Levu Era Kauaitaka na Siga ni Veivakarusai Vakadomobula

VAKACAVA o lomaleqataka na bula ena gauna se bera mai? Ke vaka kina, e sega ni o iko duadua ga. Ena gauna makawa, era dau vatavatairalagotaka eso na ka ena yacovi keda na kawatamata ena gauna se bera mai, era tukuna tale ga e levu ni gauna qori ena sega kina na inuinui. Sa vica vata na udolu na yabaki na nodra kauai na kawatamata me baleta na siga ni veivakarusai vakadomobula, se na siga me vakarusai kina o vuravura.

Kena ivakaraitaki, vakasamataka mada na italanoa buli era tu nikua. Na komiki, tivi, vica vata na drau na yaloyalo, kei na vica vata na udolu na ivola era talanoataki tu kina na sala ena vakarusai kina na vuravura. Era vakamacalataki ena italanoa qori e levu na ka e rawa ni vakacacani keda na kawatamata qai veivakarusai​—robot dau veivakamatei, na veimataqali manumanu vakadomobula (monster), na yalovelavela, na gata levu, na maqe, manumanuvuka kei na so tale. Ena dredre dina me vakabauta e dua na mataqali italanoa va qori.

Ia eso tale na italanoa kei na ivakavuvuli e vakavuna mera lomaleqa kina eso. Era tukuna eso vei ira qori ni ka vakasaenisi. E parofisaitaka e dua ni na yavala na loma ni qele ena dua ga na gauna, qai vakavuna na ua loka lelevu, uneune kaukaua kei na volukano lelevu. E dua tale e parofisaitaka nira na tuvai me dua na laini na vuravura kece era tu e maliwalala, qori ena vakavuna me katakata kina vakasivia na cawa ni matanisiga qai vakaleqa na bula e vuravura. Ia e dua tale e parofisaitaka ni na veisau vakasauri na vanua erau tiko kina na idre kei vuravura​—na vanua e dodonu me tiko kina na Saucapole e sa na tiko kina na Nocapole​—qo ena vakavuna me vakamatei keda kece na katakata ni matanisiga. Kua ni taqaya, ena sega ni yaco na ka kece qori. Ia na ka era vatavatairalagotaki tu qori e vesuka tu nodra vakasama e levu.

Vakacava na ka e vakamacalataki ena levu na ivola kei na Web site ni siga ni veivakarusai vakadomobula me baleta na kena vakarusai na vuravura ena ika21 ni Tiseba ni yabaki qo? Eso era vakabauta ni vuravura o Nibiru (se o Planet X) e sa voleka sara ni coqa na noda vuravura, ena qai yaco qori ena Tiseba 2012. Na vakasama qo kei na so tale e sega na kedra ivakadinadina. E sema tiko ena ivakamacala ni nodra ivolanivula makawa na Maya, nira nanuma kina eso ni na cava na ivolanivula qori ena Tiseba 2012.

E levu era vakabauta ni na yaco dina qori, era mani tara eso na vale me idrodro ena daku ni nodra lomanibai, se ra vakayagataka e levu na ilavo mera cakava eso na rumu ena ruku ni qele. Eso tale era toki ena veiulunivanua mera lai vakarautaka ga vakataki ira na ka era gadreva, ra qai sega ni vakayagataka na ka e vakarautaki vei ira na lewenivanua me vaka na wai kei na livaliva.

E macala ga ni tiko eso era sega ni vakabauta na veika qori. Era sega ni duavata ena vakasama qori me baleta na vakarusai ni vuravura. Kena ivakaraitaki, era tukuna na sainitisi ni NASA: “Ena sega ni dua na ka ca ena yaco e Vuravura ena 2012. Sa oti qo e sivia e 4 na bilioni na yabaki, e se sega ga ni vakaleqai. Era vakabauta tale ga na sainitisi e vuravura raraba ni sega ni dua na ka rerevaki ena yaco ena 2012.”

Ia e sega ni ka vakayalomatua meda nanuma ni na sega ni yacovi keda na kawatamata e dua na leqa se meda nanuma ni o ira ga na yalowai era vakabauta ni italanoa lasu na siga ni veivakarusai vakadomobula. Vakacava ena yaco dina na siga ni veivakarusai vakadomobula? Ke vaka kina, ena yaco vakacava? Ena yaco ni naica?