Vuna sa Qai Levu ga Kina na Leqa e Vuravura

E ROGO ena itekitekivu ni 2017 e dua na itukutuku rarawataki. Era kaya eso na saenitisi ni sa vakarau yaco e vuravura e dua na ka vakadomobula. Era bulia tale ga e dua na kaloko vakaivakatakarakara e vakatokai me Kaloko ni Veivakarusai, me laurai kina na gauna sa vo ni bera ni vakarusai na vuravura. Era wirica na saenitisi na liga ni kaloko me totolo ena 30 na sekodi. Ni laurai na vanua sa toka kina na liga ni kaloko ena gauna qo, sa vo e rua veimama na miniti me tinikarua ena bogilevu tutu. E nanumi nida sa qai volekata sara na veivakarusai ena gauna qo ni vakatauvatani kei na 60 vakacaca na yabaki sa oti!

Era nanuma na saenitisi mera na dikeva tale ena 2018 na lekaleka ni gauna sa vo me vakarusai kina na vuravura. Qori me laurai kina ke na veisau na macala ni liga ni kaloko, se sa na rusa dina ga na vuravura. De dua ena dredre mo vakabauta ni na vakavinakataki na ituvaki kei vuravura. O ira mada ga na dau dikeva na ituvaki kei vuravura era lomatarotarotaka tu qori. Eso tale era vakabauta ni na sega ni vakavinakataki rawa na ituvaki kei vuravura.

Ia era vakabauta e vica vata na milioni ni na vinaka na ituvaki ena gauna se bera mai. Era kaya ni tiko na ivakadinadina ni na bula tawamudu na kawatamata, ena sega ni vakarusai na vuravura qo, ena vakavinakataki tale ga na ituvaki ni bula nikua. Vakacava ena vakavinakataki dina na ituvaki kei vuravura?