ULUTAGA LEVU | CAVA NA MARAU DINA?
O na Kila Vakacava na Marau Dina?
Vakasamataka mada e vica na ituvaki qo.
O cei vei ratou qo o rawa ni kaya ni marau dina?
ELIKI
E vakabisinisi. E daudina, e cakacaka vakaukaua qai turaga vakaitovo. E toso vinaka nona bisinisi, e qarava vinaka tale ga nona vuvale.
TOMASI
E tautauvata nona bisinisi kei Eliki, ia e levu sara na ilavo e rawata o Tomasi. E rawata qori ni bobula ina nona cakacaka ia e vakavuna tale me tautauvimate.
RUCI
Se tiko ena paraimari, e taleitaka qai qacoya nona ka ni vuli. E maka vinaka ena veitarogi.
ELENI
E levu sara na maka e dau rawata, raici tu me gone vuku—ia e dau lawaki ena gauna ni veitarogi, sega tale ga ni raica vakabibi na vuli.
Ke o kaya ni rau marau dina o Tomasi kei Eleni—se o ratou na le va qo—o rairai nanuma ni vakatau tiko nodratou marau ena ka e rawati, se mani sala cava e muri me rawati kina.
Ia ke o digi Eliki kei Ruci, o na rairai nanuma ni nona itovo e dua kei na ivakarau ni nona cakacaka e vakatau kina nona marau. E donu na rai qori. Vakasamataka mada qo:
Na cava ena yaga ena nona bula mai muri o Ruci—me rawata na maka vinaka duadua ena nona veitarogi se me vulica me taleitaka na vuli?
Cava e bibi ina nodratou bula na luvei Eliki—me ratou vakailavo me voli kina na ka kece ratou vinakata se dua na tama e kauaitaki ratou qai via vakayagataka nona gauna vei ratou?
Kena itinitini ga qo: Na marau dina e sega ni yavutaki ena ka e taukeni, ia e yavutaki ga ena itovo vinaka.