DIGOVI VURAVURA

MERIKA

E ripotetaka na U.S. Department of Homeland Security, ena tini na yabaki sa oti, era vesuka na sikiuriti ni rara ni waqavuka e rauta ni 50 na milioni na iyaya e vakatabui me kau ena waqavuka. Ena 2011, era vesuka e sivia e 1,200 na dakai. E levu era sega ni bau kidava nira kauta tu na iyaya qori.

Brazil

Era biuta na vakailesilesi ni koronivuli ena nodra unifomu na gonevuli e dua na iyaya vakalivaliva lailai, me kua kina na vakalutu vuli. E tiko e koronivuli e dua na misini ena wilika na iyaya vakalivaliva qori qai vakauta e dua na text vei ira na itubutubu nira sa yaco e koronivuli na gone. Ena vakauta e dua tale na text ke bera o luvedra ena 20 na miniti.

Norway

Sa sega tale ni qai lotu ni vanua qo na Lutheran. Se qai vakadua mera vakatulewataka na lewe ni boselawa me veisautaki na yavu ni vakavulewa ni matanitu o Norway, me rau kua tale ga ni bosoki vata o Lotu kei Matanitu.

Czech Republic

E laurai ena dua na vakadidike ni levu na tamata cakacaka ena vanua qori era tukuna nira dau ciqoma na qiri, imeli, se text ena gauna era cegu kina na cakacaka. Ia e vica era tukuna ke ra sega ni vakauitukutuku lesu e vakaraitaka nira veibeci.

Idia

Ena rauta na 20 na yabaki sa oti e tubu ena 50 na pasede na kakana e vakarautaki e Idia, e rawati tale ga e rauta e 71 na milioni na tani na raisi kei na witi. Ia era se waloloi ga e levu ena vanua qori. E rauta ni 40 ga na pasede na witi e soli vei ira na lewenivanua. Na cava na vuna? Baleta na cakacaka vakailawaki kei na vakasabusabu.