Veika e Vakavuna na iTovo Kaukaua
E LEVU na ka e dau vakavuna na itovo kaukaua, me vaka na vakailala, ka ni veivakamarautaki se na vanua e susu kina e dua. Raica mada qo eso tale na ka e okati kina.
Lomabibi kei na yalolailai. So na gauna era vakayacora e levu na tamata na itovo kaukaua nira vakararawataki, vakaduiduitaki, sega ni via veimaliwai, leqa vakailavo, se nira nanuma nira sa sega ni lewa rawa nodra bula.
Yalo ni vakacaca. Me vaka e dau laurai vakalevu ena vanua e dau caka kina na qito, era na sega ni madua na dauvakacaca se dua na ilawalawa mera cakava na ka ca. Na vuna? E tukuna na ivola na Social Psychology nira sa “sega ni kauaitaka na nodra itovo vinaka, ra qai cakava na ka ena rairai vakavuna na itovo kaukaua se itovo voravora.” E tukuna e dua tale na ivola ni o ira qori era via tautauvata ga kei na matakau, nira sa guilecava “na nodra itavi ena ka e dodonu mera cakava me yaga ina nodra itikotiko.”
Veicati kei na vuvu. Na imatai ni laba e volai ena itukutuku ni bula ni kawatamata a cakava o Keni. (Vakatekivu 4:1-8) Ena levu ni nona vuvu kei na nona cati tacina, a labati koya kina—dina ga ni a vakasalataki Keni na Kalou me lewai koya vinaka, qai yalataka vua ni na vakalougatataki koya ke cakava qori. E dina kina na iVolatabu ni kaya: “Na vanua e tiko kina na vuvu kei na veileti, e yaco kina na tikoyavavala kei na ka ca kece”!—Jemesa 3:16.
Alakaolo kei na vakayagataki ni wainimategaga. Na kena vakayagataki vakasivia na veika qori ena sega wale ga ni vakaleqa na noda bulabula vinaka vakayago kei na noda vakarau ni rai, ia ena vakaberaberataka sara ga na cakacaka ni mona. O koya e vakayagataka vakasivia na ka qori ena rawarawa sara nona cakava na ivalavala kaukaua qai cudrucudru vakalevu.
Nodra vakawelewele na tabana ni lawa. E kaya na Dauvunau 8:11: “Ni sa sega ni cudruvi vakasauri nai valavala ca sa gumatua kina na lomadra na luve ni tamata me ra caka ca.” Nira vakamalumalumu, vakawelewele, se ra sega ni muria na kena ivakatagedegede o ira na tabana ni lawa sa na vakavuna ga me levu na itovo kaukaua.
Lotu lasu. E dau okati vakalevu o lotu ena itovo kaukaua, wili kina na veicati vakalotu kei na vakacaca ni batikadi. E sega ni dodonu mera beitaki ga o ira na daudre cala, o ira na dau vakavuna na tiko yavavala kei ira na yalodredre. Ena rua na ivalu lelevu kei vuravura, o ira na lewenilotu kilai levu—“lotu vaKarisito” kei ira na sega ni lotu vaKarisito—era veivakamatei vakataki ira, ra qai dau veivakalougatataki kina na nodra iliuliu ni lotu. Na ivakarau va qori e cata na Kalou.—Taito 1:16; Vakatakila 17:5, 6; 18:24.
Nida sa raica e levu na ka e tokona se uqeta na vakayacori ni itovo kaukaua, vakacava e rawa ni o dua e dau vinakata na veiyaloni ena vuravura nikua? Io, meda raica mada qo.
[Kato ena tabana e 6]
TEKIVU E LOMADA NA ITOVA KAUKAUA
E levu na ka ena rairai vakavuna na itovo kaukaua, ia e tekivu sara ga ena ivakarau ni lomada. Ena sala cava? Me vaka ni kila vinaka na ivakarau ni lomada o Jisu Karisito e tukuna kina: “E vu mai na loma ni tamata na vakanananu ca: na veidauci, na butako, na laba, na veibutakoci, na kocokoco, na ivalavala e ca, na lawaki, na ivalavala vakasisila, na mata e vuvu, na vosavakacaca, na dokadoka, kei na veika sesewa.” (Marika 7:21, 22) Eda na uqeta na mataqali yalo va qori nida vakaraica, vakarogoca, se vakasamataka tiko ga na veika ca.—Jemesa 1:14, 15.
Ia nida dau vakasamataka na veika e bibi cake, me vaka na itovo era cavuti ena ulutaga ena tabana e 8, eda na “vakamatea” kina na gagadre ca da qai bulataka na itovo vinaka. (Kolosa 3:5; Filipai 4:8) Ena vukei keda na Kalou meda ‘vakayaloqaqataka na lomada.’—Efeso 3:16.
[Kato ena tabana e 7]
ERA SEGA NI SAUMA RAWA NA KENADAU
Na cava e levu kina vaka60 ena so na matanitu na ripote ni laba ni laurai vata kei na so tale? Na cava e laurai vakalevu kina ena itukutuku ni kawatamata na ivalu kei so tale na mataqali itovo kaukaua? E levu tale tu na ka e lomatarotarotaki, ia e sega soti na isaunitaro veivakacegui.
Era tukuna eso na dauvakadidike ni vakavuna na itovo kaukaua na dravudravua kei na veivakaduiduitaki. E laurai ena so na vakadidike, ni rauta e 90 na pasede na lewenivanua era mate ena itovo kaukaua, wili kina o ira era vakamatei ira ga vakataki ira. E dau yaco vakalevu qori ena matanitu dravudravua kei na itikotiko dravudravua ena siti e levu kina na basulawa. Vakacava era dau vakayacora e levu na itovo kaukaua na tamata dravudravua? Se caka vei ira e levu na itovo kaukaua baleta nira sega ni sauma rawa na veiqaravi vinaka vakalawa mera taqomaki kina? Ena so mada ga na vanua me vakataki Calcutta, Idia, era tu kina e vica vata na milioni era dravudravua ena kena ivakatagedegede e ca sara. Ia e laurai ni o Calcutta e dua vei ira na vanua e vuravura e lailai kina na iwiliwili ni laba.
Era tukuna tale ga eso ni kena tu vakarawarawa na dakai e vakavuna me levu kina na ivalavala kaukaua ena so na itikotiko. Io, na dakai e dau vakavuna mera vakarerevaki ga kina vakalevu na tamata voravora. Ia na cava ga e levu kina na iwiliwili ni tamata voravora ena so na vanua ni vakatauvatani kei na so tale na vanua? Era sega ni kila na kenadau mera sauma vakacava.