Sala mo Kaya Kina, Sega

ITUVAKI DREDRE

Ke o vakasega vei luvemu, ena dre ga nona mua. Nona cikecike ena vakatovolei kina na nomu dei se sega ena nomu vakatulewa. Ia o vakaceguya nona gagadre ni vakasosani iko nona cikecike. Se baci rawa tale na yalomu. Na kaukaua ni nomu vakasega ena imatai ni gauna e sa vuki me io ni voraki.

Ia o rawa ni tinia na ivakarau qori. Dikeva mada e so na ka e vauca na nomu vakasega.

KA MO KILA

Kua wale ga ni vakasega. Era kaya eso na itubutubu ni sega ni rauta mo vakasega wale ga. Ia e vinaka mo veivosakitaka se vakamacalataka vei luvemu na vu ni nomu vakatulewa. Qori ena sega ni vakacudrui koya.

Dina ni na rarawa o luvemu ni o “vakasega,” ia ena vulica o koya e dua na lesoni bibi. Oya ni na sega ni yaco tu ga ena veigauna kece na ka eda vinakata. Ena yasana adua, ke o vakaceguya nona gagadre ena sega ni dokai iko o luvemu, ena rawa tale ga na yalomu ni vinakata e dua na ka. Ke o qai vakasega ena dua tale na gauna, sa na cati iko o koya. Vakasamataka mada: Me doka vakacava o gone e dua na itubutubu e dau rawai rawarawa?

Na nomu vakasega ena vakayalomatuataki luvemu. Nomu vakasega vei luvemu ena vakavulici koya me dau vakuai koya ena so na ka. Qori ena vukei koya ena nona bula vakaitabagone, ena sega kina ni rawai ena idre ni veimurimuri me veiyacovi tawadodonu se vakayagataka na wainimategaga.

Nomu vakasega ena vakarautaki koya tale ga ni bera ni yaco me uabula. E vola o Vuniwai David Walsh, “ni uabula ena kila ni sega ni dau yaco kece na ka e vinakata. Eda na sega ni vukei ira na luveda mera matua ke da vakacegui ira ena ka kece ga era vinakata.”a

KA O RAWA NI CAKAVA

Mo dei ena nomu isausau. Sega ni vakabekataki ni o vinakata mo vakarautaki luvemu me walia na ituvaki cava ga e basika, me lewa rawa na yalona, me matua tale ga. Ia ena seva na inaki qori ke o dau vakaceguya nona gagadre ena ka kece e cikeva. E kaya na iVolatabu ke “vakamenemenei na dauveiqaravi ni se gone, ena sega ni dau vakavinavinaka ena gauna mai muri.” (Vosa Vakaibalebale 29:21, NW) Koya gona, na vakasega e dua na ivakarau ni veivakavulici e yaga. Ena yaga vei luvemu, ena sega ni mate kina.​—iVakavuvuli Vakaivolatabu: Vosa Vakaibalebale 19:18.

Ni o vakasega, kua tale ni lomalomarua. O luvemu e dodonu me vakarorogo vei iko. Kena ibalebale e sega ni vinakati nona veivakadonui ena vakatulewa o cakava. E bibi tale ga me ‘vakavulici nona vakasama me vakaduiduitaka na ka e donu mai na ka e cala.’ (Iperiu 5:14) Koya gona, e sega ni ca ke o vakamacalataka vei luvemu ena so na gauna na nomu vakatulewa. Ia drau kua ga ni veibataka na vuna o vakasega kina. Ni na rawa ni nanuma o luvemu ni o lomalomaruataka nomu vakatulewa.​—iVakavuvuli Vakaivolatabu: Efeso 6:1.

Dei ena nomu vakatulewa. Ena rawa ni cike toka ga o luvemu me raica se o na dei ena nomu vakatulewa se sega. Ke yaco qori e vale, cava mo cakava? E kaya na ivola na Loving Without Spoiling, “Vakatalai luvemu ena nomu kaya vua, ‘Au sega ni via rogoca nomu cudru. Lako ina rumu. Lai tu e kea me yacova ni sa oti nomu cudru.’” Ena rairai dredre mo vakayacora qori ena imatai ni gauna​—vaka tale ga kina o luvemu. Ia nomu cakava qori ena raica kina o luvemu ni o dei ena nomu vakatulewa, sa na sega ni cike wasoma.​—iVakavuvuli Vakaivolatabu: Jemesa 5:12.

Mo Yalorawarawa. Kua ni vakasega wale ga mo vakaraitaka kina nomu lewai koya. Ia “me kilai nomuni yalorawarawa.” (Filipai 4:5) Ena so na gauna e dodonu mo vakaio ke veiganiti na ka e vinakata. Ia kua ga ni vakaio ena levu ni nona cike.​—iVakavuvuli Vakaivolatabu: Kolosa 3:21.