Veidokai ni o Vakauitukutuku

ITUVAKI DREDRE

Na cava o na cakava ni dua e vakauitukutuku mai ena nomu talevoni ni drau veitalanoa tiko kei nomu itokani?

1. Wilika ni drau se veitalanoa tiko.

2. Tukuna “vosoti au” qai wilika.

3. Kua ni kauaitaka, tomana tiko ga nomudrau veitalanoa.

Vakacava e bibi na vakatulewa o na cakava? Io!

KA MO KILA

Nomu vakauitukutuku ena talevoni ni drau veitalanoa tiko kei nomu itokani, e vaka o qitora tiko e dua na qito o taleitaka, ia o sega ni muria na kena lawa. O na rairai kaya, ‘qo noqu itokani ga.’ Ia e bibi mo vakaraitaka na veidokai. E sega ni kena ibalebale qori mo yalodredre. Dikeva na ka e rawa ni yaco: Ena sega ni dua ena via veitokani tale kei iko ke o sega ni dau veidokai.

Na vuna? Nira sega ni dau taleitaka e levu mera beci. E kaya e dua na goneyalewa o Beth,a “E dau vakararawataki au ni raica toka nona talevoni e dua na noqu itokani ena gauna au vosa tiko kina vua!” Vakacava ena vinakata o Beth me rau veitokani tiko ga?

Dikeva tale mada na ulutaga “iTuvaki Dredre.” Evei o nanuma ni vinaka me muri? Sega ni vakabekataki ni A e sega ni itovo vinaka. Ia vakacava na B kei na C? Vakacava e veibeci ke o wilika na itukutuku ni drau se veitalanoa tiko kei na dua? Se veibeci ke o sega ni kauaitaka na itukutuku qori qai tomana tiko ga nomudrau veitalanoa?

Dikeva ni dredre mo vakaraitaka na itovo vinaka. Ia e rawa ni vukei iko na iVolatabu. E kaya: “Na ka tale ga oni vinakata mera cakava vei kemuni na tamata, moni cakava tale ga vei ira.” (Luke 6:31) O na muria vakacava na ivakavuvuli qori ni o vakauitukutuku ena talevoni?

KA O RAWA NI CAKAVA

Vakauitukutuku ga ena gauna veiganiti. E kaya e dua na cauravou o Richard: “Eso era dau vakauitukutuku mai ena lomaloma ni bogi. Era sega ni itukutuku bibi ra qai veivakasosani!” Taroga iko mada, ‘Au dau vakauitukutuku ena gauna era sa moce kina na tamata?’—iVakavuvuli vakaivolatabu: Dauvunau 3:1.

Qarauna na vosa o vakayagataka. Na veivosaki e okati kina na itautau ni vosa, rairai ni matada, kei na noda moimoi. Na veika kece qori e sega ni laurai nida vakauitukutuku. Na cava gona mo cakava? E vakatututaka o Jasmine, dua na goneyalewa yabaki 23: “Vakaraitaka na itovo vinaka e kilai levu. “Taroga va qo, ‘Sa vakacava tiko?’ kei na so tale na vosa me vaka ‘kerekere kei na ‘vinaka vakalevu.’”—iVakavuvuli vakaivolatabu: Kolosa 4:6.

Yalomatua. Dikeva tale na ulutaga “iTuvaki Dredre.” Ke o namaka tiko e dua na itukutuku bibi, e vinaka mo kerei nomu itokani mo wilika mada. Ia e levu na gauna, e vinaka mo kua ni wilika. E kaya o Amy, dua na goneyalewa yabaki 17: “Ena sega ni dro na nomu talevoni, ena dro ga na nomu itokani ke o wilika na itukutuku ni drau veitalanoa tiko.” O na vakaraitaka tale ga na yalomatua ena gauna era tiko kina e levu. E tukuna o Jane, dua na goneyalewa yabaki 18: “Kua ni vakauitukutuku ena gauna era tiko kina e levu. Baleta ena vakaraitaka ni o sega ni kauaitaka ira, o vinakata tale ga mo gole ena dua na vanua e vinaka cake.”

Vakasama e liu. Vakacava e rawa ni tauri cala na itukutuku o vakauta? Ena donu beka na ivakarau ni yalo o via vakavotuya ke o vakayagataka na ivakatakilakila se emoticons? E kaya o Amber, dua na goneyalewa yabaki 21: “Ke o veiwali, biuta na ivakatakilakila ni matadredredre. E levu era taura cala na ivakatakilakila e vakau vei ira, e vakavu rarawa, tini sara ena veiba.”—iVakavuvuli vakaivolatabu: Vosa Vakaibalebale 12:18, NW

Koya gona, e bibi mo vakaraitaka na veidokai ni o vakauitukutuku ena talevoni!

Me vakasamataki: Na itovo vinaka e yavutaki ena loloma. Ena vakaraitaki vakacava na itovo qori? E tukuna na iVolatabu: “Na loloma e vosota vakadede qai yalovinaka. Na loloma e sega ni vuvu, e sega ni tukutukuni koya, e sega ni dokadoka, e sega ni cakava na ka e sega ni kilikili, e sega ni kauaitaka ga na ka e baleti koya, e sega ni cudrucudru. E sega ni katona na ca.” (1 Korinica 13:4, 5) Na ivakaraitaki ni loloma cava o kila e vinakati mo cakacaka kina?