Taleitaki Vakalevu na iTovo Kaukaua

DUA na ka na levu ni itovo kaukaua e vuravura nikua. E sega ni vakabekataki ni sa okati tiko na itovo kaukaua ena ka ni veivakamarautaki. Ia e tukuna na Media Awareness Network: “Ena vica ga na yabaki sa oti, sa veisau na veika me baleta na itovo kaukaua e dau vakaraitaki ena tabana ni itukutuku. Kena imatai, sa levu na ka e okati kina.” Kena ikarua, sa “vakaraitaki vakamatailalai na ka e yaco tiko, e veivagarogaroi, e levu tale ga kina na veivakalolomataki era okati tu me ka ni lasa.” Dikeva mada qo.

iVakatagi: E tukuna na Media Awareness Network ni sa “ciqomi raraba tu ena buturara ni vakatagi” na qaqanisere e uqeta vakalevu na itovo kaukaua. E vakayagataki kina na vosa ca, eso tale na sere era uqeta na laba kei na kucu, vei ira mada ga na yalewa vakawati kei na tina.

Qito ena Vidio: E tukuna e dua na mekesini me baleti ira na dau taleitaka na qito ena vidio mai Peritania, “ni sa leqataki sara vakabibi na kena sa vakaraitaki vakalevu na vakadavedra ena qito ena vidio.” E tomana: “Kena irairai ni o ira era taleitaka na qito ena vidio era dau taleitaka vakalevu na itovo kaukaua.” Kena ivakaraitaki, ena dua na qito kilai levu e vakaraitaki kina na nona saga e dua me mokulaki ira vakaukaua na yalewa ena kau ni baseball me yacova sara ni mate. Era vakabauta eso na vakailesilesi ni vakamuai ira vakalevu na gone na qito ena vidio ni vakatauvatani ena sara tivi.

iYaloyalo: E laurai ena so na vakadidike ni sa vakaraitaki vakalevu tu ena iyaloyalo na itovo kaukaua, veiyacovi, kei na vosavosa ca, sa sega tale ga ni nuitaki na ivakamacala me baleta na ka ena vakaraitaki ena iyaloyalo (ratings). Kuria qori, sa sega wale ga nira vakayacora na itovo kaukaua o ira na “tamata ca” ena iyaloyalo. E laurai ena dua na vakadidike ni voleka ni veimama na itovo kaukaua e vakaraitaki ena tivi, iyaloyalo, kei na vidio ni ivakatagi era dau vakayacora na “tamata vinaka.”

Nius: “Na levu ga ni kena kaburaki ena nius na itovo kaukaua, ena levu tale ga na tamata era na sarava,” qori na ka era dau kauaitaka vakabibi e levu na dau vakarautaka na nius ena tivi. E bisinisi levu na kaburaki ni nius, era kila tale ga na ripota ni itovo kaukaua ena dreti ira vakalevu na sarasara. Ni levu era sara tivi, ena uqeti ira na dauveivoli mera sauma na vakaraitaki ni nodra ivoli, o ira sara ga qori era dau vakailavotaka na porokaramu ni tivi ena levu na vanua.

Web Site: E tabaki ena Internet eso na itaba lasutaki kei na so na itaba dina ni veivakatotogani, musulaki kei na kena tavalaki na yago, wili kina na laba. Era gole vakalevu na gone ena site va qori.

Vakacava e Rawa ni Veivakamuai na Veika Qori?

E rawa beka ni vakamuai ira na tamata na itovo kaukaua e tabaki ena tivi, iyaloyalo, ivola kei na so tale na ka ni veivakamarautaki? Era tukuna o ira era rawa ilavo tiko ena kena vakaraitaki na itovo kaukaua ena tabana ni itukutuku ni sega ni veivakaleqai na ka era cakava tiko. Ia vakasamataka mada qo: Era sauma na kabani ni bisinisi e veiyasai vuravura e vica vata na bilioni na ilavo ena kena vakaraitaki na nodra ivoli mera vesumonataki kina e levu, kena irairai ni 30 ga na sekodi na balavu ni kena vakaraitaki. Ke sa rawa ni veivakamuai na itukutuku lekaleka va qori, sa na qai wacava na kena veivakamuai​—vakabibi vei ira na gone​—na iyaloyalo e 90 na miniti na kena balavu, de dua e vakaraitaki kina na nodra cakava na ka vakasisila kei na itovo kaukaua na tamata vinaka.

Eda sega ni kilai keda vinaka ni vakatauvatani kei na nona kilai keda na Dauveibuli, na Kalou o Jiova. Na cava e vakasalataki keda kina me baleta na noda veimaliwai kei ira na tamata voravora​—vakabibi o ira era dau vakaraitaki se rogoci ena tabana ni itukutuku kilai levu? Raica mada qo na ka e tukuna na iVolatabu:

● “Sa vakatovolea na tamata yalododonu ko Jiova: Ia na tamata lomaca kei koya sa vinakata nai valavala kaukauwa, sa cati koya na yalona.”​—Same 11:5.

● “Mo kakua ni veiwekani kei na tamata daucudru; kakua talega ni ko lako vata kaya na tamata yalodauveikata: De ko vulica na nonai valavala, ka qai tacori kina na yalomu.”​—Vosa Vakaibalebale 22:​24, 25.

E macala ga nida na sega ni levea rawa eso na ka e rawa ni vakamuai keda ina veika ca. Ia eda se rawa ga ni digia na ka ni veivakamarautaki kei na ilala meda veimaliwai vata. E vinaka gona mo taroga, ‘Na ivakarau ni bula cava au vinakata meu kilai kina?’ Veimaliwai gona kei ira era muria na ivakarau ni bula qori, o ira era vinakata tale ga na itovo kei na isausau o vinakata.​—Vosa Vakaibalebale 13:20.

E rawa ni veisautaka na noda rai me baleta na itovo kaukaua na ilala kei na ka ni veivakamarautaki eda digia, ia e tiko eso tale na ka e rawa ni vakamuai keda. Na cava beka ya?

[iYaloyalo ena tabana e 4]

Na ka ni veivakamarautaki eda digia e rawa ni veisautaka na noda rai me baleta na itovo kaukaua