NA RAI NI IVOLATABU

Alakaolo

E tabu na gunu alakaolo?

“Na waini, sa vakamarautaka na loma ni tamata, kei na waiwai sa lumilumisa kina na matana, kei na kakana sa kaukauwa kina na loma ni tamata.”​—⁠Same 104:⁠15.

KA ERA KAYA ESO

E dau kena ivakarau ena levu na vanua me wai ni kana na alakaolo. Ia ena so tale na vanua era vakatabuya. Na cava e duidui kina na rai? E vakatau qori ena ivakarau vakavanua, kauaitaki ni bula, vakabauta, kei na levu tale.

KA E KAYA NA IVOLATABU

E sega ni vakacala na iVolatabu ke da gunu alakaolo vakalailai, e vakacala ga na mateni kei na gunusivia. (1 Korinica 6:​9, 10) O ira mada ga na tamata ni Kalou ena gauna makawa era gunu waini, e laurai tale ga vaka200 vakacaca ena iVolatabu na vosa waini. (Vakatekivu 27:25) E kaya na Dauvunau 9:7: “Mo kania e na marau na kemu kakana, ka gunuva e na yalo sa reki na memu waini.” Na waini e vakamarautaki keda, e dau vakayagataki gona ena so na soqo, me vaka na vakamau. A tiko ena dua na soqo va qori o Jisu qai vakayacora kina na imatai ni nona cakamana, ena nona vukica na wai me “waini vinaka.” (Joni 2:​1-11) E dau wainimate tale ga na waini.​—⁠Luke 10:34; 1 Timoci 5:⁠23.

“Kua ni bobula ena . . . dau gunu waini.”​—⁠Taito 2:⁠3.

VUNA MO KAUAI KINA

E veiyabaki e sega ni wili rawa na levu ni vuvale era rarawa ni dau gunusivia e dua vei rau na itubutubu se o rau ruarua. Na gunusivia e vakavuna e levu na vakacalaka, wili kina na coqa e gaunisala. Ni toso na gauna e rawa ni vakaleqa na mona, uto, liva, kei na kete.

KA E KAYA NA IVOLATABU

E vinakata na Kalou meda lewa vinaka na ka eda kania se gunuva. (Vosa Vakaibalebale 23:20; 1 Timoci 3:​2, 3, 8) Ke sega, eda na vakararawataki koya. E kaya na iVolatabu: “A dauveivakalialiai na waini, a daucudru na yaqona: Ia ko ira kece era vakacalai kina era sa sega ni vuku.”​—⁠Vosa Vakaibalebale 20:⁠1.

E dua na sala e dau veivakacalai kina na alakaolo, oya ni rawa ni vakavuna meda cakava eso na itovo vakasisila. E kaya na Osea 4:11: “Na waini kei na waini vou sa kauta vakatani na loma ni tamata.” A vakadinadinataka sara ga qori o John.a Ni oti nodrau veiba kei watina ena dua na siga, a lai gunu ena dua na otela, mateni mani veibutakoci sara. A veivutunitaka na ka e cakava qai yalataka ni na sega ni cakava tale. Na gunusivia e rawa ni veivakaleqai vakayago, e vakaleqa tale ga noda veiwekani kei na Kalou. E tukuna na iVolatabu ni o ira na daumateni era na sega ni bula tawamudu.​—⁠1 Korinica 6:​9, 10.

Gauna cava meda kua kina ni gunu?

“O koya sa yalomatua ena vunitaki koya ni raica na leqa, ia o ira na sega ni vuku era na lako tu ga yani ra qai veivutuni e muri.”​—⁠Vosa Vakaibalebale 22:​3, “Good News Translation.”

VUNA MO KAUAI KINA

E kaya na World Book Encyclopedia: “E dua dina na ka kaukaua na alakaolo.” Koya gona, ena so na gauna ena sega ni ka vakavuku meda gunuva mada ga vakalailai.

KA E KAYA NA IVOLATABU

O ira na dau gunu ena gauna cala, e vaka ga era raica na leqa ra qai “lako tu ga yani.” E kaya na iVolatabu: “Sa dui vagauna na ka kecega,” wili kina na gauna meda kua kina ni gunu. (Dauvunau 3:⁠1) Kena ivakaraitaki, eda na sega ni gunu ke da se sega ni yacova na kena yabaki, se da saga tiko meda biuta, se vakatabui vakavuniwai meda gunu. E levu era sega ni gunu nira lai cakacaka se gauna era cakacaka kina, vakabibi ke ra na vakayagataka eso na misini rerevaki. O ira era yalomatua era raica vakabibi na bula, era raica tale ga me isolisoli ni Kalou. (Same 36:⁠9) Eda na doka na isolisoli qori nida muria na ivakavuvuli vakaivolatabu me baleta na alakaolo.