“Au Vakadeitaka ni Tiko na Dauveibuli”

O dau lotu ni o se gone?

Io, e lotu Katolika o tinaqu. Ia au sevaka na lotu qai sega ni via vakaitavi ena kena cakacaka niu wilika na veika torosobu e cakava ena veigauna sa oti. Au vakawilika tale ga na ka era cakava eso era sega ni lotu vaKarisito, au raica nira tautauvata vinaka sara ga. Niu yabaki 14, na levu ni cakacaka vakailawaki au raica ena lotu e vakadinadinataka vei au ni sega na Kalou. Na bula vakaidewadewa tale ga au vulica e koronivuli e vakavuna noqu sega ni vakabauta na Dauveibuli.

Na cava o taleitaka kina na veika vakasaenisi?

A soli vei au e dua na iloilo e dau vakalevutaka na ka niu se yabaki vitu, dua na ka noqu taleitaka. Au dau vakadikeva kina eso na manumanu totoka me vaka na bebe kei na so tale na ka.

Na cava o via kila kina na itekitekivu ni bula?

Au sotava e dua na saenitisi e iVakadinadina i Jiova niu se yabaki 22. A vakabauta o koya ni bulia na ka kece na Kalou. Au kidroataka sara ga na tikina qori. Au nanuma niu rawa ni vakacala na nona vakabauta. Ia au kidacalataka na momona ni nona ivakamacala ni sauma na noqu taro. Qori e vakavuna na noqu via kilai ira era vakabauta na Kalou.

Ena vica na vula tarava, au sotava e dua tale na iVakadinadina e buta vinaka ena veika vakavuniwai. Au vakadonuya me vakamacalataka vei au na nona vakabauta niu via kila na vuna era vakabauta kina na Kalou eso. Au nanuma meu vakaraitaka vua ni cala na ka e vakabauta.

O vakadeitaka rawa vua ni cala na ka e vakabauta?

Sega. Au mani vakadikeva na veika me baleta na itekitekivu ni bula. Au kurabuitaka nira kaya eso na saenitisi rogo ni sega ni rawa ni basika e vuravura eso na sela nira sa rui vereverea. Eso vei ira e vakabauta ni sela qori era vu mai maliwalala. E duidui vakalevu na rai me baleta na itekitekivu ni bula.

E dua na ka era bau duavata kina na saenitisi?

Era duavata e levu na saenitisi ni so na ka e yaco e vuravura e vakavuna na kena tekivu na bula mai na dua na kamate. Au lomatarotarotaka, ‘Era na vakadeitaka vakacava ni yaco dina qori, ke ra sega mada ga ni kila se tekivu rawa vakacava na bula ke sega na Dauveibuli?’ Au mani vakadikeva na ka e tukuna na iVolatabu me baleta na itekitekivu ni bula.

Na cava o qai vakadeitaka me baleta na iVolatabu?

Ni toso na noqu vulica na iVolatabu, au sa qai vakadeitaka ni dina na ka e tukuni kina. Kena ivakaraitaki, era sa qai raica tiko ga qo na saenitisi na ivakadinadina ni a buli na vuravura. Ia sa tukuni makawa tu qori ena imatai ni iwase kei na imatai ni tikina ena iVolatabu, a volai ena rauta na 3,500 na yabaki sa oti: “Enai vakatekivu sa bulia na lomalagi kei vuravura na Kalou.”a Au dikeva tale ga ni donu na veika vakasaenisi e tukuna na iVolatabu.

E vakadredretaka beka na nomu vakabauta na Kalou na kilaka vakasaenisi?

Sega. Sa tolu toka na yabaki na noqu vulica na veika vakasaenisi ena univesiti ena gauna au tekivu vakabauta kina na Kalou. Na levu ga ni noqu vulica na veikabula ena gauna qo, na levu tale ga ni noqu vakadeitaka ni tiko na Dauveibuli.

Tukuna mada eso na kena ivakaraitaki.

Sa donu. Au vakadikeva na revurevu ni wainimate kei na waigaga ena veikabula. E vakatubuqoroqoro vei au na kena taqomaki na noda mona mai na veika e veivakaleqai kei na beketiria. E tiko e dua na ilati e wasea na dra mai na noda sela ni mona.

Na cava e vakasakiti kina qori?

Ena duanadrau vakacaca na yabaki sa oti, era raica na dauvakadidike ni so na ka e curuma na salanidra e drodrova na yagoda taucoko vakavo na noda mona kei na noda suitu. E vakasakiti vei au qori ni dua na cakacaka levu era cakava na salanidra lalai kece e yagoda me vakadrodroya na dra ina sela kece ni mona. Ia ena vakasavasavataki e liu na sela kece ni mona, vakani qai wakivata kei na cagi bulabula e pamutaka na dra. E rawa vakacava me sega ni drodrova noda sela ni mona na dra? A sega tu ni kilai qori me vica vata na yabaki.

Na cava e cakava na ilati?

Na salanidra lalai ena yago e sega ni vaka na tavaya palasitika me wasea na ka e tuba mai na ka e loma. Na ka e vaka tiko na lalaga ni salanidra e caka mai na sela. Na sela qori e vakarawarawataka nodra curu basikata na lalaga na veika e yaga ena yago kei na kena e sega, vaka kina na beketiria. Ia e duidui na sela e buli kina na salanidra ena mona. Era veisemati vinaka na salanidra qori me vaka na viritalawalawa. E veivakurabuitaki na sela qori kei na kedra ilati. Na vereverea ni ituvatuva ni sela e sega kina ni vakaleqa na kena veidrodroyaki ena salanidra kei na mona eso na ka me vaka na cagi bulabula, na kasi na carbon dioxide, kei na suka na glucose. Ia ena sega ni vakadrodroi na ka ena rawa ni vakaleqa na mona. E itataqomaki gona na ilati e wasea na dra mai na noda mona. Au vakabauta ni dua e buli ira mera cakava qori.