Mavo ga Vakataki Koya na Mavoa e Yagoda

E DUA na ka e dau veivuke ena noda bula oya na kena rawa ni mavo ga vakataki koya na mavoa e yagoda, qai vakavinakataka na sela era vakacacani. E tekivu yaco qori ena gauna ga eda mavoa kina.

Vakasamataka mada: Na mavo ni mavoa e rawati ga ena cakacaka ni sela vereverea e tiko e yagoda:

• Na iwasewase ni dra lelevu na platelet e dau drodrova na vanua e mavoa, oti qai cevata me ubia na sala ni dra era sa vakacacani tu.

• Na gauna e rara se damudamu kina e tekivu cakacaka na yago me taqomaka me kua ni curumi gaga, ena kauta tani tale ga eso na manumanu somidi e vakavuna na mate era curuma na mavoa.

• Ena vica ga na siga, ena saga na yago me sosomitaka na lewe era mavoa, me mavo na mata ni mavoa qai vakavinakataka na sala ni dra.

• Oti qori ena buli koya tale vakavinaka na tikiniyago sa mavoa tu qai vakaukauataka na vanua era vakacacani.

Mai na ka era vulica na dauvakadidike ena kena dau cevata na dra, era saga gona mera bulia e dua na mataqali palasitika e rawa ni “vakavinakataki” koya ga ena gauna e ca kina. E buli vakamatau e loma eso na tiuvu somidi qai biu kina e rua na wainimate. Ni ca se kabasu na palasitika ena “drodro” yavoki na wainimate e rua qori. Rau na qai veiwaki me yacova ni rau sa weliwelia, ena drodrova sara yani na vanua e vakacacani me botani kina. Na gauna sa cevata vinaka kina, ena kaukaua tale na vanua e ca me vaka ga e liu. E kaya e dua na dauvakadidike ni kena mataqali qo e “tautauvata” kei na ka sa vakadinadinataki oti ena veika bula, ia se vakatovotovotaki tiko ga.

Cava o nanuma? E bula vakaidewadewa se buli na kena rawa ni mavo ga vakataki koya na mavoa?