu rarawa​—me vaka ga au dau cakava ni mate e dua au qarava e valenibula. Qo e rairai vakavuna na noqu sega ni bula vinaka. Noqu ivakasala vei ira e takali na wekadra lomani: Kua ni kinoca na nomu rarawa! Tagi ga me yacova ni sa cegu na lomamu. Qori ena vinaka sara vei iko.”

Ia ni toso na siga kei na macawa, o na rairai vakataki Cecília a takali na watina ni tauvi koya na kenisa. E tukuna: “Eso era nanuma ni dodonu me sa oti na noqu lolosi, au dau rarawa sara ga ena so na gauna ni sega ni yaco oya.”

Ke va tale ga oya na nomu rai, nanuma tiko ni sega ni tautauvata na noda lolosi. Eso e dau seavu totolo na nodra lolosi. Eso tale e sega, ia e sega ni rawa ni vakatotolotaki qori, kua gona ni nanuma ni dodonu mo yacova e dua na “gauna yalataki” me sa oti kina na nomu lolosi.a

Ia vakacava ke o nanuma ni na sega ni oti na nomu lolosi, qai vusolo na lomamu ena levu ni nomu rarawa? De dua o vakataki koya na turaga yalododonu o Jekope, a “bese ni vakacegui” ni tukuni vua ni sa mate na luvena o Josefa. (Vakatekivu 37:35) Ke va tale ga oya na nomu rai, na cava o rawa ni cakava mo kua ni luvuci kina ena nomu rarawa?

Qarauna na nomu bula. E kaya o Cecília: “Au dau oca sara ga ena so na gauna, au qai liaca ni sa sivia tale na ka au cakava.” E laurai ena ka e tukuna o Cecília ni rawa ni veivakaleqai tale na lolosi, qori ena yagomu kei na ivakarau ni lomamu. E bibi gona mo kauaitaka vinaka na nomu bula. Mo dau vakacegu vinaka, kania tale ga na kakana bulabula.

E macala ga ni o na sega soti ni via kana, sa qai yawa sara na volivoli kei na vakasaqa. Ia ke o vakawalena na kana, ena rawarawa na nomu tauvimate o qai rarawa ga kina vakalevu. E vinaka mo bau saga mada ga mo kana vakalailai mo bula vinaka tiko ga kina.b

Mo vakaukauayago ke rawa, ke o mani taubale mada ga. Cakava eso na ka o na sega ni tiko ga kina e vale. Na vakaukauayago tale ga vakarauta e yavalata na mona me buraka na endorphin, qori ena vinaka vei iko.

Ciqoma na nodra veivuke eso tale. Qori e bibi sara ke takali e dua na isa ni vakawati. De dua a qarava tu eso na itavi, ia qo sa sega ni dua me cakava. Kena ivakaraitaki, ke dau qarava tu o watimu na ka vakailavo se cakacaka ni vale, ena rairai dredre mo cakava duadua qori ena imatai ni gauna. Ena ituvaki va qori, ena yaga vakalevu na nodra ivakasala na itokani era dau maqosataka na ka era tukuna se cakava.​—Vosa Vakaibalebale 25:11.

Na iVolatabu e vakamacalataki koya na itokani dina me ‘vaka na tacina e dua e na gauna ni rarawa.’ (Vosa Vakaibalebale 17:17) Kua gona ni dau tu duadua ga ni o nanuma o na vakaogaoga vei ira eso tale. Ena yasana adua, na nomu veimaliwai kei ira tale eso e vaka na wavu mo takoso kina mai na nomu lolosi ina nomu ciqoma na ka sa yaco. A raica o Sally e dua na goneyalewa ni veivakayaloqaqataki vakalevu ena gauna a mate kina o tinana na nona veimaliwai kei ira eso tale. E kaya: “Era dau sureti au e levu na noqu itokani ena nodra soqo. Qori e yaga sara ga ena noqu valuta na galili levu au vakila tu. Au dau marautaka nira tarogi au eso ena taro rawarawa ga me vaka, ‘Sa vakacava tiko?’ Au raica ni yaga ena noqu vosota na noqu lolosi niu dau talanoataki tinaqu.”

