Sala mo Dua Kina na Tama Vinaka

“Au na vukei luvequ vakacava me gone vinaka?” Qori na ka e lomaleqataka voli o Michaela mai Sauca Aferika. E dau saga vakaukaua me dua na tama vinaka, ia ni vakasamataki luvena tagane dau talaidredre, e yabaki 19, a diva me dua na itubutubu vinaka.

Ia e duatani na ka a cakava o Terry mai Sipeni, kena irairai ni a dua na tama vinaka. E tukuna na luvena tagane o Andrew: “Au se nanuma vinaka tu ga e levu na ka e dau cakava o tamaqu, me vaka nona dau wiliwili vei au, keirau dau qito, kauti au ena so na vanua me keirau lai sarasara duadua ga kina. Au dau marautaka na nona veivakavulici.”

E sega ni rawarawa me dua e tama vinaka. Ia e tiko eso na ivakavuvuli yaga e rawa ni veivuke. Era vakadinadinataka e levu na tama, wili kina na nodra vuvale na yaga ni kena muri na ivakavuvuli vuku ena iVolatabu. Meda raica mada eso na ivakasala yaga vakaivolatabu ena rawa ni vukei ira na tama.

1. Vakayagataka Nomu Gauna Vei Ratou e Vale

Ni o dua na tama, o na vakaraitaka vakacava vei ira na luvemu ni o kauaitaki ira dina? E macala ga ni levu sara na ka o na cakava vei ira, wili kina na nomu cakacaka vakaukaua mo vakani ira kei na nomu vakarautaka na vanua veiganiti mera tiko kina. O cakava qori baleta ni o kauaitaki ira dina. Ia ke lailai na gauna o vakayagataka vei ira na luvemu, era na rairai nanuma ni o sega ni kauaitaki ira dina, o sa lai kauaitaka ga vakalevu eso tale na ka, me vaka na cakacaka, nomu itokani se na ka o dau taleitaka.

Gauna cava me tekivu vakayagataka kina o tama nona gauna vei luvena? Ni se tiko e ketei tinana e dua na gone, sa tekivu sara ga ena gauna qori na nodrau veikilai. Ni oti e 16 na macawa na nona kunekunetaki e dua na gone, sa rawa ni rogoca na ka. Ena gauna tale ga qori sa rawa ni bucina kina o tama e dua na veiwekani talei kei na luvena se bera ni sucu. E rawa ni rogoca na pamu ni utona, vakila ni teke, e rawa tale ga ni lagasere se vosa vua.

iVakavuvuli Vakaivolatabu: Ena gauna vakaivolatabu e nodra itavi sara ga na tama mera vakavulici luvedra. Era uqeti mera dau vakayagataka wasoma nodra gauna vei luvedra, e vakadinadinataki qori ena Vakarua 6:​6, 7, e kaya: “Ia na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”

2. Na Tama Vinaka e Dauveivosaki

Me rawa ni drau veivosaki vinaka kei luvemu e bibi mo dau vakarogoci koya. E bibi tale ga mo kua ni dau saqata totolo na ka e tukuna.

Ke ra kila na luvemu ni o dau cudrucudru qai dauvakalelewa, ena dredre mera talaucaka vei iko na lomadra. Ia ni o vakarogoci ira vinaka e vakaraitaka ni o kauaitaki ira dina. Ena rairai uqeti ira qori mera talaucaka vei iko na lomadra kei na ka era nanuma.

iVakavuvuli Vakaivolatabu: E laurai ni yaga dina na ivakasala vuku ena iVolatabu ena levu na ituvaki eda sotava e veisiga. Kena ivakaraitaki, e kaya na iVolatabu: “Me totolo ni vakarorogo na tamata yadua, me berabera ni vosa, me berabera ni cudru.” (Jemesa 1:19) Nira muria na tama na ivakavuvuli vakaivolatabu qori era na dauveivosaki vinaka kei luvedra.

