Tadra e Vakavuna na Kalou

E dau vakasavu itukutuku na Kalou ni vakayagataka na tadra?

“Sa tadra ko Taniela [parofita ni Kalou] . . . e na nonai mocemoce: Sa qai vola na tadra ko koya, ka tukuna na kenai lakolako.”​—Taniela 7:1.

KA E KAYA NA IVOLATABU

E levu na sala e dau vakasavuya kina na itukutuku bibi na Kalou vua na tamata. Ena gauna vakaivolatabu, e dau vakayagataka na tadra. Ia na tadra qo e sega ni vaka na tadra ni veisiga. Na tadra e vakavuna na Kalou e sega ni dau vereverea, e veisemati vinaka qai matata na kena ibalebale. Kena ivakaraitaki, a tadra na parofita o Taniela na veimataqali manumanu kila e vakatayaloyalotaka na veiliutaki vakapolitiki me tekivu mai vei Papiloni me yacova noda gauna. (Taniela 7:1-3, 17) A vakayagataka tale ga na tadra na Kalou me tukuna vei Josefa na kai Nasareci, na tama i Jisu vakacabecabe, me dro i Ijipita kei rau nona veitinani. Mani vakabulai kina o Jisu mai na ligai Eroti na Tui dauveivakasaurarataki. A vakayagataka tale na tadra na Kalou me tukuna vei Josefa ni sa mate o Eroti, me ratou suka tale ina nodratou vanua.—Maciu 2:13-15, 19-23.

Vakacava nikua e dau vakasavu itukutuku na Kalou ni vakayagataka na tadra?

“Muria ga na ka e volai, kua ni kuria.”​—1 Korinica 4:6.

KA E KAYA NA IVOLATABU

Na tadra era volaitukutukutaki ena iVolatabu e sala e dau vakasavu itukutuku kina na Kalou vei keda na kawatamata. E tukuna kina na 2 Timoci 3:16, 17: “E vakavuna na Kalou na volai ni iVolatabu kece, e yaga me veivakavulici, me veivunauci, me veivakadodonutaki, me veidusimaki ena ka e dodonu, me vakarautaki vinaka kina na tamata ni Kalou, me tu vakarau tale ga me vakayacora na cakacaka vinaka kece.”

Dua na sala e ‘vakarautaki’ keda kina na iVolatabu oya ni vakatakila na veika me baleta na Kalou, nona itovo, nona ivakatagedegede, kei na sala eda okati kina ena nona inaki me baleta na vuravura. Koya gona, sa sega ni veiganiti nikua me vakayagataka na Kalou na tadra me vakasavu itukutuku kina vei keda. Ke da via kila na veika me baleta na gauna se bera mai kei na ka sa nakita tu vei keda na Kalou, e dodonu meda “muria ga na ka e volai” ena iVolatabu. Kena ikuri, e tu vakarawarawa vei keda kece na iVolatabu eda rawa gona ni vulica kina na veika e vakatakila na Kalou, okati kina na tadra.

Cava mo vakabauta kina na tadra kei na raivotu e tu ena iVolatabu?

“E tukuna ga na tamata na ka e vinakata na Kalou ena veiuqeti ni yalo tabu.”—2 Pita 1:21.

KA E KAYA NA IVOLATABU

Levu na tadra kei na raivotu e volaitukutukutaki ena iVolatabu era tukuna na veika e se bera ni yaco. Nodra vola na veiparofisai qo na dauvola iVolatabu e bibi. Baleta ke qai sega ni yaco na ka era vola, era sa na sega ni qai nuitaki, sega tale ga ni nuitaki na iVolatabu. Vakacava e qai yaco na ka era vola? Dikeva na ivakaraitaki ni raivotu e volai ena Taniela 8:1-7. A yaco na raivotu qori ni bera ni bale na matanitu kaukaua o Papiloni.

E laurai ena raivotu qori ni vakabalea na sipi tagane e dua na me tagane. E sega ni kila o Taniela na ibalebale ni raivotu. Sa qai kaya vua na agilosi ni Kalou: “A sipi tagane ko a raica ka rua na kenai leu, koi rau na tui Mitia kei na tui Perisia. Ia na me vutivuti, sai koya na tui Kirisi.” (Taniela 8:20, 21) E laurai ena itukutuku ni veigauna sa oti ni matanitu qaqa me taravi Papiloni o Mitia kei Perisia. Ia ni oti e ruanadrau na yabaki, a vakabalei Mitia kei Perisia o Alekisada na Ka Levu mai Kirisi. Na ivakaraitaki vakasakiti qori e vakadinadinataka nira donu na parofisai kei na tadra ena iVolatabu. Qori e vakadeitaka ni duatani na iVolatabu ni vakatauvatani kei na ivola tale eso, e rawa tale ga nida nuitaka.