Ka me Caka ni Veisau na iTuvaki

ITUVAKI DREDRE

• Dou sa na toki ni sa lai cakacaka ena dua tale na vanua o nomu Ta.

• Vakarau gole vakayawa na nomu itokani dredre.

• Vakarau vakamau o tuakamu.

Na cava o na cakava ni veisau va qori na ituvaki?

Ke muria na liwa ni cagi na veisuayaki ni dua na vunikau, ena sega ni bale ena gauna ni draki ca. O rawa ni vaka tale ga na vunikau qori ni yaco eso na veiveisau o sega ni cakava rawa kina e dua na ka. Ena vakamacalataki ena ulutaga qo na ka mo cakava ena gauna va qori. Ia meda raica mada e liu eso na ka me nanumi tiko me baleta na veiveisau e dau yaco ena noda bula.

KA MO KILA

Sega ni levei rawa na veisau. E kaya na iVolatabu ni ‘dau yacovi keda kece na ka e sega ni namaki.’ (Dauvunau 9:11) Eda na vakadinadinataka kece ena dua na gauna na vosa qori. Ni veisau na keda ituvaki ena so na gauna, eda na rairai sotava na veika ca. Eso tale na veiveisau a rairai ca mai na kena itekitekivu e dau qai vinaka ni toso na gauna. Ia era vakila e levu na yaga ni nodra muria e dua na ituvatuva se mani vinaka se ca na veiveisau e yaco ena nodra bula.

Vakavu lomaocaoca vei ira na itabagone na veiveisau. Na vuna? E kaya e dua na cauravou o Elikia: “O sa vakila rawa tiko na veiveisau e yagomu. Na veisau ni ituvaki sa dau qai ikuri ga ni lomaocaoca.”

Ni yaco na veiveisau vei ira na uabula, era rawa ni vakasamataka lesu na veika era cakava ena ituvaki vata ya ena veigauna sa oti. Ia era se sega ni qaseta na bula na itabagone. Qori e dua tale na vuna e dau vakavu lomaocaoca kina vei ira na veiveisau e yaco ena nodra bula.

O rawa ni vosota. E bibi me donu na nomu rai me baleta na ituvaki dredre o sotava se na veiveisau e yaco ena nomu bula. Qori ena vukei iko mo vosota na ituvaki o se qai sotava vakadua, mo kua tale ga ni soro ni o sotava na ituvaki dredre. Ke donu na nodra rai na itabagone, era na sega ni nanuma ni iwali ni nodra leqa na wainimategaga se alakaolo.

KA O RAWA NI CAKAVA

Ciqoma na veisau. Eso na ka e yaco ena nomu bula o na sega ni cakava rawa kina e dua na ka. Kena ivakaraitaki, ena toki se vakamau na nomu itokani, biubiu mai vale o tuakamu, dou na rairai toki vakavuvale ena vuku ni so na ituvaki, sa ra na biu tu mai na nomu itokani kei na veika o dau marautaka tu kei ira. E vinaka mo ciqoma na veiveisau e yaco ena nomu bula, kua ni vakalaiva me vakayalolailaitaki iko.​—iVakavuvuli vakaivolatabu: Dauvunau 7:10.

Vakanamata ina veigauna se bera mai. Na nomu dau vakasamataka na veika sa yaco oti e vaka ga ni o draiva o qai rai tiko i muri. E vinaka ena so na gauna na railesu, ia e bibi mo rai tiko ga i liu. Ni yaco tale ga na veiveisau ena nomu bula, kauaitaka ga na veika o rawa ni cakava ena gauna se bera mai. (Vosa Vakaibalebale 4:25) Kena ivakaraitaki, vakasamataka na isausau cava o na via rawata ena loma ni tolu se ono na vula mai qo.

Rai donu. E kaya e dua na goneyalewa o Loraini ni bibi me donu na nomu rai. Vakasamataka na yaga ni veisau e yaco ena nomu bula, na veika o rawa ni cakava ena kemu ituvaki vou.​—iVakavuvuli vakaivolatabu: Dauvunau 6:9.

E vakasamataka lesu e dua tale na goneyalewa o Vika na nodra toki kece na nona itokani dredre ni se itabagone. E kaya: “Dua na ka noqu galili, au diva ga me a kua ni veisau na ituvaki. Ia niu railesu, na veisau ya e vakayalomatuataki au. Au vakadeitaka kina ni yaga ena noda bula na veiveisau e dau yaco, era tu wavoliti au tale ga eso tale na itokani vou.”​—iVakavuvuli vakaivolatabu: Vosa Vakaibalebale 27:10.

Dauveikauaitaki. E kaya na iVolatabu meda kua ni ‘kauaitaka ga na ka e baleti keda, meda kauaitaka tale ga na ka e baleti ira tale eso.’ (Filipai 2:4) Ena yaga vakalevu vei iko na nomu vukei ira eso tale ena nodra leqa. E kaya o Ana e yabaki 17: “Niu tubu cake tiko, au sotava eso e tautauvata na keimami ituvaki, kei na so tale e ca sara na veika era sotava. Gauna au vukei ira kina ena nodra leqa, dua na ka noqu marau!”