Nanuma na gauna sa oti. Tovolea mo nanuma lesu na gauna drau marautaka kei na wekamu lomani, de dua ena nomu vakaraica na itaba. E macala ga ni na rairai mosimosi qo ena imatai ni gauna. Ia ni toso na gauna, na nomu nanuma na gauna sa oti ena rawa ni vakaseavutaka na nomu rarawa.

O na rairai saga sara ga me dua na nomu dairi. O rawa ni vakavola kina na gauna marautaki sa oti, wili kina na ka o diva mo tukuna vua na wekamu lomani ena gauna se bula kina. Ni o wilika na ka o vola, o na kila vinaka kina na ka e tu e lomamu. Na ka o vola qori e rawa tale ga ni vukei iko mo talaucaka na ka e tu e lomamu.

Mo maroroya beka eso na iyaya me kena ivakananumi na wekamu lomani? E duidui na noda rai me baleta na tikina qo, e sega ni kurabuitaki qori ni duidui na sala eda lolosi kina. Era nanuma eso ni nodra maroroya na nona iyaya na wekadra lomani ena sega ni vakaotia na nodra lolosi, ia era nanuma eso tale ni yaga vei ira. E tukuna o Sally e sa cavuti oti mai: “Au maroroya tu e levu na iyaya i tinaqu. Qo e dua na sala vinaka meu vosota kina!”c

Nuitaka “na Kalou e dau vakacegui keda ena ka kece ga.” E tukuna na iVolatabu: “Mo biuta vei Jiova na nomui colacola bibi, ena tokoni iko ko koya.” (Same 55:22) O na sega wale ga ni masu vua na Kalou mo vakacegui kina. Na masu e dua dina na sala bibi meda veivosaki kina kei “na Kalou e dau vakacegui keda ena ka kece ga, e vakacegui keda ena noda rarawa kece.”​—2 Korinica 1:​3, 4.

Na Vosa ni Kalou e ivurevure levu duadua ni vakacegu. E tukuna na yapositolo lotu vaKarisito o Paula: “Au nuitaka na Kalou . . . nira na vakaturi mai na mate na yalododonu kei ira na sega ni yalododonu.” (Cakacaka 24:15) E rawa ni veivakacegui vakalevu duadua vua e lolosi na nona vakananuma na inuinui ena iVolatabu me baleta na veivakaturi.d E vakadinadinataka qori e dua na yalewa o Lauren, a mate vakacalaka o ganena. E tukuna: “Ke mani vakacava na levu ni noqu rarawa, au dau taura na iVolatabu au vakawilika sara, ke mani dua mada ga na tikina. Au dau digia sara ga na tikinivolatabu e veivakacegui au qai wilika vakavica vata. Me kena ivakaraitaki, e vakacegui au na vosa i Jisu vei Marica ni mate o Lasarusa. A tukuna o Jisu vei Marica: ‘Ena tucake tale na ganemu.’”​—Joni 11:23.

“Me Kua ni Vakamalumalumutaki Iko”

Ke mani dredre mada ga, saga tiko ga mo vosota na nomu lolosi, ena qai seavu ga ni toso na gauna. Kua ni beitaki iko ke sa seavu tiko na nomu lolosi ni o nanuma o na dabui wekamu lomani kina se o sa na guilecavi koya. Ia e macala ga ni o na sega ni guilecavi koya rawa na wekamu lomani. Eso na gauna o na dau nanuma na gauna sa oti, ia ena qai seavu ga vakamalua na nomu rarawa.

De dua o na nanuma lesu tale ga eso na ka marautaki a yaco, na veika rarawa tale ga. Me kena ivakaraitaki, e tukuna o Ashley a cavuti ena ulutaga sa oti: “Au se nanuma vinaka tiko na ka e yaco ni bera ni takali o tinaqu. E vaka me sa bulabula vinaka mai, se qai vakadua tale ga me duri ni oti e vica na siga e davo tu kina. Keitou veidredrevaki ni seruta tiko na ului tinaqu o tuakaqu, sa dede au qai raici tinaqu me dredre. E laurai vua na vakacegu ena gauna marautaki keitou tiko vata kina qori.”

