1 Dau Veisau na iTuvaki

Na kukuna e rawa ni vakatauvatani ina nomu musuka na domomu me oti kina na mosi ni ulumu. Ena rairai dredre toka me vakabauti, ia e rawa ni lekaleka ga e dua na ituvaki rarawataki se dua na ituvaki o sega ni cakava rawa kina e dua na ka. E rawa sara ga ni veisau vakasauri me vinaka.—Raica na kato “Veisau na Kedratou iTuvaki.”

Ke sega mada ga ni veisau na ituvaki, kua ni saga mo walia kece nomu leqa ena dua na siga. E kaya o Jisu: “Mo kua sara ni lomaocaocataka na siga nimataka, ni veisiga yadua ena tu vata kei na kena lomaocaoca. Na siga yadua e sa dui tu ga na kena ca.”—Maciu 6:34.

Vakacava ke sega ni veisau na kemu ituvaki? Kaya mada ke o tauvimate bibi se vakayalolailaitaki iko e dua na ituvaki o sega ni lewa rawa, me vaka na kavoro ni vakawati se ni takali e dua na wekamu lomani?

Dua na ka o rawa ni veisautaka ena ituvaki va qori: na nomu rai. Ena donu na nomu rai ke o saga mo ciqoma na ituvaki o sega ni cakava rawa kina e dua na ka. (Vosa Vakaibalebale 15:15) O na sega tale ga ni vakasamataka me iwali ni nomu leqa na mate, ia o na vaqara eso tale na sala mo walia kina. Ni o cakava qori, o sa veisautaka rawa nomu rai me baleta e dua na ituvaki o sega ni cakava rawa kina e dua na ka.—Jope 2:10.

NANUMA TIKO: O na sega ni rawa ni kalawa ga vakadua mo sa yaco ena dela ni ulunivanua, ia ena rawa ke o saga vakamalua. Me va tale ga qori na nomu rai me baleta na leqa o sotava, ke mani vaka mada ga na ulunivanua.

KA O RAWA NI CAKAVA: Veitalanoa kei na dua na nomu itokani se lewe ni vuvale me baleta na kemu ituvaki. Ena donu kina nomu rai me baleta na ka o sotava tiko.—Vosa Vakaibalebale 11:14.