VEIYASA I VURAVURA

Vuravura

E kaya na isoqosoqo e baleti ira na gone na Save the Children International, nira “matedole e veiyabaki e voleka ni 3 na milioni na gone ni bera mada ga nira vula dua. Levu era mate ena imatai ga ni siga era sucu kina.”

Peritania

A dikeva na tabana ni bula e Igiladi ni levu era mate ena cagi gaga ena 2011 ena 15 na yasayasa e Lodoni. E tukuni tale ga ni waiwai ni idini na diesel e sega ni vakacacana vakalevu na itikotiko, sega tale ga ni kaburaka e levu na cagi gaga ni vakatauvatani kei na vo ni waiwai. Ia e laurai ni 91 na pasede ni cagi gaga e dikevi ena vanua qori e kaburaka na lori e vakayagataka na waiwai na diesel.

Rusia

Ena 2013, a vakataroga nodra nanuma na lewenivanua e Rusia e dua na isoqosoqo na Public Opinion Foundation. E laurai ni 52 na pasede ni lewenivanua era lotu Orthodox era se sega ni bau wilika na iVolatabu qai 28 na pasede era kaya nira dau masu vakavudua.

Aferika

E kaya na baqe na World Bank ni kena dau veibataki na qele e Aferika e vakavuna me sega ni caka na teitei, ra dravudravua kina e levu. E dodonu me levu na kakana e rawati, ia na veibataki ni qele e sega ni teivaki kina e 500 na milioni na eka.

Merika

Levu na koronivuli kei na univesiti e Merika e sa sosomitaka na nodra ivolanivuli na gone ena kompiuta lalai na tablet. E porokaramutaki me tiko kina na ka ni vuli kece. A nanumi ni sau lailai ni vakatauvatani kei na voli ivola, ia kena irairai ni sega ni vaka kina.