3. Veivakavulici ena Yalololoma Qai Veivakacaucautaki

Me kua ni laurai ni o rarawa se cudru ena gauna o vakavulici luvemu kina, mo vakaraitaka ga ni o lomani koya baleta ni na yaga vua ena veigauna mai muri. Qori e okati kina nomu veivakasalataki, veivakadodonutaki, veivakavulici, kei na nomu vakatauca eso na itotogi ke gadrevi.

Ena yaga tale ga vakalevu na nona veivakavulici e dua na tama ke dau vakacaucautaki luvena. E tukuna na iVolatabu: “A ka sa vosataki taudonu sa vaka na moli koula e na kato siliva.” (Vosa Vakaibalebale 25:11) Na veivakacaucautaki ena vukei ira na gone mera bucina na itovo vinaka. Era na nuidei na gone ke ra vakamareqeti ra qai kauaitaki vei ira na nodra itubutubu. Ni saga e dua na tama me vakacaucautaki ira na luvena ena ka era cakava, ena vukei ira mera nuidei, ena uqeti ira tale ga mera kua ni soro ni cakava na ka e dodonu.

iVakavuvuli Vakaivolatabu: “Kemuni na tama, ni kua ni vakacudrui ira na luvemuni, de ra yalolailai kina.”​—⁠Kolosa 3:⁠21.

4. Lomana Qai Dokai Watimu

Ena tarai ira dina na gone na nona ivakarau e dua na tagane vakawati vei watina. Era kaya eso na kenadau era dau dikeva na nodra tubu na gone: “Dua na ka vinaka e rawa ni cakava e dua na tama vei ira na luvena, oya me dokai watina. . . . Ni rau vakaraitaka na veiwatini vei ira na gone ni rau veidokai, era na vakila na gone nira lomani, era na marau tale ga.”​—⁠The Importance of Fathers in the Healthy Development of Children.b

iVakavuvuli Vakaivolatabu: “Kemuni na tagane, ni lomani ira tiko ga na watimuni . . . Moni lomana tale ga na dui watimuni me vaka ga nomuni lomani kemuni.”​—⁠Efeso 5:​25, 33.

5. Bulataka na iVakasala Vuku ni Kalou

O ira na tama era lomana dina na Kalou, era rawa ni solia vei luvedra e dua na isolisoli vinaka duadua, oya mera veiwekani voleka kei na Tamadra vakalomalagi.

Ni oti e vicasagavulu na yabaki na nona susugi ratou na ono na luvena o Antonio, e dua na iVakadinadina i Jiova, a volavola mai vua e dua na luvena yalewa: “Ta, au via vakavinavinakataki iko ena nomu tuberi au meu lomana na Kalou o Jiova, meu taqomaka noqu bula, meu lomani ira na wekaqu​—⁠meu veiraurautaka tale ga na ka. O vakaraitaka dina ni o lomani Jiova, o lomani au tale ga. Vinaka Ta nomu vakaliuci Jiova tiko ena nomu bula kei na nomu karoni ira na luvemu me vaka nira isolisoli ni Kalou!”

iVakavuvuli Vakaivolatabu: “Ia mo ni lomani Jiova na nomuni Kalou e na lomamuni taucoko, kei na yalomuni taucoko, kei na nomuni kaukauwa taucoko. Ia na vosa oqo, ka’u sa vakarota vei kemuni e na siga oqo, me tiko ga e na lomamuni.”​—⁠Vakarua 6:​5, 6.

Qori e lima wale ga na ka mera cakava na tama, ia eda kila ni levu tale tu na itavi mera qarava. Ke o saga mada ga ena nomu vinaka taucoko mo dua na tama vinaka, o na sega ga ni uasivi. Ke o vakaraitaka vei ira na luvemu ni o lomani ira, o cakacaka tale ga vakaukaua mo vakarautaka na ka era gadreva, o na rawa ni dua na tama vinaka.c