4. E Dodonu Meda Sotava na Rarawa?

Vuna e Bibi Kina

Na isaunitaro qori ena veisautaka noda ivakarau ni rai.

Vakasamataka Mada

E bulia na Kalou na vuravura qo me rairai vinaka, ia cava na vuna e vakatara tiko kina na rarawa?

Era vakabauta na sega ni daulotu ni rarawa e dua na sala mera vaqaqa kina na vuna e cakava kina qori na Kalou, se bula dina tiko se sega. Era vakabauta tale ga ni rarawa e vakaraitaka ni (1) sega ni tu vua na Kalou na kaukaua me tarova, (2) e sega ni kauai na Kalou me vakaotia, se (3) e sega ni bula dina tiko na Kalou.

Vakacava e dina na vakasama qori?

Ka e Kaya na iVolatabu

E sega ni buli keda na Kalou meda rarawa.

E vinakata meda marautaka na bula.

“Ni vinaka ga mera marau, mera caka vinaka ena nodra bula taucoko, mera kana tale ga mera gunu na tamata yadua, me marautaka na nona cakacaka kaukaua kece. Qo na isolisoli ni Kalou.”—DAUVUNAU 3:12, 13.

Ni buli rau na imatai ni tamata na Kalou, rau sega ni vakila na rarawa.

E sega ni nona inaki me rau rarawa, se mera sotava na rarawa na nodrau kawa.

“E kaya vei rau na Kalou: ‘Drau vakawa, mera le levu mai, drau vakasinaiti vuravura, drau vakamalumalumutaka.’”—VAKATEKIVU 1:28.

Rau digia na imatai ni tamata me rau talaidredre vua na Kalou.

Qori na vuna rau rarawa kina, era rarawa tale ga kina nodrau kawa.

“Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.”—ROMA 5:12.a

E sega ni buli keda na Kalou meda lewai keda ga.

Me vaka ga noda sega ni rawa ni bula e lomaniwai, eda sega ni rawa tale ga ni lewai keda ga.

“E sega ni vu vua na tamata e lako tu me lewa na nona ilakolako.”—JEREMAIA 10:23.

E sega ni vinakata na Kalou meda rarawa.

E vinakata meda kua ni sotava na leqa.

“Kevaka wale ga o rogoca na noqu ivakaro! Ena vaka na uciwai na nomu vakacegu.”—AISEA 48:18.