1. Me Beitaki na Kalou ni Vakavuna Noda Rarawa?

Vuna e Bibi Kina

E levu era sega ni qarava na Kalou nira beitaki koya ni vakavuna tiko na rarawa.

Vakasamataka Mada

Era vakavuvulitaka e levu na iliuliu ni lotu ni vakavuna na Kalou noda rarawa. Kena ivakaraitaki, eso era kaya:

• Ni itotogi ni Kalou na leqa tubukoso.

• Era mate na gone ni vinakata na Kalou e levu tale na agilosi mai lomalagi.

• E dau veitovaki na Kalou ena gauna ni ivalu, qori e vakavuna vakalevu na noda rarawa.

Ia vakacava e rawa ni cala na ka era vakavuvulitaka na iliuliu ni lotu me baleta na Kalou? Vakacava ke sega ni vakadonui ira na Kalou?

Ka e Kaya na iVolatabu

E sega ni vakavuna na Kalou noda rarawa.

Ke vakavuna, ena veicalati kei na nona itovo e volai tu ena iVolatabu. Kena ivakaraitaki:

“Ni dodonu na sala kece [ni Kalou] . . . E yalododonu qai daudina o koya.”—VAKARUA 32:4.

“E sega ni rawa vua na Kalou dina me caka ca, me cala o koya e Kaukaua Duadua!”—JOPE 34:10.

“E sega ni dau vakatanitaka na lewadodonu o koya e Kaukaua Duadua.”—JOPE 34:12.

Na Kalou e cata na lotu e sega ni tukuna na ka dina me baleti koya.

E wili kina na lotu era vakavulica ni vakavuna na Kalou noda rarawa, ra qai veitokoni ena ivalu kei na itovo kaukaua.

“Era parofisaitaka tiko na parofita na ka lasu ena yacaqu [Kalou]. Au sega ni talai ira, se vakaroti ira, se vosa vei ira. Era parofisaitaka tiko vei kemuni na raivotu lasu . . . kei na veivakaisini ni lomadra.”—JEREMAIA 14:14.

E cata o Jisu nodra veivakaisini na lotu.

“Era na sega ni curu kece ina Matanitu vakalomalagi o ira era tukuna vei au, ‘Turaga, Turaga,’ o koya ga e cakava na loma i Tamaqu mai lomalagi. Levu era na tukuna vei au ena siga ya, ‘Turaga, Turaga, keimami a sega ni parofisai ena yacamuni, qai vakasavi ira na timoni ena yacamuni, keimami cakava tale ga e levu na cakacaka veivakurabuitaki ena yacamuni?’ Au na qai tukuna vei ira: ‘Au sega sara ga ni kilai kemuni! Ni lako tani, o kemuni na daucaka ca!’”—MACIU 7:21-23.