Na iVola Era Sega ni Taleitaka e Vuqa na iTabagone
“AU NA kila vakacava ni iVolatabu e Vosa dina ni Kalou? Oqo e dua na ivola e sega ni lomaqu meu wilika,” e kaya o Beate, e dua na goneyalewa.
Mai Jamani, na vanua e tiko kina o Beate, e vuqa na itabagone e vaka tale tu ga oya na nodra rai; ra nanuma gona kina ni sega na betena na wili iVolatabu. Ena dua na vakatataro a vakayacori wale tiko ga oqo mai kea, ni tauri vakacaca e kunei kina ni rauta ni 1 na pasede vei ira na itabagone era dau wili iVolatabu wasoma, e 2 na pasede era dau wilika ena so na gauna, e 19 na pasede era dau wilika vakavudua, qai voleka ni 80 na pasede era sega vakadua ni bau wilika. Ena via tautauvata na iwiliwili oqori kei na veivanua tale e so, de na vaka tale ga kina ena nomu vanua. Ia, e matata vinaka ni iVolatabu na ivola era sega ni taleitaka e vuqa na itabagone.
Sa rauta mera sega ni kila na iVolatabu e levu na itabagone! Ena itekitekivu ni yabaki 2000, a volatukutukutaka na niusiveva na Lausitzer Rundschau e dua na vakatataro e vakaraitaka na kedra iwiliwili era kila vinaka na Vunau e Tini, ra qai vakayagataka tale ga me idusidusi ni nodra bula. E kunei ni 67 na pasede vei ira na yabaki 60 se sivia era kila na ivunau qai dusimaki ira tale ga; ia vei ira na yabaki 30 lako sobu, e 28 wale ga na pasede. Io, era lecava e vuqa na itabagone na Vosa ni Kalou.
E So e Duidui Nodra Rai
Ena yasana kadua, era kunea e vica vata na milioni na itabagone ena vuravura raraba ni talei cake sara na Vosa ni Kalou. Me kena ivakaraitaki, o Alexander, e yabaki 19, e dau wili iVolatabu ena veimataka ni bera ni lai cakacaka. A tukuna: “Na sala uasivi cava tale me tekivutaki kina e dua na siga.” E dau nona ivakarau o Sandra me wilika vakalalai na iVolatabu ena veiyakavi. E kaya: “Oqo e tiki ni noqu ituvatuva ni veisiga.” Vaka tale ga kina o Julia, e yabaki 13, sa dau vakamatauni koya me wilika e dua mada ga na wase ni iVolatabu ena veibogi ni bera ni moce. “Au dau marautaka, me noqu ivakarau tiko mada ga ena veigauna sa tu oqo e liu.”
Na cava na rai dodonu qai vukutaki tale ga? E yaga beka me wiliki na iVolatabu? E ka talei cake beka qai bibi vei ira na itabagone? Na cava na nomu nanuma?