O rawa tale ga ni nanuma lesu eso na lesoni bibi o vulica vua na wekamu lomani e sa takali. Me kena ivakaraitaki e tukuna o Sally: “O tinaqu e dua na qasenivuli totoka. Na itautau mada ga ni nona ivakasala e vaka ga e sega ni veivakasalataki tiko, e dau vakavulici au tale ga meu dau vakatulewa vinaka vakataki au, meu kua ni cakava wale ga na ka ni rau tukuna na noqu itubutubu.”

Na nomu vakananuma na wekamu lomani e rawa tale ga ni ivukevuke yaga mo kua ni lolosi tiko ga kina. Qori na ka e vakadinadinataka e dua na cauravou o Alex. E tukuna: “Ena gauna a takali kina o tamaqu, au vakadeitaka meu muria tiko ga na ka e vakavulici au kina​—meu kua ni guilecava meu marautaka na bula. Au via tukuna vei ira e sa takali e dua na nodra itubutubu: O na sega ni guilecava na nona takali o nomu itubutubu, ia me kua ga ni vakamalumalumutaki iko. E sega ni cala ke o tagi se lolosi, ia kua ni guilecava ni se tu na veigauna se bera mai o rawa ni marautaka.”

[iVakamacala e ra]

[Tikina bibi ena tabana e 26]

“Ke mani vakacava na levu ni noqu rarawa au dau taura na iVolatabu au vakawilika sara, ke mani dua mada ga na tikina”​—Lauren

[Kato/​iYaloyalo ena tabana e 25]

KA MO CAKAVA KE O BEITAKI IKO

De o nanuma ni a vakavuna na nona mate na wekamu voleka na nomu vakawelewele. Ena rawa sara ga ni yaga na nomu vakadinata ni sa kena ivakarau ga meda via beitaki keda ena gauna eda rarawa voli kina​—se mani dina na ka eda beitaki keda kina se sega. Ena ituvaki tale ga va qo, kua ni kinoca na ka e tu e lomamu. Ke vakaleqai iko tiko na nomu beitaki iko, o na lomavakacegu ke o talaucaka vua e dua tale.

Nanuma tiko ga se mani vakacava sara na levu ni noda lomana e dua, eda sega ni lewa na nona bula, eda na sega tale ga ni tarova na nodra sotava na wekada voleka ‘na gauna kei na ka tawanamaki.’ (Dauvunau 9:​11) O sega tale ga ni nakicataka na wekamu lomani sa takali. Kena ivakaraitaki, ke bera na nomu veivosakitaka na nona lai raici vakavuniwai na wekamu lomani oya, o nakita beka me tauvimate qai mate? E macala ga ni sega! Mo beitaki iko beka ni o vakavuna na nona mate? Sega.

A qai kila e dua na tina na sala me kua ni beitaki koya kina ena nona coqa mate o luvenayalewa. E kaya: “Au beitaki au ga niu talai koya. Ia au qai kila ni cala na nanuma va oya. A sega ni cala na noqu talai koya me lai volivoli kei tamana. E ka ni rarawa ni sotava na vakacalaka.”

O na rairai kaya: ‘E levu sara na ka au diva meu tukuna se cakava vua.’ E dina qori, ia o cei e rawa ni tukuna ni vinaka vakaoti na nona qarava na nona itavi vakatama, vakatina, se dau gone vinaka tu ga? E tukuna na iVolatabu: “Eda dau tarabe kece. Ke dua e sega ni tarabe ena vosa, e uasivi o koya.” (Jemesa 3:2; Roma 5:​12) E bibi gona mo ciqoma ni o sega ni uasivi. Ena sega ni veisautaka na ka sa yaco na nomu tukuna tiko “isa kevaka wale ga,” qori ena vakavuna ga me dredre na seavu ni nomu rarawa.e

[iVakamacala e ra]

[iYaloyalo ena tabana e 24]

Ena so na gauna, ena vinakati vua e dua na itubutubu itabaqase e lolosi tu me vakaceguya tale ga na luvena ena nona rarawa

[iYaloyalo ena tabana e 27]

O na rawa ni vosota na nomu lolosi ni dua na nomu dairi, vakaraica na itaba, o qai ciqoma na nodra veivuke eso tale