DIGOVI VURAVURA

Muaira ni Sahara Mai Aferika

E kaya na isoqosoqo na United Nations Children’s Fund (UNICEF) me baleta na veivanua ena muaira ni Sahara mai Aferika ni “38 ga na pasede na gone era se bera ni yabaki 5 e vakarautaki na nodra ivolanisucu.” Ena so na wase ni vanua ya, e vinakati me tiko na “ivolanisucu me rawa nira qaravi vakavuniwai na gone, mera vuli, me tiko tale ga na nodra ivolanisucu na gone luveniyali,” e kaya o Elke Wisch, na ivukevuke ni dairekita ni UNICEF ena tokalau kei na muaira kei Aferika.

Itali

E dikevi ni levu na itabagone mai Itali era rerevaka na veivakasagai ena internet. E 72 na pasede vei ira na yabaki 12 ina 17 era kaya nira sega ni taleitaka. Qori e sivia tale na kedra iwiliwili era rerevaka eso na mataqali wainimate (55 na pasede), o ira era rerevaka na nodra veivakasagai tawakilikili na uabula (44 na pasede), se o ira na rerevaka na mate ca ni veiyacovi (24 na pasede).

Japani

E volai ena niusiveva mai Japani nira sega ni vinakata na itabagone era cakacaka tiko e kea mera vakaitutu. E vasagavulu na pasede era tukuna ni sa sega na dina, sa sivia tale ga na cakacaka vakailawaki. Era kaya e levu ni dau dredre mera vakatututaka na nodra nanuma se veitalanoa kei na nodra iliuliu ni cakacaka. Ni vakatauvatani kei ira na sa cakacaka dede toka, e 60 na pasede na itabagone era cakacaka tiko ga me yacova nira sa kunea e dua tale na cakacaka vinaka.

Brazil

Ena yabaki 1980 ina 2010, e rauta ni 800,000 mai Brazil era lauvana mate. E sivia e 450,000 vei ira qori era yabaki 15 ina 29. E dikevi ena dua na gauna wale ga qo ni vu ni veivakamatei na veiba e vale, veileti kei ira na tiko veitikivi, vuvu, se nodra veiba na draiva.