Bula Vakaidewadewa se Buli?
Na Tabadra na Bebe
● Eso na bebe e dau veiveisau na roka ni tabadra, ia ena vakatau vakalevu qori ena vanua eda rai tiko mai kina. E dua mada ga na mataqali bebe, na vakasakiti ni roka ni tabana e rawa ni laurai mai vakayawa, rauta ni 805 na mita. Ia na cava e vakasakiti kina na irairai ni taba ni bebe?
Vakasamataka mada: Na bebe drokadroka e vakatokai na swallowtail, e tiko e tabana eso na laini lalai e vakalomana. E cilava na laini lalai qori na rarama, qai veisautaka na roka ni tabana. Kena ivakaraitaki, e tiko e vica vata na ua ni tabadra, ni cilava na lomadonu ni ua qori na rarama ena solia mai na roka dromodromo kei na drokadroka, ia ni cilava na tutuna ena solia mai na roka karakarawa. Ena suka lesu na rarama ke cilava vakadodonu na lomadonu ni ua ni tabadra, ia ni cilava na tutuna ena dewa na rarama qori ina so tale na ua ni tabadra me vakalevutaka se veisautaka na ua ni rarama. Na gauna era sa lai veiwaki kina na rarama, ena tuvai vakamatau na kedra roka. E rawa ga qori ena vuku ni kena vereverea na ka e caka me basika kina na roka qori.
E taura e rauta ni 10 na yabaki mera qai bulia na daunivakadidike e dua na misini e tautauvata kei na taba ni bebe. Na ka era bulia qori e rawa nira vakayagataka me buli kina na ilavo kei na credit card, qori ena vakadredretaka na kena buli na ilavo kei na credit card lasutaki. Era nuitaka tale ga ni rawa ni vakayagataki me buli kina na sola me vakasucuma na kaukaua mai na matanisiga. Ia e dua tiko na leqa, e dredre mada ga mera bulia e dua na sabolo ni taba ni bebe. E kaya o Parofesa Ullrich Steiner ena Cambridge University’s Nanoscience Centre: “Dina ni levu na ka matailalai vakasaenisi eda sa kila toka me baleta na rarama, ia na talei ni veimataqali roka e laurai ena ka buli, e sega ni vakavotui taucoko sara ena misini vakasaenisi.”
Na cava o nanuma? E buli na tabadra na bebe se bula vakaidewadewa?
[iYaloyalo ena tabana e 26]
Na bebe drokadroka e vakatokai na swallowtail
[iYaloyalo ena tabana e 26]
Na irairai ni taba ni bebe ni laurai ena iloilo ni vakalevutaki ka
[iYaloyalo ena tabana e 26]
Bebe: Faunia, Madrid; itaba e laurai ena iloilo ni vakalevutaki ka: © Eye of Science/Photo Researchers, Inc.