Na Vari ni Taba ni Bebe

ERA saga tiko na saenitisi mera vakavinakataka na kumuni rarama ni sola me rawa ni solia vakalevu na livaliva, meda kua kina ni vakararavi tiko ga ena livaliva e rawati ena waiwai e keli mai na lomaniqele. E kaya e dua na saenitisi, “de dua na kena iwali e . . . rawarawa sara.”

Vakasamataka mada: Era dau vakatetaba na bebe ena cila ni siga mera katakata kina ena draki batabata. E vakasakiti eso na mataqali bebe na swallowtail ni rawa ni kumuna qai maroroya na tabana na katakata mai na rarama ni matanisiga. E cakava rawa qori ni loaloa na tabana, kena ikuri e veitaqataqai ena tabana taucoko na varina somidi e sega ni raica rawa na matada. Era tuvani ena dela ni varina na qara e vaka na ibulibuli ni qanioni qai wasei ira na delana lalai e vaka na bukebuke mera vakadewataka sobu na rarama ni matanisiga ina loma ni qara lalai qori. Na ibulibuli ni tabana vakasakiti qo e lai kata buto kina na roka ni tabai ra bebe, mai katakata vinaka tale tu ga yani.

E tukuna na website na Science Daily: “E uqeti ira na dauvakadidike na ka e rawa ni cakava na taba ni bebe mera bulia kina e dua na iyaya vou e vakaruataki tale na levu ni kasi na hydrogen e sokumuna mai na wai kei na rarama ni matanisiga, qai sega ni vakaleqa na itikotiko.” E uqeti ira tale ga mera bulia eso tale na mataqali iloilo ni vakadidike kei na sola.

Na cava o nanuma? E bula vakaidewadewa na ibulibuli vakasakiti ni taba ni bebe se buli?