Ni Lasu o Luvemu

ITUVAKI DREDRE

A qito tiko ena rumu o luvemu yabaki lima. O kidacala ni o rogoca ni kavoro e dua na ka. Totolo sara nomu lai raici koya, o raica ni sa kavoro na itutu ni senikau. O raica na matana o kila na ka e yaco.

O karaci luvemu “O voroka na itutu ni senikau?”

E totolo ga nona sauma “Sega Na, au sega ni cakava!”

Qo e sega ni imatai ni gauna a lasutaki iko kina o luvemu yabaki lima. Vakacava e dodonu mo kauai?

KA MO KILA

Tabu na lasu. E tukuna na iVolatabu ni cata na Kalou o Jiova na “yame daulasu.” (Vosa Vakaibalebale 6:16, 17) Ena Lawa a soli vei ira na Isireli e vakatabui kina mera veivakacalai.—Vunau ni Soro 19:11, 12.

Eso na lasu e ca sara. Eso na lasu e cavuti ena inaki me vakaucacataki kina e dua. Eso tale era lasu ni yaco e dua na ituvaki, kena rairai mera kua kina ni vakamaduataki se totogitaki. (Vakatekivu 18:12-15) Na lasu kece e ca, ia e tiko eso na lasu e ca sara. Ni lasu o luvemu, e vinaka mo vakasamataka nona yabaki ni bula kei na vuna e lasu kina.

Vakavulici luvemu ni se gone. E vola na Vuniwai o David Walsh, “E bibi mera vulica na gone mera daudina, veitalia ke dredre ena so na gauna. Ena dei na veiwekani ke tiko na veinuitaki, ia na lasu e vakaseva qori.”a

Kua ni yalolailai. Ni lasu o luvemu e sega ni kena ibalebale ni na lai ca mai muri. Nanuma tiko ni tukuna na iVolatabu: “A ka lialia sa vauci e lomana na gone.” (Vosa Vakaibalebale 22:15) Sa rauta mera dau lasu kina eso na gone, nira nanuma mera levea na itotogi ena tau. Na cava gona o na cakava ni yaco qori?

KA O RAWA NI CAKAVA

Saga mo kila na vuna e lasu kina. E rerevaka na itotogi? E sega ni via vakacudrui iko? Ni buli talanoa o luvemu mera qoroi koya kina nona itokani, de dua e se yalowai, se sega tale ga ni vakaduiduitaka rawa na dina mai na lasu. Koya gona, ena rawarawa nomu vakadodonutaki luvemu ke o kila na vuna e lasu kina.—iVakavuvuli vakaivolatabu: 1 Korinica 13:11.

Kua ni taro ena so na gauna. Ena ituvaki e vakamacalataki mai cake, sa kila rawa tu o tina na ka e yaco, ia e taro ga ena cudru: “O voroka na itutu ni senikau?” A lasu o gone ni rairai rerevaki tinana. De vinaka me kua ni taro o tina, ia me kaya ga vakadodonu, “O sa voroka na itutu ni senikau” mai na nona taro. Ke sega ni taro, ena sega ni temaki o gone me lasu—sa vukei koya tiko kina me daudina.—iVakavuvuli vakaivolatabu: Kolosa 3:9.

Vakavinavinakataki koya ni tukutuku vakadodonu. Era dau vinakata na gone mera vakamarautaki ira nodra itubutubu, vakayagataka vinaka qori. Tukuna vua ni vakabibitaki e vale na daudina, qori tale ga na ka e namaki vua.—iVakavuvuli vakaivolatabu: Iperiu 13:18.

Vakamatatataka vua ni na sega ni nuitaki ke dau lasu, ena taura tale ga na gauna me nuitaki tale. Ni o vakavinavinakataki koya ni tukutuku vakadodonu, o sa vukei koya tiko me vinaka nona itovo. Kena ivakaraitaki, o rawa ni kaya, “E vakamarautaki au ni o tukutuku vakadodonu.”

Mo ivakaraitaki. O na sega ni namaki luvemu me daudina ke rogoca ni o kaya, “Tukuna vua au sega ni tiko e vale” ni o sega ni via vosa ena talevoni se “Au tauvimate,” ia kena dina o via vakacegu.—iVakavuvuli vakaivolatabu: Jemesa 3:17.

Vakayagataka na iVolatabu. Na italanoa dina kei na ivakavuvuli e tiko kina e uqeta na daudina. O rawa ni vakavulici luvemu ena ivakavuvuli vakaivolatabu ni o vakayagataka na ivola Vuli Vua na Qasenivuli Levu, tabaka na iVakadinadina i Jiova. Na ulutaga ni Wase 22 “Na Cava Meda Kua Kina ni Lasu,” (E vica na tikina e lavetaki tiko ena kato “iVola ena Yaga Vei Luvemu.”) Sa tiko tale ga ena www.pr2711.com na